Mohawid Ka ba sa Kamatuoran?
KON nakasugod ka na sa pagtuon sa Bibliya uban sa mga Saksi ni Jehova, ang pangunang pangutana nga kinahanglang imong tubagon sa imong kaugalingong katagbawan mao, Mao ba kini ang kamatuoran? Kon imong nakita nga kamatuoran kana, mohawid ka ba niana? Ang samang mga pangutana ang giatubang sa mga tawo sa mga adlaw ni Jesu-Kristo ug sa iyang mga apostoles.
Dihang nagwali ang mga apostoles mahitungod kang Jesus, unsay pagsanong sa mga tawo? Buweno, ang balita mahitungod sa Gingharian ni Kristo, sa iyang mga milagro, sa iyang halad-lukat, sa iyang pagkabanhaw, ug sa kinabuhing dayon daw maayong pamation, ug daghan ang midawat sa ilang nadunggan ingon nga kamatuoran. Apan ang kadaghanan wala. Sa pagkatinuod, ang Kristohanong organisasyon niadtong panahona “gipasipalahan” bisan diin. (Buhat 28:22) Busa ang pagdawat sa mga kamatuoran nga giwali sa mga disipulo ni Jesus nagkahulogan sa pagbatok sa popular nga opinyon ug sa pag-atubang ug pagsupak. Busa kinahanglang pamatud-an sa interesadong mga tawo alang sa ilang kaugalingong katagbawan nga ang mga pagtulon-ang Kristohanon mao ang kamatuoran. Sa ingon makabarog sila nga malig-on.
Dihang miduaw si Pablo ug Bernabe sa Antioquia sa Asia Minor, daghang mga tawo ang namati sa ilang balita nga may dulot nga kaikag. Ang rekord sa Bibliya nag-ingon: “Ug dihang nanggula sila, ang mga tawo mihangyo kanila nga kining mga butanga ikausab unta pagsugilon kanila sa sunod nga adlaw nga igpapahulay. Ug sa pagkasunod adlaw nga igpapahulay hapit ang tanang nanagpuyo sa siyudad nagkatigom sa pagpatalinghog sa pulong ni Jehova.” (Buhat 13:42, 44) Apan kining sinugdanang kaikag napalong diha sa dakong gidaghanon sa mga tawo dihang nakadungog sila sa emosyonal nga mga magsusupak nga nagapasipala sa mga apostoles.
Ang berikulo 45 sa Buhat kapitulo 13 nag-ingon: “Apan sa pagkakita sa mga Hudiyo sa panon sa katawhan, sila napuno sa kasina ug mapanamastamasong ilang gisupak ang gipanulti ni Pablo.” Dayon ang bersikulo 50 mipadayon sa pag-ingon: “Apan ang mga Hudiyo mihulhog sa inilang kababayen-an nga nagasimba sa Diyos ug sa mga kadagkoan sa siyudad, ug ilang gipalihok ang pagpanglutos kang Pablo ug Bernabe ug ilang giabog sila ngadto sa gawas sa ilang mga utlanan.” Kinahanglang modesider ang interesadong mga tawo kon magpadayon ba sila sa pagpamati sa mga sumusunod ni Jesus bisan pa sa pagsupak. Makahimo sila sa pagdawat sa mga butang nga ilang nadunggan ingong kamatuoran o sap-ongan ang ilang dunggan niana.
Pagbatok Karon
Sama nga gilutos ang Kristohanon sa unang siglo K.P., sa ingon adunay presenteng-adlawng mga magsusupak nga nagapaningkamot sa pagsap-ong sa mga dalunggan sa interesadong mga tawo sa Kasulatanhong mga kamatuoran nga gitudlo sa mga Saksi ni Jehova. Ang mga higala, mga paryente, ug mga pangulo sa relihiyon sa kasagaran maningkamot pag-ayo sa pagpaluya sa mga interesado gikan sa pagtuon sa Bibliya uban sa mga Saksi ni Jehova. Bisan walay pamatuod sa Kasulatan, ginabatok sa mga magsusupak ang gitudlo ug nagpasakag bakak nga mga akusasyon.
Unsay angay buhaton sa interesadong mga tawo? Tugotan ba nila ang mga pulong sa mga magsusupak sa pagsap-ong sa ilang mga hunahuna ug mga dalunggan sama sa gihimo sa Antioquia? O ila bang pamatud-an sa ilang kaugalingon gikan sa Bibliya kon kamatuoran ba ang ilang gitun-an o dili?
Gidayeg ang masanongong mga tawo sa siyudad sa Berea tungod kay ilang gisusi ang Kasulatan aron masuta kon ang gisugilon kanila ni Pablo mao ang kamatuoran. Dihang nakita nga nagsulti siya sa kamatuoran, sila mibarog nga malig-on alang niana. Kita gisultihan: “Kining [mga taga Berea] mabuot pa kay sa mga taga Tesalonica, kay kini sila midawat man sa pulong uban sa bug-os nga pagkamasibuton, nga mainampingong nanagtuon sa Kasulatan sa adlaw-adlaw sa pagsusi kon tinuod ba gayod ang mga butang nga gisulti kanila.”—Buhat 17:10, 11.
Ang mga tawo sa Berea wala motugot nga ang mga pahayag sa mga magsusupak mosap-ong sa ilang mga hunahuna mahitungod sa maayong balita. Hinunoa, ilang gisusi ang Kasulatan sa adlaw-adlaw aron matino kon tinuod ba ang mga butang nga ilang nadunggan. Nakakaplag silag bililhong bahandi ug dili sila magpadala sa mga magsusupak nga mapalayo gikan niini. Dili ba makataronganong dalan kini nga himoon maylabot sa mao gihapong maayong balita nga gimantala sa mga Saksi ni Jehova karon?
Kon Nganong Mosupak ang Uban
Usahay ang maayog tuyong mga paryente nga imong gimahal ug gitahod ang mosupak, ug tingali may katarongan ka sa pagtuo nga interesado sila sa imong kaayohan. Apan kinahanglan imong palandongon kon nganong misupak sila sa imong pagtuon sa Bibliya uban sa mga Saksi ni Jehova. Sila ba adunay malig-ong pamatuod sa Kasulatan nga ang imong nakat-onan dili kamatuoran? O misupak ba sila tungod sa gisulti sa uban mahitungod kanila? Kulang ba sila sa tukmang kahibalo mahitungod sa gipanudlo sa mga Saksi? Daghan sa misupak kang Jesus mibuhat sa ingon tungod sa pagkakulang ug kasayoran bahin sa iyang gitudlo ug tungod kay nagtuo sila sa bakak nga mga akusasyon sa mga magsusupak.
Dihang nagbitay si Jesus sa kahoy sa pagsakit, ang mga tawo nga nangagi “mibiaybiay kaniya, nga nanagyangoyango sa ilang mga ulo ug nanag-ingon: ‘Aha! Ikaw nga maoy moguba sa templo ug mopatindog niini sulod sa usa ka adlaw, luwasa ang imong kaugalingon ug kanaog sa kahoy sa pagsakit.’ Maingon man usab ang mga hataas nga saserdote nanagbugalbugal kaniya uban sa mga eskriba ug nanag-ingon: ‘Ang uban iyang giluwas; apan sa iyang kaugalingon dili siya makaluwas! Pakanaoga karon si Kristo nga Hari sa Israel sa kahoy sa pagsakit, aron makakita kita ug magapanuo.’” (Marcos 15:29-32) Unsay hinungdan niining daotang tinamdan?
Gitugotan sa mga tawo ang ilang opinyon mahitungod kang Jesus nga maumol sa relihiyosong mga pangulo nga nagdumot kaniya tungod kay iyang giladlad sila ingong bakak nga mga magtutudlo kansang mga lihok wala magkatukma sa ilang pangangkon nga mga hawas sa tinuod nga Diyos. Sa pagkaprangka, si Jesus miingon ngadto kanila: “Nganong inyo mang lapason ang sugo sa Diyos aron lang pagtuman sa inyong gikabilinbilin nga kalagdaan? Kamong mga maut, tukma gayod ang tagna ni Isaias mahitungod kaninyo, sa iyang pag-ingon, ‘Kining mga tawhana nagapasidungog kanako pinaagi sa ilang mga ngabil, apan halayo kanako ang ilang kasingkasing. Kawang lamang ang ilang pagsimba kanako, tungod kay sa ilang pagpanudlo ila mang gipaka-doktrina ang kalagdaan nga hinimo lamang sa mga tawo.’”—Mateo 15:3, 7-9.
Hilabihan gayod ang pagdumot sa relihiyosong mga pangulo kang Jesus ug sa mga kamatuoran nga iyang gitudlo nga tungod niana nagsabot sila sa pagpatay kaniya ug naningkamot nga masuko kaniya ang mga tawo. Karon, daghang relihiyosong mga pangulo ang nagabatok sa mga Saksi ni Jehova sa sama nga kainit. Ug sama sa kahimtang sa unang mga Kristohanon, ang mga Saksi “gipasipalahan” bisan diin. Apan maalamon bang tugotan kining popular nga pagbatok nga maoy moumol sa imong kaisipan?
Ang samang mga kamatuoran sa Kasulatan mahitungod sa Gingharian sa Diyos nga giwali ug gimantala ni Jesus ug sa iyang mga apostoles ginawali karon sa mga Saksi ni Jehova. Ginatos ka libong katawhan sa tibuok kalibotan nagadawat niining maayong balita bisan pa sa mainit nga pagsupak sa mga higala, mga paryente, ug relihiyosong mga pangulo. Kadtong midawat sa balita sa Gingharian nakapamatuod sa ilang katagbawan nga mao kini ang kamatuoran, ug determinado sila sa paghawid niana.
Busa nganong sundogon kadtong mga tawo sa unang siglo kinsa mitugot sa uban sa pagpatalikod kanila gikan sa makahatag kinabuhing mga kamatuoran sa Kasulatan nga miabot kanila pinaagi sa dili-inilang mga sumusunod ni Jesu-Kristo? Hinunoa, padayon sa pagtuon sa Bibliya uban sa mga Saksi, ginamit ang sinulat nga Pulong sa Diyos sa pagpamatuod sa imong kaugalingong katagbawan nga ang imong nakat-onan sa tinuod mao ang kamatuoran. (Juan 8:32) Ug pinaagi sa tabang sa Diyos hawid sa kamatuoran.