Sunda ang Pasidaan!

BANG! Niadtong Hunyo 3, 1991, uban ang naglanoglanog nga dinahunog, ang Mount Fugen sa Hapon nagbugwak sa nagaagos nga mga gas ug abo sa bolkan. Ang tuman-ka-init nga nagbagang lapok midagayday sa bakilid. Ang pagbuto nakapatay ug 43 ka tawo. Daghan kinsa diriyot nang mangamatay grabeng nangapaso. “Tubig, tubig, palihog,” tuaw sa pipila. Ang mga bombero ug mga polis natarantar sa pagtabang kanila.

DAAN nang namatikdan ang bundo sa laba sa tumoy sa Mount Fugen mga duha ka semanang sayosayo, busa nagbantay na ang mga awtoridad ug mga molupyo. Mga kapig usa ka semana una pa ang katalagman, gihatag na ang pahibalo aron sa pagpahawa sa maong lugar. Usa na lang ka adlaw sa wala pa ang pagbuto, gihangyo sa kapolisan ang mga membro sa prensa sa dili pagsulod sa wala-pasudling lugar. Bisan pa niana, niadtong malaglagong hapon didto sa peligrosong dapit ang 43 ka biktima.

Nganong daghan ang nangahas pag-adto sa dapit o sa pagpabilin didto? Ang pipila ka mag-uuma kinsa mibiya na sa ilang kabalayan namalik aron sa pagsusi sa ilang mga kabtangan ug kaumahan. Tulo ka bolkanologo naningkamot sa pagpaduol sa bolkan kutob sa mahimo aron sa pagtagbaw sa ilang akademikanhong interes. Daghang tigbalita ug mga letratista nangahas sa pagtabok sa wala-pasudling dapit kay gusto silang makakuhag kinaulahiang balita bahin sa kalihokan sa bolkan. Tulo ka drayber ug taksi nga gipakyaw sa prensa didto sa maong lugar. Ang mga polis ug boluntaryong mga bombero nagtrabaho. Ang matag usa dihay iyang rason sa pag-adto sa peligrosong dapit—ug ang resulta mao nga nakalas ang iyang kinabuhi.

Ikaw ba Anaa sa Peligrosong Dapit?

Mahimong kitang tanan wala magpuyo duol sa usa ka aktibong bolkan. Apan, unsa na man kon nag-atubang kitag tibuok-kalibotang katalagman, nga nagbutang kanatong tanan diha sa peligrosong dapit nga nagsakop sa tibuok-kalibotan? Ang basahon nga napamatud-ang usa ka kasaligang tinubdan sa matagnaong impormasyon nagpasidaan kanato bahin sa umaabot nga tibuok-kalibotang katalagman ug nagbatbat niana niining paagiha: “Ang adlaw mongitngit, ug ang bulan dili mohatag sa kahayag niini, ug ang mga bituon mangahulog gikan sa langit, ug ang mga gahom sa kalangitan mangatay-og. . . . Ang tanang tribo sa yuta magapukpok sa ilang kaugalingon sa pagminatay.” (Mateo 24:29, 30) Dinhi ang langitnong tilimad-on nga molukop sa uniberso gibatbat nga moapektar sa “tanang tribo sa yuta.” Sa laing pagkasulti, kining tagnaa nagtumong sa katalagman nga makaapektar kanatong tanan.

Kining basahon sa kasaligang tagna mao ang Bibliya. Makapaikag, ang konteksto sa gihisgotan sa ibabaw nga teksto sa kasulatan naghatag ug detalyadong kahubitan sa mga butang nga motultol ngadto sa tibuok-kalibotang kalamidad. Sama nga ang bundo sa laba ug ubang mga timailhan sa bolkan naghatag ug rason sa mga opisyal sa siyudad sa Shimabara sa pagtudlo ug usa ka peligrosong dapit, ang Bibliya naghatag kanatog mga rason sa pagbantay ug sa pagpangandam sa atong kaugalingon alang sa kaluwasan. Makakat-on kitag leksiyon gikan sa trahedya sa Mount Fugen ug makaila sa kaseryoso kon unsay anaa sa unahan.

[Picture Credit Line sa panid 2]

COVER: Yomiuri/Orion Press/Sipa Press

[Picture Credit Line sa panid 3]

Yomiuri/Orion Press/Sipa Press