Mga Babaye Diha sa Trabahoan—Mga Pagsulay ug mga Hagit

“ANG mga babaye misulod sa pormal nga puwersa sa pamuo nga wala pa hitupngi sukad ang gidaghanon sa milabayng tulo ka dekada.” Nag-ingon ang taho sa tigdukiduking organisasyon nga Worldwatch Institute. “Diha sa adunahan ug pobreng nasod,” ang taho mipadayon, “ang implasyon nakapukaw sa mga babaye sa pagtrabaho aron may kinitaan.” O sumala sa pagkapahayag niana sa usa ka taga Nigeria nga babaye: “Tungod sa kalisod sa ekonomiya napugos ako sa paggawas ug sa pagtrabaho.”

Sama sa “may katakos nga asawa,” sa panahon sa Bibliya, daghang mga babaye malipayon sa pag-amot sa gikinahanglang kontribusyon alang sa kaayohan sa ilang mga pamilya. (Proverbio 31:10, 16, 24) Ug nakita sa uban nga mahagiton ug makatagbaw ang pagkaadunay trabaho. Samtang ang sekular nga trabaho adunay mga kaayohan, hayan may mga kakulian usab kini.

Pananglitan, ang usa ka babaye nga manedyer sa tindahan miingon: “Gimahal ko ang akong trabaho. Maayo ang akong amo, maanindot ang akong opisina. Apan maglagot ako kon makuha nianang trabahoa ang akong dugang panahon kay sa akong mahatag niana, tungod kay may trabaho akong naghulat sa balay tapos niana​—ingong asawa ug inahan.” Apan, adunay daghang mga babaye nga nakaatiman ug maayo sa trabaho, sa panimalay, ug sa pamilya, ug tungod niana sila angay hatagan ug kinasingkasing nga komendasyon.a

Apan, ang sekular nga trabaho nagladlad sa mga babaye sa daghang mga problema nga tagsaon diha sa trabahoan. Alang sa kadaghanan, ang hagit mao ang paghupot ug timbang nga kaisipan dihang mapugos sa pagtrabaho diha sa usa ka palibot nga adunay mainit nga kompetisyon o baga sa pagkawalay pagtagad. Ang tinguha nga moasenso, aron makauna, nakapukaw sa pipila ka babaye sa paghimo sa ilang mga trabaho nga dugokan sa ilang mga kinabuhi.

Usahay ang trabahoan maoy tuboran usab sa mga kapig-otan sa moral. Ang adlaw-adlawng pagkaladlad sa mahilas nga mga kolokabildo maoy kasagarang reklamo sa mga babayeng nagatrabaho. Mas grabe pa, nakaplagan sa pipila nga nangabiktima sa masubsob nga seksuwal nga pagpanghasi. “Dihang nagsugod ako sa pagtrabaho,” nanumdom ang usa ka Kristohanong babaye, “ako lamang ang babaye sa opisina. Malaw-ay kaayo ang mga sinultihan sa mga lalaki, ug nalisdan kaayo ako niadto.”

Ang mga probemang ingon niini maoy tinuod nga kabalaka sa mga babaye nga napugos sa pag-atubang kanila matag adlaw, ilabina niadtong nagatinguhang mapatunhay ang Kristohanong mga sukdanan. Makalipay, adunay tuboran sa tinuod nga tabang alang kanila.

[Mga footnote]