3 Tabang sa Pagsagubang sa mga Problema

DUGAY NANG SAKIT

Si Rose miingon: “Tungod sa akong genetic disorder, grabe ug walay hunong ang akong gibating sakit. Dili na malipayon ang akong kinabuhi.” Usa sa iyang gikabalak-an pag-ayo mao nga siya dili usahay makasentro sa iyang hunahuna diha sa iyang pagtuon ug Bibliya ug sa iyang mga buluhaton maylabot sa pagsimba. Pero nakatabang kaayo niya ang giingon ni Jesus sa Mateo 19:26: “Sa Diyos ang tanang butang posible.” Nahibaloan ni Rose nga daghag paagi ang pagtuon. Tungod sa kasakit nga iyang bation, dili siya makalahutay ug basa, busa maminaw na lang siyag mga rekording sa Bibliya ug sa binase sa Bibliya nga mga basahon.a “Kon wala pa kini,” siya miingon, “wala koy mahunahunaang paagi kon unsaon nako pagpalig-on ang akong espirituwalidad.”

Dihang maguol si Rose kay dili na niya mahimo ang mga butang nga mahimo niya kaniadto, makapahupay niya ang giingon sa 2 Corinto 8:12: “Kon ang pagkaandam anaa nang daan, kini ilabinang dalawaton sumala sa nabatonan sa usa, dili sumala sa wala kaniya.” Pinaagi niining mga pulonga, nasabtan ni Rose nga ang Diyos nalipay gihapon kaniya, kay gihimo niya ang tanan niyang maarangan.

KAGUOL

Si Delphine, nga nahisgotan na, miingon: “Sa namatay ang akong 18 anyos nga anak nga babaye, naguol ko pag-ayo nga daw dili na ko makaagwanta. Dili na gyod mabalik ang nangagi.” Pero nahupay siya pag-ayo sa Salmo 94:19, diin ang salmista miingon sa Diyos nga dihang siya nabalaka pag-ayo, siya gihupay ug gilipay Niya. Si Delphine miingon, “Nag-ampo ko kang Jehova nga tabangan ko niya nga makakitag mga buluhaton nga makapahupay nako.”

Gigamit niya iyang panahon sa pag-alagad ingong boluntaryo. Siya miingon nga sama siyag krayola, nga bisan ang mga bali magamit gihapon sa pagkolor. Sa samang paagi, bisag mibati siya nga daw nabali, iyang nakita nga makatabang gihapon siya sa uban. Siya miingon: “Nakita nako nga kon mogamit kog mga prinsipyo sa Bibliya sa paghupay sa mga tawo nga akong gitudloan ug Bibliya, paagi kana ni Jehova sa paghupay ug paglipay kanako.” Naghimo siyag listahan sa mga karakter sa Bibliya nga nakasinatig grabeng kaguol. “Silang tanan maoy mga tawong mainampoon,” siya miingon. Nakat-onan sab niya nga “dili ka makakitag tubag kon dili nimo basahon ang Bibliya.”

Dunay laing nakat-onan si Delphine sa iyang pagtuon ug Bibliya​—sa paghunahuna sa umaabot, dili sa nangagi. Ang paglaom nga gihisgotan sa Buhat 24:15 nakahupay kaniya: “Aduna unyay pagkabanhaw sa mga matarong ug sa mga dili-matarong.” Unsa siya ka segurado nga banhawon ni Jehova ang iyang anak nga babaye? Si Delphine miingon: “Makita nako ang akong anak sa umaabot. Duna nay petsa ang among sunod nga ‘pagpanuroy’ sa tinudlong panahon ni Jehova. Makita nako nga kaming duha anaa sa among garden nga sama ka klaro sa adlaw nga siya gipanganak diin ako siyang nakita ug gimahal.”