Mga Magmamantala sa Gingharian Nagtaho
Mga Tigpangita sa Kamatuoran Misanong sa Impormal nga Pagpamatuod
ANG Bibliya nagapahibalo kanato nga ang samag-karnerong mga tawo mosanong gayod sa tingog sa Maayong Magbalantay. (Juan 10:27) Kini maoy nagakahitabo sa daghang kayutaan, apil ang Britanya.
◻ Pananglitan, sa 1988, sa bisperas sa Pasko, si Pamela, usa sa mga Saksi ni Jehova, nagtubag sa telepono sulod sa opisina diin siya nagatrabaho ug nakigsulti sa usa ka salesman nga nagatrabaho alang sa mao rang kompaniyaha sa laing dapit sa Inglaterra. Sa paniklop sa maong tawag, ang lalaki misukna: “Andam ka na ba alang sa Pasko?” Si Pamela miingon: “Dili!” “Ulahi kag diyutay dili ba?” ang nagtawag misukit. “Wala ako magsaulog ug Pasko,” tubag ni Pamela. Ang lalaki miingon nga kana dili naandan ug nangutana ngano. Si Pamela misulti kaniya nga siya usa sa mga Saksi ni Jehova ug mipadayon sa pagpahayag nga walay sugo diha sa Bibliya nga saulogon ang adlawng natawhan ni Jesus, ug lain pa, si Jesus wala matawo sa Disyembre 25. Dugang pa, ang Pasko sa lintunganay maoy paganong kasaulogan. Ang mitawag sa telepono miingon nga kanang tanan morag makaiikag uyamot.
Tulo ka bulan sa ulahi si Pamela nagtubag sa telepono, ug ang mitawag nag-ingon: “Nahinumdom ka ba nga nakigsulti nako una pa mo-Pasko ug nagtug-an nga ikaw wala magasaulog ug Pasko? Tan-awa, akong nakaplagan ang kamatuoran!” Kini mao rang lakiha, ug siya mipahayag nga duha ka semana human sa Pasko, duha ka mga Saksi miduaw sa iyang balay. Iyang giabiabi sila, ug usa ka pagtuon sa Bibliya ang nasugdan. Siya miasoy nga kusog ang iyang pag-uswag sa iyang mga pagtuon. Iyang gisuginlan ang iyang puyopuyo nga trato nga ang ilang pamaagi sa kinabuhi dili kahimut-anan kang Jehova, busa sila nagbulag, ug karon silang duha nagatambong na sa mga tigom sa Kingdom Hall.
Sa pagkatapos sa tuig, sila gidawat ingong di-bawtismadong mga magmamantala, ug sayo sa 1990 sila nagminyo. Unya sila nagpabawtismog dungan. Usa ka mahimayaong resulta gikan sa usa ka mubo, impormal nga pagpamatuod pinaagig telepono!
◻ Si Jehova nagpanalangin sa laing sister kinsa sa impormal nagpamatuod sa Inglaterra. Sa dihang ang ahente sa seguro mianha sa iyang pultahan, ang sister misukit kaniya kon buot ba niyang magarantiyahan ang iyang maayong panglawas, kalipay, ug walay kataposang kinabuhi. Siya mitangdo ug nangutana sa sister haing polisa sa seguro ang iyang ginasugilon. Kay gipakitaan gikan sa Bibliya sa saad sa Diyos nga kinabuhing dayon sa Paraiso sa yuta, siya midawat sa kopya sa librong Ikaw Mabuhing Walay Kataposan sa Paraiso sa Yuta ug gibasa ang tibuok publikasyon sa usa ka gabii. Sa mibisita siyag balik sa sister, miingon siya kaniya nga ang impormasyon maoy kahibulongan—lamang kon siya dunay pagsalig sa pagtuo niana. Ang sister nagpahayag nga siya nagkinahanglan sa pagtuon sa Bibliya ug sa pagtambong sa mga tigom sa Kingdom Hall. Ang pagtuon sa Bibliya gihikay, ug siya nagsugod sa pagtambong sa mga tigom. Siya nagpabawtismo sa tinglarag sa maong tuiga. Usa lamang ka tuig sa ulahi, iyang gipakaslan ang anak nga babaye niadtong sister kinsa nakahimog unang pamatuod kaniya. “Busa,” ang sister nagkanayon, “duha ang akong naagoman nga mao ang usa ka igsoong lalaki ug usa ka umagad pinaagi sa akong impormal nga pagpamatuod!”
Usa kini ka tinuod nga ang mga tigpangita ug kamatuoran mosanong sa dihang ang kamatuoran sa Bibliya mapaabot pinaagig impormal nga pagpamatuod. Sama sa giingon ni Jesus, ang iyang karnero magpatalinghog sa iyang tingog.