Pagpakitag Pagsalig Kang Jehova Pinaagig Payuniring
1 Ang pangagpas una sa intereses sa Gingharian nagakinahanglan ug pagsalig kang Jehova. (Sal. 56:11; Prov. 3:5; Mat. 6:33) Kinahanglang atong ipahilayo ang atong hunahuna gikan nianang giisip sa kalibotan nga importante ug diha ipunting kana sa espirituwal nga mga bahandi. Samtang ang kalibotan madani ngadto sa kailibgon sa materyal nga mga butang, si Jehova nagahangyo kanato nga magmatagbaw uban sa importante gayong mga butang.—1 Tim. 6:8; Filip. 1:10.
2 Kini ilabinang usa ka hagit ngadto sa Kristohanong mga batan-on kinsa gustong sa tininuod tumanon ang mga sugo ni Jehova. Mahimong pit-oson sila sa ilang mga magtutudlo ug sa ilang mga eskolmet kinsa nagatagad sa mas taas nga edukasyon nga hinungdanon sa kalamposan sa kinabuhi. Samtang nagaila nga sila adunay mga panginahanglan sa materyal, daghang Kristohanong mga batan-on nagasukol sa maong pagpit-os ug nagapili sa payunir nga ministeryo ingong ilang karera. Nga nagasalig sa mga saad ni Jehova, sila nagatutok ngadto kaniya sa pag-atiman sa ilang mga kinahanglanon.—Sal. 62:2; 68:19; 1 Tim. 5:8; 6:9, 10.
SUBLIANG PERSONAL NGA MGA KAHIMTANG
3 Ang The Watchtower sa Nobyembre 15, 1982 nagdasig sa matag usa kanato sa pagsukna: “Ako ba aduna gayoy kapasikaran atubangan kang Jehova sa punto nga ako dili payunir?” Daghan niadto ang wala sa kahimtang nga makapayunir. Apan sila wala maluya, sa pagkahibalo nga ang tibuok-kasingkasing nga pag-alagad sa bisan unsang gidak-on kanunay mang madawat kang Jehova. (Miq. 6:8; 2 Cor. 8:12) Sa ulahi, samtang ang mga kahimtang nausab, ang mainampoong pagtagad sa maong 1982 nga artikulo sa Watchtower napaarang sa uban sa pagkahimong apil sa mga linibo nga sa di pa dugay mingsulod sa regular payunir nga pag-alagad.
4 Kon ang personal nga mga kahimtang nagpapugong kanimo sa pagpayunir sa gipatik ang maong pahayag niadtong 1982, ang imo bang mga kahimtang nausab na? Sa Pilipinas, dihay 3,417 ka aplikasyon sa payunir ang giatiman sa 1989 nga tuig sa pag-alagad! Sa walay duhaduha daghan niining mga aplikante gustong mahimong mga payunir sa miagi apan kinahanglang mohulat alang sa kausaban sa personal nga mga sirkumstansiya.
5 Sa pipila ka hitabo, ang gikinahanglang kausaban hayan maylabot sa panghunahuna sa usa bahin sa payunir nga pag-alagad. O kaha nagalangkit lang sa paghimog maayong eskedyol sa pag-alagad. May mga panahon nga ang kausaban sa personal nga mga responsabilidad ug mga obligasyon mao ang gikinahanglan aron mabuksan ang dalan sa payunir nga pag-alagad. Busa, maoy maayo nga himoon kining regular nga butang sa pag-ampo ngadto kang Jehova uban sa tininuod nga pagtimbangtimbang sa atong kaugalingon ug sa atong mga kahimtang. Mga linibo ang naghimo niini ug karon nagakalipay na sa mga panalangin sa payunir nga pag-alagad.
6 Kon ang prangka nga pagtino sa imong mga kahimtang nagabutyag nga ikaw makasugod sa pagpayunir sa dili madugay, nganong dili mosugod sa oksilyare nga pagpayunir karon sa regular nga paagi? Ang Abril ug Mayo maoy ekselenteng mga bulan sa pagsugod niini, ug kini mohatag kanimo ug higayon sa pagtino kon ikaw makakab-ot ba sa mga kinahanglanon sa regular payunir sa umaabot. Sulod sa pipila ka bulan ikaw gayod makaugmad na ug mga balikduaw ug mga pagtuon sa Bibliya. Kini motabang kanimo sa paghimog hanoy nga pagsaylo ngadto sa regular payunir nga pag-alagad, posibleng sa dili pa ang pagsugod sa bag-ong tuig sa pag-alagad sa Septiyembre.
7 Si Jehova nagapalampos sa dagkong mga butang sa kataposang mga adlaw sa karong sistema sa mga butang. Karon na ang panahon alang kanatong tanan sa pagpaduol kaniya ug sa pagbulahan sa iyang ngalan sa “tibuok adlaw.” (Sal. 145:2; Sant. 4:8) Ang mga payunir maoy manguna niining dakong buluhaton, nga sa miaging tuig nagreport ug 69% sa total nga oras ug 71% sa total nga mga pagtuon sa Bibliya sa Pilipinas. Busa kon ang imong mga kahimtang magatugot kanimo sa pagbuhat niana ug ikaw takos man, tugoting ang payunir nga pag-alagad mahimong laing pamatuod nga ikaw nagasalig kang Jehova ug dili diha sa imong kaugalingong kusog. Kita nagalantaw sa pag-abiabi sa daghan pa ngadto sa ranggo sa payunir sa 1990!—Sal. 94:18.