Gamitang Bibliya sa Pag-alagad sa Kanataran
1 Ang dinasig nga mga pulong sa Bibliya aduna ing gamhanang epekto sa mga tawo. Busa, sa unang siglo, si Pablo ‘nangatarongan gikan sa Kasulatan,’ nga nagpatin-aw ug nagpamatuod sa iyang mga puntos pinaagig mga reperensiya. (Buh. 17:2, 3) Si Apolo, sa nagpamatuod ngadto sa mga Hudiyo, “nagpasundayag pinaagig Kasulatan nga si Jesus mao ang Kristo.”—Buh. 18:24-28.
2 Ang mga Saksi ni Jehova karon nagasunod niini nga panig-ingnan. Ingon sa gihisgotan sa Marso 1, 1986 nga Watchtower, panid 26: “Buot nila nga ang mga tawo makaamgo nga ang mensahe nga ilang gimantala dili ilang kaugalingon kondili gikan sa Pulong sa Diyos mismo. Mao nga diretso silang mogamit sa Bibliya, nga aktuwal nga gibasa gikan niana ngadto sa uban diin posible.” Ikaw ba nagagamit gayod sa Bibliya diha sa imong ministeryo?
KON NGANONG EPEKTIBO
3 Nganong ang Bibliya epektibo kaayo? Tungod kay kini “makaarang sa pagtugkad sa mga hunahuna ug katuyoan sa kasingkasing.” (Heb. 4:12) Ang tinuod nga mga motibo sa mga tawo molugwa sa dihang iyagyag kini sa Kasulatanhong kamatuoran. Ang mga tawo nga may mabuot-kasingkasing makabig niini. Pananglitan, usa ka batan-ong magtiayon gisukna kon nganong dali ra silang misanong sa maayong balita. Ang ilang tubag? “Tungod sa Bibliya.” Ilang naila dayon ang tingog sa “maayong magbalantay” diha sa Bibliya.—Juan 10:14.
4 Ang usa ka maayong personal nga programa sa pagtuon, apil ang pangandam sa tanang miting sa kongregasyon, mosangkap kanimo sa paggamit sa Bibliya uban ang dugang pagsalig. (2 Tim. 3:16, 17) Ang mga membro sa pamilya makabansay man sa pagsubli sa Ulohan nga Mahisgotan uban sa usag usa. Usab, ang kadaghanan sa mga pasiuna nga anaa sa mga panid 9-15 sa librong Nangatarongan nagalangkit man sa pagbasa ug usa ka teksto. Nganong di bansayon ang pipila niini? Gamita kon unsa ang mapuslanon ug makabutad sa interes sa katawhan sa inyong teritoryo.
GAMITANG MAAYONG PANGHUKOM
5 Adunay mga panahon nga atong madapit ang tagbalay nga kuhaon ang iyang kaugalingong Bibliya ug basahon ang teksto uban kanato. Gamitang maayong panghukom sa maong mga kahimtang. Kon buot mong dili magdugay, hayan makahukom ka nga basahon lamang ang usa sa mga teksto sa atong Ulohan nga Mahisgotan. O kon puliki gayod ang tagbalay, basin kutloon ta lang ang usa ka teksto, nga nagabutyag kanila nga gikan kana sa Bibliya. Sagad gihimo kini ni Jesus ug sa iyang mga apostol, sanglit kay wala man silay dala nga personal nga mga kopya. Ato usab nga masag-ulo ang mga teksto nga gihunahuna tang gamiton diha sa atong ministeryo.
6 Buot tang ‘gamiton ang pulong sa kamatuoran sa hustong paagi.’ (2 Tim. 2:15) Ang atong pagbuhat niana nga epektibo kaayo magpamatuod nga kita maoy mga ministro sa Diyos ug nga ang atong mensahe gipasukad sa iyang Pulong.