Ang Ipasabot sa mga Balita

“Dili Maayong Ideya”

Ang nagatubong kabalaka mahitungod sa hugawng dugo nakapugos sa mga doktor sa pagsusi pag-ayo sa pagkamaayo sa pagdugang ug dugo. Si Henry B. Soloway, M.D., editor sa basahong Pathologist, miingon nga sukad pa sa sinugdanan niini ang pagdugang ug dugo gihampak nag mga problema. “Sukad pa sa una,” siya miasoy, “ang pagdugang ug hugawng dugo sa panahon sa pagtigom ug sa pagtipig . . . nakapahinabog daghang kamatayon gikan sa sepsis [impeksiyon] ug endotoxic [makahilo] shock. Ang pagpasa sa hepatitis B pinaagi sa dugo ug sa mga produkto sa dugo mipahinabog daghang kamatayon sa panahon sa Gubat sa Kalibotan II.” Bisan pa sa pag-abot sa teknikal nga mga paagi nga gidesinyo sa pagpaneguro nga “luwas” ang suplay sa dugo, ang pagpasa sa mga sakit sama sa AIDS nagapadayon.

Bag-ong mga kabalaka karon mitungha maylabot sa taas ug tagal nga pagkabuhi sa mga pasyente sa kanser tapos sa operasyon diin sa maong panahon gidugang ang dugo. Si Soloway miingon: “Adunay dakong kapeligrohang dili mabuhi kon . . . dugangan ug dugo ang mga pasyenteng operahan ug kanser sa baga, suso, ug colon.” Nan, unsa, ang mga kapilian? Si Soloway miadmiter: “Ang mga Saksi ni Jehova nangusog . . . nga dili maayong ideya ang pagdugang ug dugo. Hayan moabot ra ang adlaw nga mapamatud-an silang sayop. Apan kasamtangan adunay dakong ebidensiya sa paglaban sa ilang pagtuo, bisan pa sa mga pagsupak gikan sa mga magpupundo sa dugo sa kasukwahi.”

Sa pagkatinuod, ang pagkamasugtanon sa sugo sa Diyos ang nakahimo sa mga Saksi ni Jehova nga libre sa daghang dili maayong mga resulta sa mga pagdugang sa dugo. Ang Levitico 17:14 nag-ingon: “Dili gayod kamo magkaon sa dugo sa bisan unsa nga unod, kay ang kinabuhi sa tanan nga unod mao ang dugo niini.” Ug ang mga Kristohanon gisugo sa ‘paglikay gikan sa dugo.’ (Buhat 15:28, 29) Sa matin-aw, gilantaw sa Diyos ang pagdawat ug dugo sa bisan unsang porma nga “dili maayong ideya.”

“Usa ka Kal-ang sa Ebolusyon”

“Ang mga pako sa mga insekto dili bunga sa ebolusyon nga gikan sa gawas nga butang o sa bisan unsa. Nagsugod sila ingong gagmitoy kaayong mga siwil nga nanuybo sa bukobuko.” Miingon ang peryodiko sa Sweden nga Svenska Dagbladet, nga mitaho maylabot sa pagdukiduki kon sa unsang paagi natuboan ug mga pako ang mga insekto. “Sumala sa usa ka teoriya,” miingon ang taho, “ilang gigamit ang ilang umaabot nga mga pako ingong usa ka matang sa pangdagpas aron makadakop ug mga insekto, hangtod nga sila nakamatikod nga sila usab makalupad ug makaalsa sa ilang kaugalingon gikan sa yuta pinaagi sa hangin o gikan sa mga kahoy.”

Ang taho nagpakita usab nga ang mga biyolohista naghisgot sa ideya nga ang “umaabot nga mga pako,” samtang gamay pa kaayo aron makalupad, hayan nagsilbi usab nga dawatanan sa sidlak sa adlaw aron sa pagpainit ug sa pagpalagsik sa lawas. Unsay nakapadako kanila gikan sa gamitoy kaayo ngadto sa bug-os nga gidak-on? “Mao kini ang kal-ang sa ebolusyon nga malisod ipatin-aw,” miadmiter ang taho.

Apan, ang Bibliya tin-awng nagpakita kon sa unsang paagi natuboan ug pako ang mga insekto. “Gibuhat sa Diyos . . . ang tanang pak-an nga mananap sumala sa ilang matang,” miingon ang Genesis 1:21. Samtang ang mga tuig sa siyentipikanhong pagdukiduki maoy resulta lamang sa panaghap nga teoriya ug sa “kal-ang . . . nga lisod nga ipatin-aw,” sibo ang asoy sa Bibliya sa nahibaloang mga kamatuoran. Ang katingalahang desinyo ug obra sa mga pako sa insekto nakapasidungog dili sa buta nga ebolusyon kondili sa intelehenting Maglalalang.

Pag-abuso sa mga Tigulang

Ang mga tigulang dugang ug dugang nangahimong mga biktima sa pag-abuso ug pagpasagad. Kasagaran na karong makadungog ug mga taho bahin sa mga tigulang nga dinagmalan, gipangawatan, ug ginabun-og, ug gipamatay​—bisan diha sa mga yuta nga sa naandan may dakong pagtamod sa mga tigulang. Diha sa usa ka nasod sa Sidlakan, “naghinugilon ang usa ka social worker mahitungod sa tigulang nga babaye nga gikadenahan sa iyang pamilya sulod sa napulog-upat ka tuig ug gitugotan lamang sa pagkaligo kausa sulod sa duha ka semana,” mitaho ang Asiaweek. Kini midugang nga ang 60-anyos nga babaye sa laing nasod sa Asia “namatay dili pa dugay diha sa usa ka balay sa mga tigulang. Ang iyang anak nga lalaki ug umagad nga babaye wala gayod mopakita dihang namatay siya.” Ingon usab niini ang kahimtang diha sa mga nasod sa Kasadpan. “Mga 1 sa 25 ka tigulang nga mga Amerikano gipasagdan o giabusohan, sa balay o diha sa mga institusyon,” miingon ang U.S.News & World Report. “Ang pagpasagad maoy labing komung porma sa pag-abuso . . . Apan nagatubo ang pisikal ug seksuwal nga pag-abuso.”

Ang mga lumolupyo sa karaang Israel ug ang mga membro sa unang Kristohanong kongregasyon gitambagan sa pagpakitag pagtahod, konsiderasyon, ug pasidungog sa mga tigulang. (Exodo 20:12; Levitico 19:32; Efeso 6:1, 2; 1 Timoteo 5:1, 2) Apan, si apostol Pablo mitagna nga sa kataposang mga adlaw moabot kita sa “kritikal nga panahon” dihang ang mga tawo dugang ug dugang magakalayo gikan sa pagtultol sa Diyos. (2 Timoteo 3:1) Ang usa sa kinaiya nga gipasiugda ni Pablo mao nga ang mga tawo “bug-os kulang sa . . . normal tawhanong pagbati.” (2 Timoteo 3:2, 3, The New Testament in Modern English, ni J. B. Phillips) Kinsay makaduhaduha sa pagkatinuod sa iyang mga pulong?