“Ang Sekreto” nga Among Nakat-onan sa Pag-alagad sa Diyos

Sumala sa giasoy ni Olivier Randriamora

“Ako makamao gayong magkinabuhi sa kawalad-on, ako makamao gayong magkinabuhi sa kadagaya. Sa tanang butang ug sa tanang kahimtang nakat-onan ko ang sekreto kon unsaon pagkabusog ug kon unsaon pagkagutom . . . Sa tanang butang ako adunay kusog pinaagi kaniya nga naghatag ug gahom kanako.”—Filip. 4:12, 13.

NADASIG gyod mi sa akong asawa nga si Oly sa giingon ni apostol Pablo. Sama kaniya, among nakat-onan “ang sekreto” pinaagi sa pagsalig kang Jehova sa bug-os samtang nag-alagad Kaniya dinhi sa Madagascar.

Trato na mi ni Oly dihang nagtuon sa Bibliya ang iyang inahan uban sa mga Saksi ni Jehova sa 1982. Nagtuon sab ko sa Bibliya, ug sa ulahi si Oly miduyog nako. Nagminyo mi sa 1983, nabawtismohan sa 1985, ug nag-oksilyare payunir dayon. Pagka-Hulyo 1986, nagregular payunir mi.

Sa Septiyembre 1987, nahimo ming espesyal payunir. Ang una namong asaynment mao ang gamayng lungsod sa amihanan-kasadpan sa Madagascar diin wala pay kongregasyon. Dunay mga 18 ka dagkong tribo ug dili maihap nga ginagmayng tribo sa Madagascar, ug lahi-lahi ang ilang kostumbre ug tradisyon. Malagasy ang opisyal nga pinulongan, apan duna pay laing mga diyalekto. Among gitun-an ang diyalekto sa bag-o namong asaynment, ug tungod niana dali ra ming nadawat sa komunidad.

Sa sinugdan, kada Dominggo ko magpakigpulong, dayon mopakpak si Oly pagkahuman. Duha ra mi nga magtigom. Kompleto sab ang among Teokratikanhong Tunghaan sa Ministeryo, diin si Oly makig-estorya sa hinanduraw nga tagbalay. Maayo gani kay pagduaw sa magtatan-aw sa sirkito, misugyot siya nga usbon namo ang paagi sa pagtigom!

Kay dugay man moabot ang mga sulat, dili dayon namo madawat ang among alawans kada bulan. Busa nakakat-on mi sa pagdaginot. Dihay higayon nga wala na mi ikaplete paingon sa sirkitong asembliya, nga mga 130 kilometros ang gilay-on. Nahinumdom mi sa gitambag sa usa ka brader: “Iampo kang Jehova ang inyong problema. Hinumdomi nga iyang buluhaton ang inyong gihimo.” Busa nag-ampo mi ug midesisyon nga magbaktas na lang. Apan sa hapit na ming molakaw, may brader nga miabot ug gihatagan mig kuwarta nga igo gyong ikaplete sa bus!

SIRKITONG BULUHATON

Sa Pebrero 1991, nahimo kong magtatan-aw sa sirkito. Niadtong tungora, miuswag na ang among gamayng grupo ngadto sa 9 ka magmamantala, 3 niana ang bawtismado, ug mga 50 ang tigtambongan sa tigom. Human sa akong pagbansay, nag-alagad mi sa usa ka sirkito sa Antananarivo, ang kaulohang siyudad. Pagka-1993, gibalhin mig laing sirkito, sa sidlakang bahin sa nasod. Lahi kaayo ang kinabuhi didto kon itandi sa siyudad.

Aron makaabot sa mga kongregasyon ug sa hilit nga mga grupo, magbaktas mi usahay ug mga 145 kilometros agi sa mga bukid nga bagag kalasangan. Gamay ra mig dad-on. Apan kon may slide show ang pakigpulong sa magtatan-aw sa sirkito, mas bug-at ang among dala. Si Oly ang magbitbit sa projector, ug ako sa 12-volt nga baterya sa awto.

Sagad magbaktas mig 40 kilometros sa usa ka adlaw aron makaabot sa sunod nga kongregasyon. Motungas ug molugsong mi sa mga bukid, motabok ug mga suba, ug motaak sa lapok. May mga higayon nga anha ra mi matulog daplin sa dalan, apan sagad maningkamot ming makaabot ug baryo aron mangitag kasak-an sa gabii. Usahay mohangyo mi sa mga tawong dili namo kaila nga sa ila mi magpalabay sa gabii. Kon duna nay kasak-an, maghikay na mig panihapon. Si Oly manghulam ug kaldero ug magkalos ug tubig sa duol nga suba o lanaw. Ug ako manghulam ug atsa aron magbughag isugnod. Dugay pa ming makaluto. Usahay, mopalit mig manok nga amo pang ihawon ug hinloan.

Human sa panihapon, magkalos pa mig tubig pangkaligo. Usahay sa kosina mi matulog. Kon moulan, mopidpid mi sa bungbong aron dili matuloan.

Sangyawan gyod namo ang tag-iya sa balay nga among masak-an. Inig-abot namo sa among destinasyon, matandog gyod mi sa kaayo ug kamaabiabihon sa mga igsoon. Kay gipabilhan nila pag-ayo ang among pagduaw, balewala ra namo ang lisod nga pagbiyahe.

Kon moestar mi sa balay sa igsoon, tabangan namo sila sa buluhaton sa balay aron makauban sila sa pagsangyaw. Wala mi magpabug-at o mangayog pagkaon nga dili ikatagana sa mga igsoon.

PAGDUAW SA HILIT NGA MGA GRUPO

Ganahan ming moduaw sa hilit nga mga grupo, diin ang mga igsoon nag-eskedyul ug daghang kalihokan. Halos di na mi kapahulay. (Mar. 6:31) Sa usa ka dapit, giimbitar sa magtiayong Saksi ngadto sa ilang balay ang mga 40 nila ka Bible study aron makaapil mi sa pagtuon. Giubanan ni Oly ang sister sa pagdumalag mga 20 ka study, ug ang laing 20 gidumala namo sa brader. Inigkahuman sa usa ka study, mosunod dayon ang lain. Moundang lang mi para sa tigom sa kongregasyon, unya mopadayon na pod sa pag-study. Pasado alas otso sa gabii na mi mahuman!

Sa laing grupo nga among giduaw, migikan mig mga alas otso sa buntag paingon sa silingang baryo. Nag-uranay lang ming tanan. Kay layo man ang among baktason agi sa kalasangan, udto na ming nakaabot sa teritoryo. Humag ilis, nanangyaw dayon mi. Daghan ming nanangyaw apan diyutay lang ang kabalayan. Mao nga nahuman namo ang teritoryo sa tunga lang sa oras. Dayon miadto na pod mi sa laing baryo. Human namog sangyaw didto, layo kaayo ang among gibaktas pauli. Sa sinugdan, mibati mig kaluya kay dako kaayong panahon ang gigugol sa pagbaktas apan mga usa lang ka oras sa pagpamalaybalay. Pero wala ra moreklamo ang mga igsoon ug madasigon gihapon sila.

Ang usa ka grupo sa Taviranambo halos atua na sa tumoy sa bukid. May pamilyang Saksi didto nga nagpuyo sa gamayng balay. Duna poy laing balay sa duol nga gihimo nilang tigomanan. Dayon, kalit lang misinggit ang brader nga among gisak-an, “Mga igsoon!” May mitubag sa pikas bukid, “Unsa man?” Misinggit pag-usab ang brader, “Nia nang CO!” Dayon may mitubag, “Maayo!” Lagmit gipahibalo pod nila ang uban nga tua pa gyod sa layo. Wala madugay, nangabot ang mga tawo, ug kapig 100 ang nanambong sa tigom.

KALISDANAN SA PAGBIYAHE

Sa 1996 naasayn mi sa usa ka sirkito diha sa tungatunga sa kabukiran, duol sa Antananarivo. Lahi ang kalisdanan dinhi. Talagsa ra ang biyahe paingon sa hilit nga mga lugar. Eskedyul namong duawon ang usa ka grupo sa Beankàna (Besakay), mga 240 kilometros gikan sa Antananarivo. Human masabot ang drayber sa gamayng trak nga paingon didto, misakay mi. May mga 30 pa ka laing pasahero, ang uban tua sa atop ug ang uban nagkabyon sa likod.

Sama sa kasagarang mahitabo, naaberiya ang trak maong nagbaktas na lang mi. Human sa pipila ka oras nga pagbaklay, may dakong trak nga miabot. Puno na kinig tawo ug karga, apan gihunongan gihapon mi. Misakay mi bisag magtindog lang. Pag-abot namo sa usa ka suba, ang tulay giayo pa. Busa nagbaktas na pod mi hangtod nakaabot sa gamayng baryo diin dunay nagpuyong mga espesyal payunir. Bisag walay eskedyul nga duaw, miduyog mi nila sa pagsangyaw samtang nagpaabot nga maayo ang tulay ug may laing trak nga moagi.

Usa pa ka semana ang milabay una miabot ang laing trak, ug mipadayon mi sa biyahe. Dagko kaayo ang libaong ug kanunay ming magtulod sa trak diha sa tagatuhod nga tubig, diin sagad mapandol ug matumba mi samtang nagtulod. Kadlawon na ming miabot sa usa ka gamayng baryo, ug didto mi nanaog. Nagbaktas na pod mi agi sa pilapilan nga tagahawak ang tubig paingon sa among destinasyon.

Kadto ang una namong pagduaw sa maong lugar, busa nakahunahuna mi nga sangyawan ang mga tawo diha sa basakan ug mangutana kon duna ba silay kailang mga Saksi. Nalipay kaayo mi kay mga Saksi diay sila!

PAGDASIG SA UBAN NGA MAGPAYUNIR

Latas sa katuigan, gikalipay namo pag-ayo ang resulta sa among pagdasig sa uban nga magpayunir. Samtang nagbisita sa usa ka kongregasyon nga may siyam ka regular payunir, gidasig namo ang matag payunir nga motabang ug usa ka magmamantala nga magpayunir usab. Pagkasunod namong duaw unom ka bulan sa ulahi, 22 na ang ilang regular payunir. Nadasig sa duha ka payunir nga sister ang ilang mga amahan, nga parehong ansiyano, nga magregular payunir. Nadasig pod niining duha ka ansiyano ang lain pang ansiyano nga magpayunir usab. Wala madugay, ang ikatulong ansiyano nahimong espesyal payunir. Sa ulahi, siya ug ang iyang asawa anaa na sa sirkitong buluhaton. Komosta ang duha ka ansiyano? Ang usa nahimong magtatan-aw sa sirkito, ug ang lain boluntaryo sa pagpanukod ug Kingdom Hall.

Adlaw-adlaw ming nagpasalamat sa tabang ni Jehova kay nahibalo nga wala mi mahimo sa amo rang kaugalingon. Tinuod, maluya ug masakit mi usahay, apan malipay mi dihang mamalandong sa resulta sa among ministeryo. Gipalambo gyod ni Jehova ang iyang buluhaton, ug dako ang among kalipay nga nakaambit niana. Karon nag-alagad mi ingong mga espesyal payunir. Oo, among nakat-onan “ang sekreto,” pinaagi sa pagsalig kang Jehova, kinsa “naghatag ug gahom” kanamo.

[Blurb sa panid 6]

Among nakat-onan “ang sekreto” pinaagi sa pagsalig kang Jehova

[Mapa/Mga hulagway sa panid 4]

Ang Madagascar, nga gitawag ug Dakong Pulang Isla, mao ang ikaupat nga kinadak-ang isla sa kalibotan. Pula ang yuta dinhi, ug daghang talagsaong tanom ug hayop

[Hulagway sa panid 5]

Malipay ming moapil sa pag-Bible study

[Mga hulagway sa panid 5]

Lisod kaayo ang pagbiyahe