Kabiga ang mga Tawo Gikan sa Kangitngit Ngadto sa Kahayag
1 Nagatabon sa yuta ang espirituwal nga kangitngit. (Isa. 60:2) Si Satanas, “ang diyos niining sistemaha sa mga butang,” padayong nagtabon sa katawhan sa espirituwal nga kangitngit, ug ang gisangpotan mao ang moral nga kagun-oban.—2 Cor. 4:4.
2 Karon nga kita nalamdagan na sa kamatuoran, kita ba may kaluoy sa mga tawo sama sa gibuhat ni Jesus? (Mat. 9:36) Kon mao, atong pabilhan ang sugo nga iyang gihatag ngadto kang Pablo ‘sa pagbukas sa mga mata sa katawhan ug kabigon sila gikan sa kangitngit ngadto sa kahayag ug gikan sa pagbulot-an ni Satanas ngadto sa Diyos.’—Buh. 26:16-18.
LAMDAGI ANG MGA HUNAHUNA UG MGA KASINGKASING
3 Sanglit kay si Satanas nagabuta man sa mga kasingkasing ug mga hunahuna sa mga tawo, unsa may atong mahimo sa pagbulig kanila? Gikinahanglan tang aboton ang ilang hunahuna ug kasingkasing pinaagig Pulong sa Diyos. Nag-ampo si Pablo nga unta ang mga taga-Efeso makabaton ug mga mata sa ilang kasingkasing nga nalamdagan. (Efe. 1:17, 18) Wala may mas gamhanan kay sa Pulong sa Diyos sa pag-abot sa kasingkasing. (Heb. 4:12) Ang pagkahibalo niini mopatukmod gayod kanato sa pag-ugmad sa kahanas sa paggamit sa Bibliya sa dihang nagapakigsulti sa uban.
4 Niining bahina makaayong tagdon ang mosunod: Nangandam ka bag maayo alang sa pag-alagad sa kanataran? Nagahimo ka bag mga praktis sesyon aron andamon ang mga pasiuna nga magpadakop sa interes sa mga tagbalay? Kat-onan mo ba ug gamiton ang kinabag-ohang Ulohan nga Mahisgotan? Madanihon ba ang imong pangatarongan sa Kasulatan diha sa mga ganghaan?—Buh. 17:2.
PAGPANGITA SA DIYOS NGA LIBRO USA KA TABANG
5 Ang bag-ong libro, Pagpangita sa Katawhan sa Diyos mahimong dakong tabang sa paglamdag sa katawhan sa espirituwal. Aduna kini ing 16 ka kapitulo ug kapin sa 200 ka litrato ug mga ilustrasyon, nga nagpakita sa kasaysayan sa pagpangita sa tawo sa Diyos. Atong itanyag kini niining bulana diha sa pag-alagad sa kanataran.
6 Tungod sa paggamit sa Ulohan nga Mahisgotan, “Karon na ang Panahon sa Pagpangita sa Diyos,” kita makaarang man sa pagpukaw sa interes sa katawhan pinaagig pagpunting ngadto sa lima ka pangutana nga gisukna sa parapo 28 sa unang kapitulo. Ipakita kanila nga ang maong libro nagatubag niini ug sa daghan pang pangutana bahin sa hustong dalan sa pagpangita sa Diyos. Basin buot mo usab nga paklion ngadto sa panid 377 sa libro ug ipakita ang napulo ka puntos nga nagpaila sa matuod nga relihiyon.
7 Samtang atong itanyag ang librong Pagpangita sa Diyos, gikinahanglan tang mangitag kahigayonan sa pagpaliso sa mga tawo gikan sa kangitngit ngadto sa kahayag. Ang mga panaghisgot sa Bibliya uban sa mga tawo diha sa buluhatong pamalaybalay makaabag kanato sa pagbuhat niini. Sa dihang atong mamatikdan nga sila interesado sa tinong punto o kapitulo sa libro, atong mahikay man nga mobalikduaw aron hisgotan kanag dugang. Gamitang pagkamailahon sa pagkasayod tali kanilang basta interesado lang sa intelektuwal nga panaghisgot ug niadtong gusto gayong makaila sa Diyos ug sa hustong paagi sa pagsimba kaniya.
8 Magmasiboton kita sa pagpakaylap sa kamatuoran nga magpaluwas sa mga tawo sa Hunyo (Juan 8:32), nga nagagamit sa librong Pagpangita sa Diyos ingong instrumento aron kabigon sila gikan sa kangitngit ngadto sa kahayag.