Pasko Panahon sa Kasadya sa mga Subanganon

HIGANTENG mga Christmas tree, hayag nga mga suga, mabulokong mga bandera​—makita sila sa tanang shopping center ug department store. Nagkalainlaing mga panaygon sa Pasko masipa kaayo diha sa mga trompa, ug mga paanunsiyo sa pagdasig sa mga tawo sa pagpalit ug daghan pa. Ang mga lalaki ug mga babaye nga nanagsapot ug mga Santa Claus naglakawlakaw ngadto nganhi sa mga karsada nga nanghatag ug pakapin sa mga pumapalit. Kini bang esenaha anaa sa “Kristohanon” nga nasod? Dili, kay sa Japan kini, diin kubos sa 1 porsiento sa populasyon ang nagapangangkong Kristohanon.

Maingon man, diha sa kanait nga isla sa Taiwan, ang “mga Kristohanon” ug dili mga Kristohanon magsaulog sa Pasko uban ang ilang tradisyonal nga paghatag ug gasa. Ug diha sa mga komunidad sa Intsik sa Malaysia, nakadugang ang mga rebentador ug bag-ong diwa sa kasadyaan sa “Kristohanon” nga piyesta.

Nganong ginasaulog niining mga tawhana ang Pasko? Sila ba nagtuo sa Pasko? O ang kasadyaan ba sa Pasko ang ilang gituohan? Ang ebidensiya nagpakita nga ang “kumaon, uminom, ug maglipaylipay” mao ang mensahe nga ilang nakuha gikan sa mga pagsaulog sa Pasko. Daghan ang nagapraktis sa “Kristiyanidad” sa Disyembre 24 ug 25 apan mobalik sa ilang kaugalingong paagi​—sa Budhismo, Shintoismo, Taoismo, o bisan unsa pa​—sa pagkasunod adlaw. Apan, sa unsang paagi, makahimo ang mga tawo sa nagkalainlaing relihiyon sa pag-apil-apil sa “Kristohanon” nga piyesta?

Dihang gipangutana ang bata sa Japan kon nagtuo ba siya ug Santa Claus, siya mitubag, ‘Nagtuo ako kang Santa tungod kay gihatagan niya ako ug daghang mga dulaan.’ Ang iyang tubag nagpabanaag sa kaisipan sa kadaghanan diha sa Subanganon: ‘Pagbaton ug bukas nga hunahuna. Ayaw sobra ka istrikto maylabot sa relihiyon. Kon may mapahimuslan ka niana, kalipayi kana. Apan ibutang kini sa lugar aron dili kini makaapektar sa ubang bahin sa imong kinabuhi.’

Kining kaisipana dayag nga nakita diha sa usa ka surbi nga gihimo sa pangunang pamantalaan sa Japan. Ang usa sa mga pangutana nga gibangon mao: “Sa Japan, komun alang sa usa ka tawo ang pakigbahin sa nagkalainlaing mga relihiyosong piyesta sama sa omiyamairi [usa ka piyesta sa Shintoismo sa pagsaulog sa pagdako sa mga bata], ohigan [makaduha sa usa ka tuig nga rituwal sa Budhismo sa paghandum sa mga nangamatay], ug Pasko. Kuwestiyonable ba kini sa imong hunahuna?” Ang mitubag nga “kuwestiyonable” 19 porsiento lamang. Bisan sa taliwala niadtong nangangkong mga Kristohanon, 60 porsiento nagtuo nga walay daotan ang pagsaulog ug mga piyesta sa nagkalainlaing mga relihiyon.

Kining kaisipana moresulta ug tagsaong relihiyosong katingad-anan​—daghan ang nangangkong mga sumusunod kapin sa usa ka relihiyon. Sumala sa Agency for Cultural Affairs, ang bug-os nga numero sa mga sumusunod sa relihiyosong mga grupo sa Japan maoy 207,080,000 sa kataposan sa 1982, samtang ang gibanabanang populasyon sa Japan sa 1982 maoy 118,600,000 lamang. Kini nagkahulogan nga ang tanang sakop sa mga relihiyon sa Japan mitotal ug 170 porsiento sa bug-os nga populasyon!

“Imposible!” tingali magkanayon ang mga tawo diha sa kultura nga nagtuong usa lamang ang Diyos. Apan ang samang kawalay katinoan kon unsay sundon sa relihiyosong mga kaisipan makita usab diha sa paagi sa Kasadpan sa pagsaulog sa Pasko. Nganong naingon niini? Ug kon mao man kini, angay bang saulogon nimo ang Pasko?

[Hulagway sa panid 3]

Bug-os nga sakop sa mga relihiyon sa Japan: 207,080,000

Bug-os nga populasyon sa Japan: 118,600,000