‘Magpadayon Kamo nga Mapasibo’

“SEGURADO ka ba nga dili kita mosaylo?” Gitumong sa pasahero ang iyang pangutana ngadto sa piloto sa barko. Samtang mituya ug mikiling ang gamitoy nga barko tungod sa kakusog sa gidungog nga Cape rollers sa Habagatang Atlantiko, mipatim-aw nga alang kaniya milagro lang nga sila makaabot sa gamitoy nga tumbok sa mapa nga mao ang ilang destinasyon.

Busa siya gidapit sa piloto ngadto sa plataporma sa barko ug gisaysay ang mga obra sa mga himan sa pagnabigar—gyro nga mga compass, radar, satelayt nga mga tigdawat sa signal, ug bisan ang ordinaryong sextant. Bisan pag ang teknikal nga mga katin-awan wala kaayo niya hisabti, nasabtan niya ang usa ka paninugdang prinsipyo sa nabigasyon: pagtul-id sa agi. Ang kapitan, nga inabagan sa iyang himan sa pagnabigar, makasagang sa mga epekto sa sulog sa dagat ug hangin pinaagi sa paghimog kanunay nga mga pagpasibo. Kon wala ang maong mga pagpasibo, masayloan nila ang ilang destinasyon sa daghan, daghang milya.

Ang mga Kristohanon nahisama sa mga barko diha sa dagat sa katawhan. Ang atong tumong mao nga “hikaplagan sa kataposan ni [Jehova] nga walay buling ug hugaw ug anaa sa kalinaw.” (2 Pedro 3:14) Apan sama sa barko, adunay mga puwersa—sulod ug gawas—nga lagmit magpadpad kanato pagawas sa angay nga dalan. Nan, haom kaayo ang mga pulong ni apostol Pablo ngadto sa mga taga-Corinto: “Alang niini kami nagaampo, nga kamo mapasibo. . . . Magpadayon kamo nga . . . mapasibo.”—2 Corinto 13:9, 11.

Kon Unsay Nalangkit sa Pagpasibo

Ang Gregong pulong nga gihubad dinhi nga “pagpasibo” nagatumong sa “pagpauyon” sa usa ka butang. (Tan-awa ang potnot sa Reference Bible.) Sa pila ka teksto sa Bibliya, kini gigamit sa pagbatbat sa pagpasig-uli sa usa ka butang sa tukmang kahimtang. Pananglitan, sa Mateo 4:21, ang susamang termino gigamit sa pagbatbat sa “pagpuna” o pag-ayo sa mga pukot. (Kingdom Interlinear) Nan, unsay kahulogan nga ang mga Kristohanon mapasibo?

Aw, tagda ang mga Kristohanon sa Corinto nga gisulatan ni Pablo. Sa nangaging sulat kanila, gipunting ni Pablo ang ubay-ubayng dili-maayong mga kahimtang nga naglungtad sa kongregasyon: sektaryanismo, pagtugot sa seksuwal nga imoralidad, mga asunto taliwala sa mga igsoon, dili-pagtahod sa Panihapon sa Ginoo, ug bisan gubot nga mga tigom. (1 Corinto 1:10-13; 5:1; 6:1; 11:20, 21; 14:26-33) Sa ingon kinahanglang ang mga taga-Corinto “magpuna” o mag-ayo sa kahimtang didto, nga mao, “magpauyon” niana sa diyosnong mga prinsipyo.

Ang ikaduhang sulat ni Pablo kanila nagpaila nga kana ang ilang gibuhat. (2 Corinto 7:11) Bisan pa niana, nasayran ni Pablo nga ang mga pagpiit gikan sa kalibotan, gikan kang Satanas, ug gikan sa ilang unodnong mga hilig mismo magpadayon sa pagduso kanila nga mahigawas sa angay nga dalan matag karon ug unya. Busa, angay nga siya mitambag kanila nga ‘magpadayon kamo nga mapasibo.’

Ang Panginahanglan sa Pagpasibo Karong Adlawa

Ang mga Saksi ni Jehova karong adlawa kinahanglang magpadayon nga mapasibo. Si Satanas nga Yawa ‘nagapakigbugno’ batok kanato, nga nagabuhat nga madalion aron sa pagbungkag sa atong integridad. (Pinadayag 12:17; Efeso 6:12) Kita gilibotan usab sa tibuok-kalibotang sistema sa mga butang nga nagalihok “sumala sa magmamando sa pagbulot-an sa kahanginan.” Ang atong mga kauban sa trabaho ug sa eskuylahan tingali mga tawo nga ‘nagagawi nga nahiuyon sa mga pangibog sa ilang unod, nga nagabuhat sa mga butang nga gimbut-an sa unod.’ (Efeso 2:2, 3) Kita may kanunayng pakigbugno batok sa atong napanunod makasasalang mga kiling. (Roma 7:18-25) Kon wala ang kanunay nga pagpasibo, kita daling mapadpad pagawas sa angay nga dalan.

Usa ka kasinatian ni apostol Pedro nagailustrar pag-ayo niini. Tapos sa tukmang pagpaila kang Jesus ingong “ang Kristo, ang Anak sa Diyos nga buhi,” gidayeg si Pedro pinaagi sa mga pulong: “Malipayon ka, Simon nga anak ni Jonas, kay ang unod ug dugo wala magpadayag niini kanimo, apan ang akong Amahan nga anaa sa mga langit.” (Mateo 16:16, 17) Tin-aw, ang panghunahuna ni Pedro matarong. Bisan pa niana, sulod sa kal-ang sa panahong gikobrehan sa sunod unom ka bersikulo, siya gibadlong nga grabe ni Jesus! Sa pagkahibalo nga si Kristo “magaantos sa daghang butang . . . ug pagapatyon,” si Pedro miawhag kang Jesus: “Magmaluluton ka sa imong kaugalingon, Ginoo; dili kini mahitabo kanimo.” Si Jesus mitubag nga madali: “Pahawa ka diha, Satanas! Ikaw usa ka kapandolan kanako, tungod kay ikaw nagahunahuna, dili sa mga hunahuna sa Diyos, apan sa mga hunahuna sa mga tawo.”—Mateo 16:21-23.

Si Pedro naghunahuna gikan sa unodnong punto de vista. Ang iyang mga hunahuna ug tinamdan kinahanglang mapasibo. Dili ba kini matuod kanatong tanan matag karon ug unya? Dili ba kita makiling sa pagsabot sa mga butang gikan sa atong kaugalingong punto de vista inay kay sa iya sa Diyos? Busa, panagsa kinahanglan nga kita mapasibo. Sama sa usa ka barko sa dagat, ang maong mga pagpasibo usahay tingali gamay, halos walay hinungdan. Apan mahimong kana magkahulogan sa kalainan tali sa pag-abot sa atong destinasyon ug pagkasinati sa pagkalunod sa espirituwal. Sa pagkamatuod, ang gamay nga pagpasibo karon basin makapugong sa paghimog dagko—tingali makaguol—nga mga pagpasibo sa ulahi.

Balaang mga Sukdanan

Kon ang mga instrumento sa pagnabigar sa barko dili tukmang pagkagama sumala sa sukdanan, dili mahimo ang tukmang mga pagtul-id sa dalan. Sa susama, aron kanunay natong matul-id ang atong mga kinabuhi, gikinahanglan nato ang tukmang giya sa Pulong sa Diyos, ang Bibliya. “Ang tibuok nga Kasulatan dinasig sa Diyos ug mapuslanon alang sa pagtudlo, sa pagbadlong, sa pagtul-id sa mga butang.” (2 Timoteo 3:16) Kanang dinasig nga Pulong nagpahayag sa mga sukdanan sa Diyos sa kagawian ug panghunahuna. Ang regular nga pagbasa niini kinahanglanon sa pagsubay sa “mga dalan sa pagkamatarong.”—Salmo 23:3.

Ang dugang pagtultol nagagikan sa “matinumanon ug maalamong ulipon” nga matang sa dinihogang mga Kristohanon. Sila gitabangan sa espiritu ni Jehova sa pagsabot nga mauswagon sa iyang kabubut-on. (Mateo 24:45-47; Proverbio 4:18) Busa, sa dihang ang direksiyon moabot gikan sa organisasyon ni Jehova, kita maalamong makapailalom niana, kay nasayod sa bug-os nga si Jehova moagak lang kanato sa paagi nga maoy sa atong walay-kataposang kaayohan.—Isaias 48:17.

Hinuon, may panahong gikinahanglan nato ang personal nga tabang sa pagpabiling matul-id. Si Pablo mitambag sa Galacia 6:1: “Mga igsoon, bisan pag ang usa ka tawo mahiligas sa dili pa siya makaalinggat niana, kamong may espirituhanong mga katakos mosulay sa pagpasibo sa maong tawo diha sa espiritu sa kalumo.” Ang mga ansiano ug ministeryal nga mga alagad nahiapil niadtong may maong espirituwal nga mga katakos. Kasagaran ilang ipunting nga direkta kanato ang usa ka bahin diin gikinahanglan nato ang paghimog mga pagpasibo.

Paningkamot Gikinahanglan

Dili kanunay sayon ang paghimo sa gikinahanglang mga kausaban sa atong mga kinabuhi. Makausa pa, tagda si Pedro. Nga natawong usa ka Hudiyo, si Pedro nagtubo nga nagbaton sa naglungtad niadto nga negatibong hunahuna sa mga tawo bahin sa ubang mga rasa. Sumala sa iyang gisulti sa Hentil nga si Cornelio: “Nahibalo ka nga dili uyon sa kasugoan nga ang usa ka Hudiyo moanib o moduol sa usa ka tawo sa laing rasa.” Bisan pa niana, tapos sa pagkaamgo nga kabubut-on sa Diyos nga iyang ipakig-ambit ang Kristohanong kamatuoran uban niining tawhana ug sa iyang pamilya, si Pedro mihinapos: “Sa pagkamatuod akong nasabtan nga ang Diyos walay pinalabi, apan sa matag nasod ang tawo nga nahadlok kaniya ug nagabuhat sa pagkamatarong dalawaton kaniya.”—Buhat 10:28, 34, 35.

Si Pedro mihimog katingalahang kausaban sa iyang panghunahuna ug tinamdan bahin sa ubang mga rasa! Apan lagmit may panginahanglan nga siya magpadayong mapasibo niining bahina, kay sa pila ka tuig sa ulahi, si Pedro gidaog sa pagpiit sa kauban ug nagsugod sa pagsilo sa Hentil nga mga magtutuo. Kinahanglang badlongon siya ni apostol Pablo, nga migamit sa labing masakit nga mga pulong sa pagtabang kaniya nga mapasibo sa iyang panghunahuna sa dugang pa!—Galacia 2:11-14.

Sa susama karong adlawa, ang usa ka Kristohanon tingali nagtubo sa palibot nga may rasanhong pagkamadapigon. Sa pagkadangat sa kamatuoran, basin sa hunahuna iyang ilhon nga ang Diyos walay pinalabi apan mohawid gihapon sa mga pagbati sa rasanhong pagkamadapigon. Bisan pag dili mabatokon niadtong iya sa laing rasa, basin siya awtomatikong magtuo nga sila may dili-maayong mga hiyas tungod sa ilang rasanhong panulondon. Basin tigion niya ang ilang pailob pinaagi sa mga komedya bahin sa rasa o mga pulong nga kanunay mag-awhag sa pagtagad sa rasa, o sa mga kalainan sa rasa. Basin dili pa niya dawaton ang tambag sa usa ka kaubang Kristohanon si kinsa, kay menos sa edukasyon o sa kahimtang sa katilingban, dili makapahayag sa iyang kaugalingon sa usa ka tinong paagi. Dayag, kinahanglan ang dakong paningkamot aron siya magpasibo sa iyang panghunahuna nga nahiuyon sa kang Jehova!a

Apan kon kaha ang isyu maoy rasanhong pagkamadapigon, materyalismo, sosyal nga mga pakiglambiggit sa eskuylahan ug sa trabaho, o panginahanglan sa pagtambong sa Kristohanong mga tigom, kinahanglang mosanong kita sa direksiyon nga gitagana pinaagi sa Pulong sa Diyos ug sa iyang organisasyon. Dili gayod angay nga mobati kita nga ang angay Kasulatanhong tambag dili mapadapat kanato ug dili tagdon kana. Hinumdomi nga ang dili-matinumanong mga Israelinhon miingon: “Ang dalan ni Jehova wala mapasibo sa tukma.” Dili ba kita ang kinahanglang mapasibo ngadto sa mga dalan ni Jehova?—Ezekiel 18:25.

Kita malipay nga si Jehova may mainitong kaikag sa paagi sa atong paglakaw sa iyang atubangan, nga nagataganag kanunay nga pagtul-id alang sa iyang katawhan. Kini maoy sumala sa gitagna ni Isaias: “Ug ang imong kaugalingong mga igdulongog makadungog sa usa ka pulong sa imong luyo nga magaingon: ‘Kini ang dalan. Lakaw niini, kamong katawhan,’ kay basi kamo mopaingon sa tuo o basi kamo mopaingon sa wala.” Hinaot kita, sa atong bahin, magmasensitibo sa maong mahigugmaong direksiyon gikan kang Jehova ug “maandam sa pagsugot.” (Isaias 30:21; Santiago 3:17) Oo, magpadayon nga kita mapasibo aron ang atong dalan motultol kanato ngadto sa tumong nga walay kataposan nga inuyonan sa Diyos!

[Footnote]