Ang Bili sa Pag-awit sa Matuod nga Pagsimba

MAKAHANDURAW ka ba sa kalibotan nga walay awit? Nga dili na gayod madungog ang malipayong pag-awit sa kabataan o ang tam-is nga tingog sa siloy? Dili na madungog ang mananakod nga agik-ik sa magpie o ang katawa sa kookaburra? Ikalipay, dili gayod kini mahitabo. Apan ang maong pamalandong nagapasiugda sa usa sa daghang gasa sa Diyos alang sa tawo: ang gasa sa awit.

Si Jehova Usa ka Diyos sa Awit

Nganong ang pag-awit makapahimuot ug makalipay kanato? Sa usa ka butang, si Jehova mismo nagakalipay ug nahimuot sa mga awit sa pagdayeg sa iyang mga linalang. Makahanduraw ka ba sa okasyon dihang ang tanang manulonda misinggit sa kalipay tungod sa pagkatahom sa yutan-ong kalalangan ni Jehova? O makahanduraw ka nga nagtindog nga nahingangha taliwala sa mga magbalantay sa kahayopan sa gabii sa tinghunlak sa pagkatawo ni Jesus, ug nagkalipay sa tingog sa dako kaayong panon sa mga manulonda nga nag-awit: “Himaya sa Diyos sa kahitas-an”?​—Lucas 2:13, 14; Job 38:7.

Ang usa ka paagi nga gipaila ni Jehova nga siya Diyos sa awit maoy pinaagi sa paghimo sa pag-awit nga bahin sa matuod nga pagsimba sa Israel. Sa ulahi, ang Diyos nagpadayag na usab sa suod nga pagkalangkit sa pag-awit ug sa matuod nga pagsimba diha sa panan-awon sa Pinadayag nga gihatag ngadto kang apostol Juan. Sa usa ka matagnaong talan-awon ang labihan ka dakong koro​—144,000 ka lig-on​—nagaawit sa usa ka matahom nga bag-ong awit atubangan sa trono sa Diyos.​—Pinadayag 14:3.

Pag-awit sa Una-Kristohanong Panahon

Ang pagkahalangdon ug kahibulongang mga buhat sa Diyos nagdasig usab sa iyang yutan-ong mga alagad sa pag-awit. Batia ang makapapukawng mga epekto sa pag-awit diha sa mga Israelinhon sa pagkatapos gayod sa ilang milagrosong pagkaluwas gikan sa Ehiptohanong pagkaulipon. Ang mga kasingkasing ni Moises ug sa iyang isigka-Israelinhon natandog sa emosyon samtang sila miawit sa awit sa kadaogan nga nag-asoy kon unsay gibuhat ni Jehova kang Paraon ug sa iyang mga panon.​—Exodo 15:1-21.

Sa ulahi sa kasaysayan sa Israel, ang halandumong adlaw miabot dihang, ilalom sa pagtultol ni Haring David, ang arka sa tugon igabutang sulod sa gipatindog sa linain nga tolda. Makasaysayanhon gayod nga okasyon! Dili lamang ang talagsaong pag-awit kondili ang makapadasig-sa-kalag nga pagduyog sa mga tulonggon nakadugang sa kahimayaan niadtong adlawa.​—1 Cronicas 16:4-36.

Ang gugma ni David sa musika ug iyang kabatid sa alpa nagpasiugda sa iyang kaikag sa pagpasiugda sa musika ug pag-awit diha sa matuod nga pagsimba. Sa Salmo 33:1, 3, atong madungog ang iyang pangaliyupo nga ang mga magsisimba ni Jehova moawit nga kusog ngadto sa Diyos uban ang bug-os nilang kasingkasing: “Manag-awit kamo nga malipayon, O kamong mga matarong, tungod kang Jehova . . . Buhata ang labing maayo sa inyong pagtugtog sa mga tulonggon duyog ang malipayong singgit.”

Pag-awit sa Kristohanong Panahon

Sa sayong Kristohanong panahon, ang pag-awit may ilado usab nga bahin sa matuod nga pagsimba. Si Jesus ug ang iyang mga apostol nagdungan sa pag-awit tapos sa panihapon sa dayon nang pagkamatay ni Jesus. (Marcos 14:26) Sa bilanggoan si Pablo ug si Silas miawit nga kusog aron ang tanan makadungog. (Buhat 16:25) Sama kang David si apostol Pablo madasigon mahitungod sa paggamit sa awit. Iyang gidasig sa makadaghan ang kaubang mga magtutuo sa pag-awit sa mga awit sa pagdayeg kang Jehova.​—Efeso 5:18, 19; Colosas 3:16.

Sa Kristohanong pagsimba karong adlawa, ang pag-awit ilado usab nga bahin. Niadtong 1905 ang librong Hymns of the Millennial Dawn gipatik. Ang panid sa titulo nagbatbat sa 333 ka awit niadto ingong “Pinili nga Katigoman sa mga Salmo ug mga Himno ug Espirituhanong mga Awit sa Pagtabang sa Katawhan sa Diyos sa Pag-awit ug Pag-awit sa Ilang mga Kasingkasing Ngadto sa Ginoo.”

Unya niadtong 1928 ang usa ka rebisadong basahon sa awit nga may 337 ka awit gitagana. Kadto ginganlag Songs of Praise to Jehovah, ug ang pasiunang pulong niadto miingon: “Kining mga Awita makaplagang nahiuyon sa balaang mga kamatuoran nga karon masabtan na.” Bisan pa niana, sa paglabay sa katuigan ug miuswag ang kahayag sa kamatuoran, natin-aw nga ang pipila niadtong mga awita naimpluwensiyahan sa panghunahunang dala pa gikan sa bakak nga relihiyon. Dugang pa, ang mga awit sa Gingharian sa pagdasig sa pagsangyaw sa maayong balita gikinahanglan, samtang ang publikong pagpahayag labaw nga nailado.​—Mateo 24:14; Hebreohanon 13:15.

Niadtong 1944 ang Kingdom Service Songbook gitagana, nga may 62 ka awit. Kawhaan ka tuig sa ulahi, niadtong 1966, ang basahong Pag-awit ug Pagduyog sa Inyong Kaugalingon Uban sa Honi Diha sa Inyong mga Kasingkasing giluwatan. Kadto naundag 119 ka awit sa Gingharian nga nagkobre sa tanang bahin sa Kristohanong pagkinabuhi ug pagsimba, apil ang aktibong pagsangyaw ngadto sa uban ug nagdayeg kang Jehova nga Diyos ug kang Kristo Jesus.

Halos laing kawhaan ka tuig ang milabay sukad niadto, nga sa maong panahon ang kahayag sa kamatuoran nagpadayon sa pag-uswag. (Proverbio 4:18) Nasabtan ang panginahanglan sa lain pang basahon sa awit. Busa, sa 1984 giluwatan ang basahon sa awit, nga may titulong Mag-awit ug mga Pagdayeg Kang Jehova. Kini may 225 ka awit, uban sa mga pulong ug mga honi nga gikomposo sa bug-os sa dedikadong mga alagad ni Jehova gikan sa tanang bahin sa yuta.

Gamita sa Bug-os ang Teokratikanhong Pag-awit

Ang ilustrasyong gipakita sa dobleg-latag kataposang pliego sa likod sa maong kinaulahing basahon sa awit nagadasig kanato sa paggamit sa bug-os sa teokratikanhong pag-awit panahon sa Kristohanong mga tigom. Ang nabansayng mga mag-aawit sa templo nga gihulagway dinha tin-awng nagabayaw sa ilang mga kasingkasing ug ilang mga tingog sa pag-awit ngadto sa Diyos.​—1 Cronicas 25:7.

Kita samang makaawit panahon sa atong Kristohanong mga tigom, nga buksan ang atong mga baba ug mag-awit gikan sa atong mga kasingkasing. Ugaling, dili tanan kanato nagabuhat niana. Tingali tungod sa garbo atong malaktawan ang kalipay sa pag-awit kang Jehova nga walay pagkaulaw, bisan kon unsa ang matang sa atong tingog. Kita basin mabalak-on kaayo sa impresyon diha sa nagtindog sa duol. Si Moises may susamang suliran​—dili sa pag-awit kondili sa pagsulti. Ang tubag nga gihatag kaniya ni Jehova basin makabulig kanato kon kita makiling sa pagpugong sa pag-awit tungod sa kakulang sa katakos. Si Jehova nangutana kang Moises: “Kinsay nagtudlo sa usa ka baba alang sa tawo? . . . Dili ba ako, si Jehova?” (Exodo 4:11) Tino, si Jehova malipay nga magpatalinghog samtang atong gamiton ang bisan unsang katakos nga iyang gihatag kanato sa pag-awit nga kusog sa iyang mga pagdayeg!

Hunahunaa, usab, giunsa ni Pablo ug ni Silas pag-awit nga kusog samtang didto sa bilanggoan. Walay pagkaulaw niana, ug sila walay duyog nga tulonggon, wala gani basahon sa awit nga pagasundon. Handurawa ang okasyon: “Apan sa tunga na sa gabii si Pablo ug si Silas nag-ampo ug nagdayeg sa Diyos pinaagi sa awit; oo, ang mga binilanggo nakadungog kanila.” (Buhat 16:25) Kadto tungod ba kay si Pablo ug si Silas nagbaton sa nabansayng mga tingog sa pag-awit? Dili gayod ingon. Ang ilang pangunang gikabalak-an mao ang pag-awit nga kusog ug gikan sa kasingkasing! Unsa ba ang atong pangunang gikabalak-an kon magaawit sa mga awit sa pagdayeg?

Kitang Tanan Mahimong Mouswag

Ang tambag sa maghohoni nga si David nahiangay dinhi: “Buhata ang labing maayo sa inyong pagtugtog sa mga tulonggon duyog sa malipayong singgit.” (Salmo 33:3) Kana ang gidahom ni Jehova sa tanan niyang alagad​—walay kapin, walay kulang kay sa ‘buhaton nato ang labing maayo.’ Kon buhaton gayod nato kana, kita makadahom nga panalanginan ni Jehova ang atong mga paningkamot, ug sa atong kalipay​—ug usahay sa atong katingala​—kita lagmit mouswag.a—2 Pedro 1:5.

Ania ang pila ka praktikal nga sugyot nga tingali makatabang sa pagpauswag sa kalidad sa imong pag-awit: Sulayi ang kanunay nga pagpatalinghog sa bag-ong mga awit sa Gingharian, nga gamiton ang narekord nga mga teyp sa awit o mga rekord kon mahimo. Alang sa pipila, ang pag-awit sa mga awit sa balay o sa gagmayng mga katigoman uban sa isigkamagtutuo napamatud-ang mapuslanon ingon man kahimut-anan. Panahon sa mga tigom sa kongregasyon hinungdanong ang musikal nga duyog patugtogon nga may igong kalanog aron madungog sa tanang nagaawit. Kini mas mopasayon sa pagsubay sa tono ug mopadako sa pagsalig sa bahin niadtong nagaawit. Ang nagaanunsiyo sa usa ka awit angay magpahayag sa tema niini, nga tingali mohisgot sa katukma niini ug dili lang sa numero niini.

Mga ginikanan, nagadasig ba kamo sa inyong mga anak sa pag-awit sa mga awit sa Gingharian uban ang kadasig ug gikan sa ilang mga kasingkasing? Ang mga pamilya nga nagdasig sa ilang mga bata sa pag-awit gikan sa kasingkasing, ug uban ang pagsabot, nakakaplag sa makadaghan nga ang maong pag-awit maayong tabang sa espirituhanong pagtubo.

Daghan ang mga Benepisyo

Adunay daghang benepisyo sa pag-awit nga kusog ug gikan sa kasingkasing. Ang atong personal nga pagkalangkit sa publikong pagsimba mahimong mas lig-on. Kadtong nagatindog sa duol madasig sa pag-awit nga mas kusog kon sila makadungog sa atong walay-pagkaulaw nga pag-awit. Ang tibuok kongregasyon makabaton usab ug benepisyo, kay ang kusog nga tingog mananakod!

Dugang pa, ang kusog nga pag-awit mohatag ug maayong pamatuod niadtong nagatambong sa mga tigom sa unang panahon. Kadtong molabay sa atong mga Kingdom Hall, ingon man ang mga silingang nagapuyo sa duol, makadayeg sa atong maayong pag-awit, sama sa walay duhaduha niadtong ubang binilanggo nga nakadungog kang Pablo ug Silas. Kini misangpot pa sa pagtinguha sa pila ka nakadungog sa pagtinguhang mahibalog dugang sa kamatuoran.

Labing hinungdanon, ang atong miuswag nga pag-awit mohatag ug mas dakong pagdayeg kang Jehova, ang Tagmugna sa musika ug pag-awit, ang usang takos pagadayegon sa awit nga labaw sa tanan.

[Mga footnote]