Pagtanyag sa Maayong Balita—Pinaagig Paggamit sa Bibliya
1 “Ang pulong sa Diyos maoy buhi ug nagalihok nga gamhanan.” (Heb. 4:12) Aron kini bug-os nga magalihok nga gamhanan ug mahimong buhi, kinahanglan kining basahon ug ipadapat. Aron sa paglampos niini, ang organisasyon ni Jehova, sugod ilabina niadtong 1954, midasig kanato sa paggamit sa Bibliya diha sa atong ministeryo sa pamalaybalay. Kita nabansay sa paghatag ug tulo- ngadto sa walo-minuto nga mga sermon ug sa pagdala ngadto sa pagtagad sa mga tagbalay kon unsa ang giingon sa Bibliya bahin sa importanteng mga butang.
2 Sa mas bag-o pang katuigan, ang Atong Ministeryo sa Gingharian sa regular nagdala sa Ulohan nga Mahisgotan, nga nagalaraw sa duha o tulo ka teksto sa usa ka ulohan aron gamiton sa pag-alagad sa kanataran. Pananglitan, sa kinabag-ohan ang Ulohan nga Mahisgotan maoy sa temang “Ang Kagamhanang Mopatunghag Paraiso,” nga nagapasiugda sa paglaom sa Gingharian.
3 Sa paggamit sa Bibliya nga epektibo nagakinahanglan ug pagbansay ug ang tinguha sa pagtabang sa mga tawo nga makaamgo nga kini mao gayoy Pulong sa Diyos ug buhi ug gamhanan. Samtang kita gidasig nga gamiton ang mubong mga presentasyon diha sa buluhatong magasin, dili ta buot nga isalindot ang maylabot sa paggamit sa Bibliya diha sa ubang mga bahin sa ministeryo sa kanataran. Total, kita mga estudyante man sa Bibliya, ug aduna bay mas maayong paagi sa paghatag ug pamatuod nga kita ingon niana gayod kay sa pagpanlimbasog nga ipakita sa katawhan gikan sa Pulong sa Diyos mismo kon unsa ang giandam ni Jehova alang sa katawhan ug niining yutaa?
TABANG GIKAN SA BASAHONG NANGATARONGAN
4 Dugang pa sa Ulohan nga Mahisgotan diha sa Atong Ministeryo sa Gingharian, aduna kita ing basahong Nangatarongan Pinasukad sa Kasulatan. Samtang imong sublion ang mga pasiuna nga natala sa mga panid 9-15, imong makaplagan ang mga reperensiya ngadto sa mga bersikulo sa Bibliya nga magamit sa pagpaila sa mensahe sa Gingharian. Aduna kita ing dakong pagkadaiya sa mga paagi sa pagngadto sa Bibliya aron ipakita sa mga tawo kon unsa ang ginaingon niana.
5 Pananglitan, kon ang pipila sa mga tagbalay mabalak-on sa mga tigulang, hayan mapuslanong sundon ang gisugyot sa basahong Nangatarongan sa panid 14 ubos sa ulohang “Pagkatigulang/Kamatayon.” Pagkatukma sa pangutana nga maoy: “Nahibulong ka ba gayod kon nganong kita matigulang ug mamatay? Buot kong ipunting kanimo ang giingon sa dinasig nga tagsulat sa Bibliya sa Roma 5:12.” Dayon makaingon ka: “Apan samtang ang Bibliya nagapakita kon nganong kita matigulang ug mamatay, kini usab nagatanyag ug kahibulongan kaayong paglaom para sa umaabot, ingon sa makaplagan sa Pinadayag 21:3, 4.” Dayon ang karong tanyag sa basahon ikapasiugda.
6 Sagad kaayo niining mga adlawa nga ang mga tawo moingon, “Dili, puliki ako.” Tinuod nga daghan ang puliki, ug ato gayong pabilhan nga ingon niini ang ilang kahimtang. Bisan pa niana, kon husto ang mga sirkumstansiya, ikaw makaingon: “Sayod ko sa pagabation, kay kini gayod maoy mga puliking mga panahon. Buot kong mobilin kanimo ug usa lang niining puntoha, bisan pa niana,” ug paklia ngadto sa usa sa mga teksto diha sa atong kinabag-ohang Ulohan nga Mahisgotan. Human mabasa kana, mahisgotan mo gilayon ang tanyag sa basahon, mobilin ug usa ka tukmang tract, o moingon nga ikaw mobalik ra aron ipaambit ang pipila dugang impormasyon gikan sa Bibliya.
7 Maoy maayo nga makita sa mga tawo nga kita maoy mga estudyante sa Bibliya, hanas sa paggamit sa Pulong sa Diyos diha sa atong ministeryo! Moabag kini kanila sa pag-ila sa mga tawo karong mga adlawa kinsa nagasalig sa Pulong sa Diyos ug nagagamit niana sa ilang matag adlaw nga mga kinabuhi. Ang atong mga panikaysikay sa paggamit sa Bibliya magpasiugda diha sa hunahuna sa daghan nga ang Pulong sa Diyos buhi gayod, nagalihok nga gamhanan, ug makaapektar sa ilang mga kinabuhi.