Pagtanyag sa Maayong Balita—Nagapasiugda sa Ang Bantayanang Torre
1 Ang kahibalo bahin sa Diyos ug sa iyang Anak, si Jesu-Kristo, maoy mas hinungdanon kay sa bulawan o salapi. (Prov. 8:10) Ngano? Kay kana motultol man sa kinabuhing dayon. (Juan 17:3) Apan, ang tukmang kahibalo dili man mabatonan kon walay personal nga panlimbasog. Dili ikatingala nga si Salomon miingon: “Kon padayon mo kanang pangitaon . . . , nianang kahimtanga imong masabtan ang kahadlok kang Jehova, ug imong makaplagan ang kahibalo gayod sa Diyos.”—Prov. 1:7; 2:4, 5.
2 Ang bililhong kahibalo kang Jehova moabot kanato pinaagig nunot-panahong mga artikulo nga gipatik diha sa Ang Bantayanang Torre. Pagkadakong pribilehiyo nga atong nabatonan sa pagpaambit niining hinungdanong impormasyon ngadto sa uban! Sa Abril ug Mayo, ang usa ka serye sa mga artikulo maylabot sa pagyagyag sa Bantogang Babilonya ug sa iyang kalaglagan igapasiugda.
UNSA MAY ATONG IKAPASIUGDA
3 Ang mga gula sa Abril sa Ang Bantayanang Torre magasusi sa ilhanan sa Bantogang Babilonya. (Pin. 17:5) Human ikapaila ang imong kaugalingon, pukawa ang interes sa tagbalay diha sa gula sa Abril pinaagig pag-ingon: “Sukad sa unang siglo, ang mga tawo nalibog sa mga panan-awon diha sa basahon sa Pinadayag. Ang usa sa labing misteryoso mao kanang iya sa bigaong Babilonya nga Bantogan diha sa Pinadayag 17 ug 18. Unsa man ang gisimbolohan niini nga Babilonya? Uban sa tabang niining artikuloha ‘Usa ka Misteryo—Kinsa ang Bigaong Babilonya nga Bantogan?’ ikaw makadiskobre sa tubag.” Pinaagig dili pagtubag sa maong pangutana, hayan mabutad ang pagtagad sa maong tawo.
4 Diha sa Abril 15 nga gula, ang artikulong “Babilonya nga Bantogan Mao ang Bigaon” nagpatin-aw kon unsa ang gipasabot sa espirituwal nga pagkabigaon. Ang “Balaang Hustisya” nga pakigpulong sa kombensiyon bahin sa “Ang Daotang Bigaon” ug ang Resolusyon gilakip usab. Mosukna ug makapalihok-hunahuna nga mga pangutana sama sa: Ngano ang Babilonya gitunglo gayod sa hilabihan diha sa Bibliya? Sa unsang paagi ang iyang kalaglagan mag-apektar sa atong kaliwatan ug sa imong kaugmaon? Hinumdomi nga padayong himoong yano ang presentasyon ug laktod sa punto, nga ibungat kana sa 30 ngadto sa 60 ka segundos.
MAGPLANONG ABANTE
5 Maayong ipasiugda ang tanang lima ka Sabado ingong mga adlaw sa magasin sulod sa Abril sanglit kay aduna man kitay hinungdanong mga magasin nga igatanyag. Ang dakong sirkulasyon niining nunot-panahong mga gula gikinahanglan aron ipalanog ang pasidaan alang sa tanan sa pagpatalinghog.—Isa. 61:2; Pin. 18:4, 5.
6 Magsugod sa Abril ang bag-ong kampanya sa suskrisyon sa Bantayanang Torre. Dili pareho sa mubong presentasyon nga atong himoon sa adlaw sa magasin, gusto tang gamiton ang Ulohan nga Mahisgotan sa dihang motanyag sa suskrisyon.
7 Ikaw ba bug-os nga nagapabili sa nagalabaw nga kahinungdanon sa Ang Bantayanang Torre? Pinaagig pagpanagtag niana, kita aduna ing pribilehiyo sa pagpasidaan sa mga nasod sa kalaglagan sa Bantogang Babilonya.