Mga Kasal nga Dungganon sa Mata sa Diyos ug sa Tawo
“May kombira sa kasal sa Cana . . . Si Jesus ug ang iyang mga tinun-an gidapit usab sa kombira sa kasal.”—JUAN 2:1, 2.
1. Sa unsa nga ang asoy bahin kang Jesus sa Cana nagdani sa atong pagtagad?
SI Jesus, ang iyang inahan, ug pipila sa iyang mga tinun-an nakasinati sa kalipay nga ikahatag sa usa ka dungganong kasal taliwala sa katawhan sa Diyos. Gihimo pa gani ni Kristo nga talagsaon ang usa ka kasal pinaagi sa paghimo didto sa iyang unang natala nga milagro, nga nakadugang sa kalipay sa maong okasyon. (Juan 2:1-11) Tingali natagamtam na usab nimo ang kalipay sa pagtambong sa mga kasal sa mga Kristohanon nga nagtinguha sa pag-alagad kang Jehova ingong malipayong magtiayon. O tingali naglaom ka nga magmalamposon usab ang imong kasal o makatabang sa usa ka higala sa paghimo sa iyang kasal nga malamposon. Unsay makatabang aron magmalamposon ang kasal?
2. Unsang impormasyon bahin sa mga kasal ang anaa sa Bibliya?
2 Nakaplagan sa mga Kristohanon nga ang tambag diha sa inspiradong Pulong sa Diyos makatabang kaayo sa dihang ang usa ka lalaki ug babaye magplano sa pagpakasal. (2 Timoteo 3:16, 17) Tinuod, ang Bibliya wala maglatid ug detalyadong mga pamaagi kon unsaon pagpahigayon ang Kristohanong kasal. Masabot kana tungod kay ang mga kostumbre ug bisan ang legal nga mga kinahanglanon nagkalainlain depende sa dapit ug yugto sa panahon. Pananglitan, sa karaang Israel walay pormal nga seremonyas sa kasal. Sa adlaw sa kasal, dad-on sa pamanhonon ang iyang pangasaw-onon ngadto sa iyang balay o sa balay sa iyang amahan. (Genesis 24:67; Isaias 61:10; Mateo 1:24) Kining maong lakang nga makita sa kadaghanan maoy nagsilbing kasal, nga wala ang pormal nga seremonyas nga naandan diha sa daghang kasal karon.
3. Sa unsang okasyon sa Cana nga si Jesus nakadugang sa kalipay?
3 Giila sa mga Israelinhon nga ang maong lakang maoy nagsilbing kasal. Human niana, sila motambong tingali sa usa ka kombira agig selebrasyon, sama nianang gihisgotan sa Juan 2:1. Daghang bersiyon sa Bibliya ang naghubad nianang bersikuloha nga ingon niini: “Dihay kasal sa Cana.” Apan ang orihinal nga pinulongan haom nga hubaron ingong “kombira sa kasal” o “bangkete sa kasal.”a (Mateo 22:2-10; 25:10; Lucas 14:8) Giklaro sa maong asoy nga si Jesus mitambong ug nakadugang sa kalipay sa usa ka kombira nga gilangkit sa usa ka Hudiyohanong kasal. Apan, ang hinungdanong punto mao nga ang naglangkob sa kasal niadtong panahona lahi sa kon unsay naandan karon.
4. Unsang matanga sa kasal ang nagustoan sa pipila ka Kristohanon, ug ngano?
4 Diha sa daghang nasod karon, ang mga Kristohanon nga gustong magpakasal kinahanglang makakab-ot sa pipila ka legal nga mga kinahanglanon. Sa dihang mahimo na nila kini, mahimo silang magpakasal sa bisan unsang legal nga paagi. Mahimong kana maoy usa ka gamay, yano nga seremonyas nga himoon sa usa ka huwes, mayor, o ministro nga awtorisado sa Estado. Ang uban gustong magpakasal nianang paagiha, nga lagmit hangyoon ang pipila ka paryente o Kristohanong mga higala sa pagtambong ingong legal nga mga saksi o sa pagpakig-ambit lamang sa kalipay niining hinungdanong okasyon. (Jeremias 33:11; Juan 3:29) Sa samang paagi, ang ubang mga Kristohanon mopalabi tingali nga dili maghikay ug dakong kombira o salo-salo nga magkinahanglan ug dugayng pagplano ug dakong galastohan. Hinunoa, hikayon nila ang usa ka pribado nga pagpangaon uban sa pipila ka suod nga mga higala. Bisan unsa man ang atong gusto niining bahina, angay natong ilhon nga ang ubang hamtong nga mga Kristohanon lagmit may mga panglantaw usab nga lahi sa atoa.—Roma 14:3, 4.
5. Nganong daghang Kristohanon ang nagtinguha nga adunay pakigpulong sa ilang kasal, ug unsay nalakip niana?
5 Kadaghanan sa Kristohanong mga kaslonon mopalabi nga adunay binase-sa-Bibliya nga pakigpulong panahon sa ilang kasal.b Ilang giila nga si Jehova maoy nagmugna sa kaminyoon ug nagtagana diha sa iyang Pulong ug maalamong tambag kon sa unsang paagi ang kaminyoon molampos ug makahatag ug kalipay. (Genesis 2:22-24; Marcos 10:6-9; Efeso 5:22-33) Ug buot sa kadaghanang kaslonon nga ang ilang Kristohanong mga higala ug mga paryente makigbahin nianang malipayong okasyon. Apan, unsaon nato paglantaw ang nagkadaiyang legal nga mga kinahanglanon, pamaagi, ug bisan ang naandang lokal nga mga batasan? Kining artikuloha maghisgot sa mga kahimtang diha sa lainlaing dapit. Ang uban lahi tingali kaayo sa imong nahibaloan o sa kon unsay ginabuhat diha sa inyong dapit. Bisan pa niana, makamatikod ka ug pipila ka komon nga mga prinsipyo o mga bahin nga hinungdanon alang sa mga alagad sa Diyos.
Ang Dungganong Kaminyoon—Legal nga Kaminyoon
6, 7. Nganong magmainteresado kita sa legalidad sa kaminyoon, ug sa unsang paagi ikapakita nato kini?
6 Bisan tuod si Jehova maoy nagmugna sa kaminyoon, ang tawhanong mga kagamhanan may awtoridad usab ibabaw niadtong magpakasal. Nahiangay kini. Si Jesus miingon: “Ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Marcos 12:17) Sa samang paagi, si apostol Pablo nagsugo: “Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang sa ilang relatibong mga posisyon pinaagi sa Diyos.”—Roma 13:1; Tito 3:1.
7 Diha sa kadaghanang nasod si Cesar, o ang sibil nga awtoridad, maoy magtino kon kinsay angay nga magpakasal. Busa, kon magpakasal ang duha ka Kristohanon nga may kagawasang magminyo sumala sa Kasulatan, sila mosunod gayod sa lokal nga balaod. Mahimong mag-apil kini sa pagkuhag lisensiya, pagpakasal sa awtorisado-sa-Estado nga mangangasal, ug tingali pagparehistro sa kasal. Sa dihang gibaod ni Cesar Agusto ang ‘pagparehistro,’ si Maria ug Jose mituman, nga mipanaw paingon sa Betlehem “aron magparehistro.”—Lucas 2:1-5.
8. Unsa ka lig-on ang kaminyoon, ug unsang batasan sa mga Saksi ni Jehova ang nagbanaag sa maong pagsabot?
8 Sa dihang ang duha ka Kristohanon magpakasal sa paagi nga legal ug aprobado sa gobyerno, ang maong kaminyoon balido sa mga mata sa Diyos. Busa, ang mga Saksi ni Jehova dili magsubli-subli sa seremonyas pinaagi sa pagpahigayon ug nagkalainlaing legal nga mga seremonyas, ni sublion nila ang mga panumpa sa kaminyoon, atol sa ika-25 o ika-50 kaha nga anibersaryo sa magtiayon. (Mateo 5:37) (Ang pipila ka relihiyon dili modawat sa subay sa balaod nga sibil nga seremonyas sa kasal, nga nangangkon nga dili balido ang kasal gawas kon ang pari o klerigo ang mokasal.) Diha sa daghang nasod, ang gobyerno nag-awtorisar sa usa ka ministro sa mga Saksi ni Jehova sa pagkasal. Kon posible kana, lagmit himoon niya kini duyog sa usa ka pakigpulong sa kasal diha sa Kingdom Hall. Kana ang lokal nga dapit sa matuod nga pagsimba ug haom nga lokasyon sa usa ka pakigpulong bahin niining maong kahikayan, nga gimugna sa Diyos.
9. (a) Kon bahin sa sibil nga kasal, unsay mahimong buhaton sa usa ka Kristohanong kaslonon? (b) Sa unsang paagi ang mga ansiyano mahimong malangkit sa mga plano sa kasal?
9 Diha sa ubang mga nasod, ang balaod nag-obligar sa kaslonon sa pagpakasal diha sa buhatan sa gobyerno, diha kaha sa munisipyo, o atubangan sa tinudlong opisyal sa gobyerno. Ang mga Kristohanon subsob nga modesisyon nga sundan ang maong legal nga lakang ug pakigpulong sa kasal diha sa Kingdom Hall nianang adlawa mismo o pagkaugma. (Dili sila maghulat nga molabay ang daghang adlaw tali sa sibil nga seremonyas ug sa pakigpulong sa Bibliya, kay sila kasado atubangan sa Diyos ug sa tawo, lakip na sa Kristohanong kongregasyon.) Kon ang magtiayon nga nagpakasal ug sibil nagtinguha nga adunay pakigpulong diha sa usa ka Kingdom Hall, kinahanglang mananghid una sila sa mga ansiyano nga naglangkob sa Komite sa Pag-alagad sa Kongregasyon. Gawas nga susihon kon ang kaslonon maayo bag reputasyon, tinoon niining maong mga magtatan-aw nga ang eskedyul sa kasal dili makabalda sa regular nga mga tigom ug naeskedyul nga mga programa sa maong Kingdom Hall. (1 Corinto 14:33, 40) Susihon usab nila ang bisan unsang preparasyon nga gihangyo sa kaslonon nga himoon maylabot sa Kingdom Hall ug desisyonan nila kon ipahibalo ba sa kongregasyon nga gamiton kana.
10. Kon gibaod ang sibil nga kasal, sa unsang paagi makaapektar kini sa pakigpulong sa kasal?
10 Ang ansiyano nga naghatag sa pakigpulong sa kasal maningkamot sa paghimo sa diskusyon nga mahigalaon, makapalig-on sa espirituwal, ug dungganon. Kon ang magtiayon gihiusa na pinaagi sa sibil nga kasal, iyang ipatin-aw nga sila gikasal subay sa balaod ni Cesar. Kon wala nila litoka ang mga panumpa sa kaminyoon panahon sa sibil nga seremonyas, mahimong buhaton kana sa magtiayon panahon sa pakigpulong.c Kon ang maong sibil nga seremonyas naglakip ug mga panumpa apan ang bag-ong kasal gustong molitok sa ilang mga panumpa atubangan kang Jehova ug sa kongregasyon, himoon nila kana sa paagi nga magpaila nga nahimo na nila kana nga sayosayo pa, nga nagpakita nga sila ‘gihiusa na.’—Mateo 19:6; 22:21.
11. Diha sa pipila ka dapit, sa unsang paagi himoon ang kasal, ug unsay epekto niini diha sa pakigpulong sa kasal?
11 Diha sa pipila ka dapit, ang balaod dili tingali mag-obligar sa kaslonon sa pagpakasal pinaagig bisan unsang seremonyas, bisan atubangan sa usa ka opisyal sa gobyerno. Ang kasal mahitabo sa dihang mopresentar sila ug pinirmahan nga rehistro sa kasal ngadto sa usa ka opisyal. Human niana, marehistro na ang sertipiko sa kasal. Niining paagiha ang magtiayon isipon na ingong bana ug asawa, ug ang petsa diha sa sertipiko mao ang petsa sa ilang kasal. Sa nahisgotan na sa ibabaw, ang magtiayon nga gikasal nianang paagiha magtinguha tingali nga ang pagparehistro sa kasal sundan dayon ug binase-sa-Bibliya nga pakigpulong diha sa Kingdom Hall. Ang hamtong sa espirituwal nga brader nga napili sa paghatag sa pakigpulong mopahibalo sa tanang nanambong nga ang magtiayon nakasal na tungod sa bag-o pa nilang gihimo nga pagparehistro. Ang bisan unsang mga panumpa himoon sumala sa gilaraw diha sa parapo 10 ug sa potnot niini. Ang nanambong diha sa Kingdom Hall magmaya uban sa magtiayon ug makabenepisyo gikan sa tambag nga gihatag gikan sa Pulong sa Diyos.—Awit ni Solomon 3:11.
Tradisyonal ug Sibil nga mga Kasal
12. Unsa ang tradisyonal nga kaminyoon, ug unsay maayong buhaton human nianang matanga sa kasal?
12 Diha sa pipila ka nasod, ang lalaki ug babaye kaslon sa tradisyonal (o, tribonhon) nga paagi. Wala kini magtumong sa duha ka indibiduwal nga nag-ipon lamang pagpuyo, ni nagtumong kini sa pagpuyopuyo nga dinawat tingali diha sa pipila ka dapit apan dili legal nga kaminyoon.d Ang gihisgotan nato dinhi mao ang kasal nga gihimo sumala sa dinawat sa publiko nga kostumbre sa usa ka tribo o dapit. Mahimong maglangkit kini sa bug-os nga pagbayad ug pagdawat sa bugay, nga pinaagi niana ang kaslonon gikasal sumala sa balaod ug sa Kasulatan. Giisip sa gobyerno ang maong tradisyonal nga kasal ingong balido, legal, ug lig-on. Human niana, sagad nga posibleng iparehistro ang tradisyonal nga kasal nga gihimo, ug sa pagbuhat niana, ang magtiayon makadawat ug opisyal nga sertipiko. Ang pagparehistro makahatag ug legal nga proteksiyon sa magtiayon o sa asawa kon siya mabiyuda ug alang sa umaabot nga mga anak. Ang kongregasyon mag-awhag kang bisan kinsa nga magpakasal sa tradisyonal nga paagi sa pagparehistro dayon kutob sa maarangan. Makaiikag, mopatim-aw nga ilalom sa Moisesnong Balaod, ang mga kasal ug mga pagpanganak may opisyal nga talaan.—Mateo 1:1-16.
13. Human sa tradisyonal nga kaminyoon, unsay angayng buhaton maylabot sa pakigpulong sa kasal?
13 Ang magtiayon nga legal nga gihiusa sa tradisyonal nga paagi mahimong bana ug asawa sa dihang mahitabo ang maong kasal. Sa nahisgotan na, ang mga Kristohanon nga magpakasal nianang legal nga paagi magtinguha tingali nga himoon ang pakigpulong sa kasal, uban ang mga panumpa sa kasal, diha sa Kingdom Hall. Kon buhaton kana, ipahibalo sa mamumulong nga ang magtiayon gikasal na subay sa mga balaod ni Cesar. Usa lamang ka pakigpulong ang himoon. Usa lamang ang kasal, niining kahimtanga ang legal nga tradisyonal (tribonhon) nga kasal, ug usa ka pakigpulong nga pinasukad sa Kasulatan. Ang pagpahigayon nga magsunod kining duha ka bahin, mas maayo kon himoon sa samang adlaw, makatampo sa pagpasidungog sa Kristohanong kaminyoon diha sa komunidad.
14. Unsay mahimong buhaton sa usa ka Kristohanon kon parehong posible nga himoon ang tradisyonal ug sibil nga kasal?
14 Diha sa pipila ka dapit diin ang tradisyonal nga kaminyoon giisip nga legal, may mga kahikayan usab alang sa sibil (o, gilatid sa balaod) nga kasal. Ang sibil nga kasal subsob nga himoon atubangan sa usa ka opisyal sa gobyerno, ug mahimong maglakip kini sa paglitok sa mga panumpa sa kasal ug sa pagpirma sa rehistro. Ang pipila ka Kristohanong kaslonon mopalabi niining sibil nga kasal inay sa tradisyonal nga kasal. Dili kinahanglang himoon ang duha ka matang sa kasal aron malegal kini; ang matag pamaagi maoy legal. Ang giingon diha sa mga parapo 9 ug 10 bahin sa pakigpulong sa kasal ug sa mga panumpa mapadapat usab dinhi. Ang hinungdanon mao nga ang lalaki ug babaye gikasal sa paagi nga dungganon atubangan sa Diyos ug sa tawo.—Lucas 20:25; 1 Pedro 2:13, 14.
Hupting Dungganon ang Kaminyoon
15, 16. Sa unsang paagi ang kadungganan mahimong hinungdanong bahin sa kasal?
15 Sa dihang mitungha ang problema sa kaminyoon sa usa ka Persianong hari, ang pangulong magtatambag nga ginganlag Memucan naghatag ug mapuslanong tambag—‘nga ang tanang mga asawa magpasidungog sa ilang mga bana.’ (Ester 1:20) Sa Kristohanong kaminyoon, ang maong tambag dili kinahanglang imando pa ni bisan kinsang tawhanong hari; ang mga asawa buot nga magpasidungog sa ilang mga bana. Sa samang paagi, ang Kristohanong mga bana maghatag ug kadungganan sa ilang mga kapikas ug magdayeg kanila. (Proverbio 31:11, 30; 1 Pedro 3:7) Dili maayo nga palabyon una ang daghang katuigan una himoong dungganon ang atong kaminyoon. Kinahanglang madayag na kini sa sinugdan pa lamang, oo, sukad sa adlaw sa kasal.
16 Ang lalaki ug babaye—ang bana ug asawa—dili lamang maoy magpakitag kadungganan sa adlaw sa kasal. Kon ang usa ka Kristohanong ansiyano mohatag ug pakigpulong sa kasal, ang maong pakigpulong kinahanglang dungganon usab. Ang pakigpulong angayng itumong sa kaslonon. Ingong bahin sa pagpasidungog kanila, ang mamumulong dili maghisgot ug mga pakatawa o mga sugilanon sa kakaraanan. Kinahanglang dili niya iapil ang mga komento nga personal ra kaayo nga tungod niana maulawan ang kaslonon ug ang mga mamiminaw. Hinunoa, maningkamot siya nga mahimong mahigalaon ug makapalig-on, nga magpasiugda sa Tagmugna sa kaminyoon ug sa Iyang maayo kaayong tambag. Oo, ang dungganon nga diskurso sa kasal sa maong ansiyano adunay bahin sa kasal nga naghatag ug kadungganan kang Jehova nga Diyos.
17. Nganong adunay legal nga bahin sa Kristohanong mga kasal?
17 Lagmit namatikdan nimo niining artikuloha ang daghang punto bahin sa legal nga mga detalye sa kasal. Ang pipila ka bahin dili tingali direktang mapadapat sa inyong dapit. Bisan pa niana, kitang tanan kinahanglang mahibalo kon unsa ka hinungdanon nga ang mga kahikayan sa kasal taliwala sa mga Saksi ni Jehova magpakitag pagtahod sa lokal nga mga balaod, sa mga kinahanglanon ni Cesar. (Lucas 20:25) Si Pablo nag-awhag kanato: “Ibayad ngadto sa tanan ang mga nahiangay kanila, kaniya nga nangayog buhis, ang buhis; kaniya nga nangayog tributo, ang tributo; . . . kaniya nga nangayog dungog, ang maong dungog.” (Roma 13:7) Oo, haom nga ang mga Kristohanon, sugod sa adlaw sa kasal, magpasidungog sa kahikayan nga gihatag sa Diyos sa pagkakaron.
18. Unsang opsiyonal nga bahin sa kasal ang angayng hatagag pagtagad, ug asa nato makaplagan ang impormasyon bahin niana?
18 Daghang Kristohanong kasal ang sundan ug sosyal nga tipontipon—usa ka kombira sa kasal, pagpangaon, o salo-salo. Hinumdomi nga si Jesus mitambong sa usa nianang maong mga kombira. Kon adunay ingon niana nga salo-salo, sa unsang paagi ang tambag gikan sa Bibliya makatabang kanato sa pagseguro nga kana magpasidungog usab sa Diyos ug makahatag ug maayong reputasyon sa bag-ong kasal ug sa Kristohanong kongregasyon? Ang sunod nga artikulo maghisgot niana.e
[Mga footnote]
a Ang susamang pulong mahimong gamiton alang sa usa ka kombira nga walay kalabotan sa kaminyoon.—Ester 9:22, Septuagint.
b Ang laraw alang sa 30-minutos nga diskurso sa kasal nga nag-ulohang “Dungganong Kaminyoon sa Mata sa Diyos” maoy gigamit sa mga Saksi ni Jehova. Ang maayong Kasulatanhong tambag niini gikuha gikan sa librong Ang Sekreto sa Kalipay sa Pamilya ug sa ubang publikasyon sa mga Saksi ni Jehova. Ang diskusyon mapuslanon alang sa kaslonon ug sa tanan nga nanambong sa kasal.
c Gawas kon ang lokal nga balaod nagkinahanglan ug laing panumpa, ang mosunod nga mga panumpa nga nagpasidungog sa Diyos maoy gamiton. Alang sa pamanhonon: “Ako [ngalan sa pamanhonon] nagdawat kanimo [ngalan sa pangasaw-onon] ingong akong pinakaslang asawa, aron higugmaon ug mahalon sumala sa diyosnong balaod nga nahisulat sa Balaang Kasulatan alang sa Kristohanong mga bana, samtang kitang duha buhi dinhi sa yuta sumala sa kahikayan sa Diyos sa kaminyoon.” Alang sa pangasaw-onon: “Ako [ngalan sa pangasaw-onon] nagdawat kanimo [ngalan sa pamanhonon] ingong akong pinakaslang bana, aron higugmaon ug mahalon ug tahoron pag-ayo, sumala sa diyosnong balaod nga nahisulat sa Balaang Kasulatan alang sa Kristohanong mga asawa, samtang kitang duha buhi dinhi sa yuta sumala sa kahikayan sa Diyos sa kaminyoon.”
d Ang The Watchtower sa Mayo 1, 1962, panid 287, naghatag ug mga komento bahin sa pagpuyopuyo.
e Tan-awa usab ang artikulong “Pauswaga ang Kalipay ug Dignidad sa Imong Adlaw sa Kasal,” sa panid 28.
Nahinumdom Ka Ba?
• Nganong magmainteresado kita sa legal ug espirituwal nga bahin sa mga kasal?
• Kon ang duha ka Kristohanon kaslon diha sa usa ka sibil nga seremonyas, unsay mahimong ipahigayon nila human niana?
• Nganong ang mga pakigpulong sa kasal himoon diha sa Kingdom Hall?
[Hulagway sa panid 18]
Sa kasal sa karaang Israel, dad-on sa pamanhonon ang pangasaw-onon sa iyang balay o sa balay sa iyang amahan
[Hulagway sa panid 21]
Human sa tradisyonal nga kaminyoon, ang mga Kristohanon magtinguha tingali nga may mohatag ug pakigpulong sa kasal diha sa Kingdom Hall