Ang Ipasabot sa mga Balita
Mga Bunga sa Relihiyon
Ang paghimo sa relihiyon nga komersiyo miresultag “pagkadunot, imoralidad ug ubang porma sa pagkawalay disiplina sa atong mga iglesya,” miingon ang patriarka sa Methodist Church sa Nigeria. Siya miadmiter, sumala sa Daily Times sa Nigeria, nga ang iglesya nakadugang sa bul-og sa krimen sa katilingban sa Nigeria pinaagi sa “pagpangayo ug pagpanawat ug mga gasa gikan sa mga kriminal ug sa limbongang mga opisyal sa gobyerno.” Miingon usab siya nga ang dili maayong paggawi sa relihiyosong mga lider ug sa mga membro naghimo sa simbahan nga “usa ka dapit nga buhatanan ug daotan, mga panglimbong, ug imoral nga mga buhat.”
Si Femi Abbas, usa ka komentarista sa kalihokang Islam, naglangkit usab sa pagdaghan sa proporsiyon sa krimen uban sa pagdugok sa mga tawo ngadto sa komersiyal kaayong relihiyosong mga grupo. Nagsulat sa National Concord sa Nigeria, siya miingon nga ang mga lider niining mga grupoha nakakabig ug mga sumusunod pinaagi sa “matam-is nga dila, pagkaalisto ug sa abilidad sa pagpamentaha sa uban,” ug siya mikomento nga sila “nagtakoban [lamang] sa ngalan sa relihiyon.”
Kining daotang mga bunga ang madahom kon maoy unahon sa relihiyon ang materyal nga mga butang. Ilang napamatud-an ang pagkatukma sa tagna sa Bibliya nga “sa kataposang mga adlaw” ang mga tawo mahimong “mga mahigugmaon sa salapi, . . . may porma sa pagkadiyosnon apan nagapanghimakak sa gahom niini.” “Sila magadumili sa pagpaminaw sa matarong nga pagtulon-an, apan, aron sa pagtagbaw sa ilang kaugalingong mga pangibog, sila magatigom ug mga magtutudlo aron adunay mokulitog sa ilang nagakatol nga mga dalunggan.” Sa laing bahin, ang tinuod nga relihiyon malaoman nga mopasiugdag espirituwal imbes materyal nga mga butang. Busa kini mopalihok sa mga tawo kansang dungganong mga kinabuhi makahimo kanilang mas maayong lungsoranon maingon man matinumanong mga alagad sa Diyos.—2 Timoteo 3:1-5; 4:3; Mateo 6:19-21, 33; 7:16-21.
Tambali ang mga Simtoma, Dili ang Sakit
“Ang Kababayen-an sa Britanya Makabaton ug Pildoras Bisan Walay Panugot,” matud pa sa ulohan sa The New York Times. Ang artikulo mibutyag: “Gikan sa 3 batok sa 2 butos, ang balaod sa mga magbabalod sa House of Lords miingon nga ang mga ginikanan walay bug-os nga awtoridad sa ilang mga anak ug nga ang balaod kinahanglang magpasignunot sa nagabag-ong mga panghunahuna sa katilingban.” Ingong resulta niining desisyona, ang mga doktor sa Britanya karon sa legal nga paagi makaresitag mga pildoras nga igpamugong sa pagpanganak ngadto sa mga babaye ubos sa 16 bisan walay pagkonsulta sa ilang mga ginikanan. Kining balaod sa upper house sa Parliamento sa Britanya gidayeg sa Partido sa Pamuo, sa Medikal nga Asosasyon sa Britanya, ug sa nagkalainlaing mga asosasyon sa pagplano sa pamilya.
Ang katuyoan niining balaora ginaingon nga ‘makakontrolar sa pagsabak sa mga tin-edyer gawas sa kaminyoon ug sa mga aborsiyon.’ Apan dili ba kanang solusyona sa malisod ug nagatubong problema sama ra sa pagtambal lamang sa “mga simtoma”? Dili ba kasulbaran sa atong panahon nga ang mga magbabalod, nga gipaluyohan sa mga doktor ug sa katilingbanong mga organisasyon sa usa ka nasod nga magarbohon sa iyang Kristohanong mga tradisyon, sa pagpakanaog ug balaod nga sa dili direkta nagapalambo sa “sakit” sa imoralidad sa tin-edyer?
Sa pagkatinuod ang labing maayong paagi sa pagpanalipod sa mga dalagang tin-edyer nga nagapakitag “mga simtoma” sa wala kinahanglanang pagsabak ug sa mga aborsiyon mao ang pagtudlo kanila sa moral nga mga prinsipyo nga makapanalipod kanila gikan sa dili matarong seksuwal nga gawi. Ang napamatud-ang nasudlan niining mga prinsipyoha mao ang Bibliya, nga nagapadapat usab sa tambal niining “sakita” nga angay niya—diha sa mga ginikanan nga mao ang may kaakohan sa gawi sa ilang mga anak.—Efeso 5:5; 6:1-4.
Kinabuhi sa Wala pa Matawo
“Sayo pa kay sa atong gituohan, ang igbalati sa wala pa matawo mosugod sa pagpadayag sa ilang kaugalingon; ug nga mas sayo kay sa bag-o nga gituohan, ang maayong mga tinukod ug mga katakos sa utok mosugod sa pag-ugmad.” Matud pa sa gisulat sa mga awtor sa pulyetong Life Before Birth, gipatik sa 1984 sa Pederal nga Republika sa Alemanya sa Federal Minister of Youth, Family and Health. Naghisgot sila bahin sa wala pa matawong bata nga may kinabuhi sa iyang “pinakahuyang nga porma,” nga nagpunting nga “ang unang bugkos sa bata sa iyang mga ginikanan naporma na diha sa tagoangkan.” Sila nag-ingon nga bisan pag daghang mga siyentista nagtuo niadto nga ang wala pa matawong bata moagi ug ang-ang sa ebolusyon, nga mougmad gikan sa usa ka selula ngadto sa usa ka isda ug dayon mahimong ampibiyan (mananap nga mahimong mabuhi sa yuta ug tubig) sa dili pa mahimong tawo, kining teoriyaha gisalikway tungod kay ang “siyensiya nakahimog mga kauswagan.” Sila midawat nga ‘wala nay mokuwestiyon nga ang kinabuhi sa wala pa matawo dili usa ka personal tawhanong kinabuhi. Ang tawo dili mahimong tawo sa sinugdan sa pagkatawo.’
Kining mga nakaplagan magkauyon sa paagi sa paglantaw sa Maglalalang sa wala pa matawo—ingong buhing binuhat. Mipahayag ngadto sa iyang Maglalalang, ang alagad sa Diyos nga si David misulat: “Sa tagoangkan sa akong inahan imong gitabonan ako. Dayegon ko ikaw tungod kay makalilisang ug kahibudnganan uyamot ang pagbuhat kanako . . . Sa wala pa mahingpit ang lawas ko nakita mo na ako, ug diha sa imong basahon nahasulat na ang tanan.”—Salmo 139:13, 14, 16.