Pagtanyag sa Librong Pinadayag
1 Tungod sa atong makuyaw nga mga panahon, daghang tawo ang nalibog ug nangandoy alang sa makatagbawng mga tubag bahin sa umaabot. Nan, pagkatukma gayod nga dasigon ta sila sa pagbasa sa librong Pinadayag! Kining basahona nagatanyag ug balaang paggiya pinaagig pagsaysay sa mga hitabo sa atong adlaw sa kahayag sa mga tagna sa Pinadayag. Ang mosunod maoy pipila ka sugyot nga atong magamit sa dihang nagatanyag niini ngadto sa katawhan niining bulana.
2 Alang Kanilang Mahiligon sa Relihiyon: Dugang ug dugang katawhan ang nagatuon sa Bibliya karong adlawa. Sa dihang makatagbog mga tawo nga sama niini, ang deretsong paagi maoy epektibo.
Makaingon ka:
◼ “Kami nagasukna sa among mga silingan sa usa ka pangutana: Gihunahuna ba nimong ang Pinadayag nga basahon gituyo nga masabtan, o magpabilin ba lang kaha kining usa ka misteryo? [Tugoting mokomento.] Daghan ang sama nimog panglantaw. Matikdi kong unsa ang giingon mismo sa Bibliya sa Pinadayag 1:3.” Unya mahimong buot mong ipunting ang pasiunang mga komento diha sa panid 9 sa libro bahin sa “Paghubad sa mga Kasulatan.”
3 Alang Kanilang Nabalaka sa mga Kahimtang sa Kalibotan: Maoy maayo ang paggamit sa makapaalinggat nga mga ilustrasyon diha sa librong Pinadayag sa dihang nagatanyag niini ngadto kanilang nabalaka bahin sa mga suliran sa kalibotan.
Pananglitan, makaingon ka:
◼ “Kami nagaduaw aron paghisgot sa kahulogan sa kon unsay nagakahitabo sa atong palibot sa kalibotan karon. Ang pipila ka lider sa kalibotan mibating kita anaa na ngilit sa usa ka bag-ong panahon sa kalinaw. Gibati ba nimong tinuod kini? [Tugoting mokomento.] Hinuon, bisan pa sa kapakyasan sa tawhanong mga kagamhanan, sa 2 Pedro 3:13 ang Bibliya nagapasalig kanato sa usa ka bag-ong katilingban sa yuta nga magalihok ubos sa usa ka langitnong kagamhanan. [Basahang kasulatan ug buksi ang librong Pinadayag sa panid 302.] Unsay nakadani nimo diha sa hulagway? [Tugoting motubag.] Mahitungod sa mga kahimtang nga molungtad sa yuta, ang Bibliya miingon usab sa Pinadayag 21:4 [basahang kasulatan diha sa panid 303, parapo 6]. Bisan gani ang kamatayon dili magadaot sa kalinaw nga tukoron sa Diyos.”
4 Alang Kanilang Nabalaka Bahin sa Polusyon ug sa Palibot: Ang ilustrasyon sa panid 174 sa libro magamit uban sa Pinadayag 11:18.
Pananglitan, human sa imong pasiuna makaingon ka:
◼ “Sa pagpakigsulti sa among mga silingan, daghan ang nabalaka kon sa unsang paagi ang hangin, tubig, ug pagkaon ginahugawan. [Ipakitang ilustrasyon sa panid 174.] Gihunahuna mo bang ang mga kagamhanan makaarang sa pagpahunong niini? [Tugoting mokomento.] Makapadasig ang paglantaw kon unsa ang giingon sa Bibliya nga mahitabo niadtong nagalaglag sa yuta.” Basahang Pinadayag 11:18 diha sa libro sa panid 173, unya padayon sa pagpakita sa katuyoan sa Diyos alang sa yuta sa panid 302.
5 Ang mga tagna sa Pinadayag maoy dakong tinubdan sa kalipay. Magmasiboton tang motanyag sa librong Pinadayag niining bulana aron ang tanan magiyahan pinaagi sa maalamong pagtultol ni Jehova.