Pas-ana ang Atong Kaugalingong Lulan sa Kaakohan
1 Ang ideya sa kaakohan daw nagapabug-at sa mga tawo karon. Daghan ang nagasulay sa pagsalikway niana. Ingong resulta, ang mga bana nagabiya sa ilang mga asawa, mga inahan nagasalikway sa ilang mga anak, mga batan-on nagapangundang sa pag-eskuwela, ug mga lungsoranon nagalikay sa pagbayad ug buhis. Ang tawong responsable mao kanang kasaligan, nga mahinangop sa pagpanubag sa iyang panggawi. Busa, ang Pulong sa Diyos matin-awng nagahisgot bahin sa mga Kristohanon nga ang “matag usa mopas-an sa iyang kaugalingong lulan.” (Gal. 6:5) Pagkatukma nga ang tema sa sirkitong asembliya para sa 1992 maoy “Pagpas-an sa Atong Kaugalingong Lulan sa Kaakohan”! Kining seryeha magsugod sa Pebrero. Ang tanan kanato maghimo gayod ug tinong mga plano sa pagtambong.
2 Pinaagig mga pakigpulong, mga pasundayag, mga eksperiyensiya, ug mga interbiyu, kining programaha sa matin-aw maglaraw sa lainlaing mga responsabilidad nga nabatonan tang tanan ingong mga Kristohanon. Ang atong mga batan-on adunay kaakohan nga pas-anon, ug ang pakigpulong sa magtatan-aw sa sirkito sa Sabado sa palis ilabinang mopunting niana ngadto kanila. Sa Sabado aduna usab ing kahigayonan alang sa bag-ohang mga nagapahinungod nga mabawtismohan. Ang tanan niadtong nagaplano sa pagpabawtismo sa sirkitong asembliya kinahanglang magpahibalo sa nagadumalang magtatan-aw nga abante pa gayod aron ang pangandam alang niini mahimo.
3 Sa buntag sa Domingo ang upat-bahin nga simposiyum mopunting sa atong Kristohanong responsabilidad sa pagsangyaw. Dayon, sa Domingo sa palis, ang publikong pakigpulong nga nag-ulohang “Bag-ong Kalibotan sa Diyos—Kinsa ang Takos Makasulod?” ipahayag sa magtatan-aw sa distrito.
4 Ang tanan kanato gustong maghikay sa atong kalihokan aron makatambong ug bug-os nga mabenepisyohan gikan niining maayo kaayong duha-adlaw nga programa. Mopahibalo ra ang inyong magtatan-aw sa sirkito sa dapit ug mga petsa nga naeskedyol alang sa inyong kongregasyon.