Pagpadayon sa Atong Ministeryo nga Walay Hunong
1 Ang talan-awon niining kalibotana daling nagakausab samtang hinapos na gayod kita sa panahon sa kataposan. (1 Cor. 7:31) Sa katumanan sa tagna sa Bibliya ang nagauyog-kalibotan nga mga hitabo nagakahitabo. Samtang kita mamalandong kon unsa ang mahitabo sa kalibotan sa atong palibot ug sa sulod sa teokratikanhong organisasyon, atong maapresyar ang pagkadinalian nga kita mosangyaw sa “maayong balita” sa Gingharian.—Mar. 13:10.
2 Mao si Jesu-Kristo, ang nagsugo sa paghimog mga tinun-an. (Mat. 28:19, 20) Ang mga tinun-an ni Jesus midawat sa iyang pulong nga tininuod, ug bisan nakasugamak ug dakong pagsupak, “sila nagpadayon nga walay hunong sa pagpanudlo ug sa pagmantala sa maayong balita bahin kang Kristo, Jesus.” (Buh. 5:42) Pagkamaayo kaayong panig-ingnan nga ilang gipasunod kanato!
3 Samtang basahon ta ang 1990 Yearbook, atong makita nga si Jehova nagpanalangin sa atong ministeryo pinaagig pagpatunghag maayo kaayong mga pag-uswag diha sa bag-ong mga tinun-an. Sa pipila ka kayutaan ang mga pag-uswag nga gitaho maoy talagsaon. (Isa. 60:22) Apan komosta man ang atong lokal nga teritoryo? Ug komosta man ang atong tinagsatagsa nga ministeryo? Kita ba nagapadayon sa atong tinagsatagsa nga panlimbasog diha sa ministeryo nga walay hunong?
ATONG TINAGSATAGSA NGA BAHIN
4 Dayag gayod, dili tanang teritoryo nga parehong mabungahon. (Itandi ang Mateo 13:23.) Adunay daghang magsusupak sa pipila ka dapit, ug sa ubang lugar ang katawhan sa kasagaran maoy walay pagtagad ug walay sanong sa mensahe sa Gingharian. Sa uban pang mga dapit, adunay daghan kaayong mamumuo sa kanataran nga gamay nang teritoryo ang kobrehanan. Apan unsa man ang matang sa teritoryo nga kita nagasangyaw, ang atong kasibot dili gayod mohinay. Ang apostol nga si Pablo misulat, “Dili kita mohunong sa pagbuhat sa maayo, kay sa tinong panahon kita magaani kon kita dili magakaluya.” (Gal. 6:9) Unsa man ang moabag kanato sa pagpadayon sa atong ministeryo nga walay hunong?
5 Kita makapabiling aktibo ug mahimong malamposon ang atong ministeryo kon kita mosalig kang Jehova ug modepende sa iyang gahom sa pagsustener kanato. Kanunay nga hinumdoman nga si Jehova mao ang nagahimo nga mabungahon ang umahan. (1 Cor. 3:6) Sa pagtubag sa atong mga pag-ampo alang sa panabang, si Jehova motagana ug tambag, mapuslanong instruksiyon, ug dagayang suplay sa literatura sa Bibliya alang sa atong personal nga paggamit ug sa pagbulig sa uban nga makaila kaniya. Kita ba bug-os nga nagapahimulos niining mga taganaha?
PADAYONG HUPTI ANG HUSTONG TINAMDAN
6 Kon kita adunay negatibong tinamdan, kana mahimong grabeng babag sa mabungahong ministeryo. Kanang tinamdana mabanaag diha sa tonada sa atong tingog, panagway, ug kakulang sa makugihong pangandam alang sa pag-alagad sa kanataran. Nadawat ta ang sugo sa pagsangyaw ug pagpanudlo, ug wala pa kita sultihi nga nahuman na ang buluhaton. Ang atong tinguha nga magmasinundanon ug mapasinakopon sa balaang pagtultol magpalihok gayod kanato sa pagpadayon sa atong ministeryo nga walay hunong.
7 Mopadayon kita sa pagpakig-ambit sa kangaya sa ministeryo ug sa paglantaw sa dumalayong mga panalangin taliwala sa katawhan sa Diyos kon kita mopasundayag sa atong pagtuo ug gugma pinaagig pakig-ambit sa ministeryo nga walay hunong.