Pangutana

● Unsa ang panglantaw sa mga Saksi ni Jehova sa ‘tape recordings’ nga nagsumikad sa ubang tinubdan nga dili iya sa Sosyedad?

Ang Sosyedad nagatagana ug dagaya espirituwal nga pagkaon sa lainlaing paagi, apil ang cassette tape recordings. Nagalakip kini sa ‘recordings’ sa Bibliya, ‘Kingdom melodies’ ug mga pipila ka drama. Apan gikinahanglan tang magbaton ug pagkamabinantayon maylabot sa pribadong ‘tape recordings’ nga kaylap ug nga maorag susama ang kinaiya.

May mga panahon nga ang girekord nga mga pakigpulong nga gipakatap nagapatugbaw ug espekulasyon o banabana ug makapaukay-balatian nga impormasyon. Di ba maalamon hinuon nga sundon ang tambag ni Pablo sa 2 Timoteo 3:14? Dinha si Pablo, human makapasidaan bahin sa mga impostor (suwitik), nagpasiugda sa importansiya sa pag-ila sa mga tawo nga ginapatalinghogan. Gikinahanglan tang paneguroon nga dili kita magpatalinghog sa bisan unsa nga “saylo na sa mga butang nga nahisulat” diha sa Balaang Kasulatan ug sa espirituwal nga pagkaon nga gitagana sa “matinumanon ug maalamong ulipon.”​—1 Cor. 4:6; Mat. 24:45-47.

Ang pipila ka tawo hayan maghimog ‘tape recordings’ sa mga miting sa kongregasyon o asembliya ug kombensiyon nga mga programa alang sa ilang personal nga paggamit. Ang maong ‘recordings’ mahimong pabilhan usab sa mga membro sa kongregasyon kinsa sa pipila maayong rason wala makatambong sa mga tigom. Apan, kini gayod dili ipang-apod-apod taliwala sa mga igsoon sa kasagaran o ibaligya ngadto sa uban. Hinaot nga bug-os nga gamiton ta ang tanan nga gitagana ni Jehova pinaagi sa iyang kapunongan alang sa atong espirituwal nga kadasig ug kalig-on.