Makahimo Ka ba sa Pag-oksilyare Payunir?

¹ Si Jesus nagdasig sa iyang mga sumosunod nga magmasiboton sa ministeryo, ug iyang giseguro kanila nga ang pagsunod niining kursoha makahatag ug kalipay kanila. (Mat. 10:8b; Buh. 20:35) Sa miaging Abril 15,730 nag-alagad ingong mga oksilyare payunir. Makahimo ka ba sa pagpakig-ambit niining mga panalangina niining tuiga pinaagig pagpalista ingong oksilyare payunir sa Abril ug Mayo?​—Sal. 34:8.

² Pagsusi sa Imong mga Kahimtang: Samtang imong tagdon ang mga kasinatian sa ubos, suknaang kaugalingon: ‘Masundog ba nako ang bisan hain niining panig-ingnana? Unsaon man nako paghimog gikinahanglang pagpasibo nga makabukas sa dalan alang kanako nga makaoksilyare payunir?’

³ Usa ka sister nakahimo sa pag-oksilyare payunir bisan tuod may lima siya ka anak ug nagatrabaho. Sa unsang paagi siya nagantihan? Ang iyang bana ug mga anak mihatag kaniyag ekselenteng pagsuportar, ug ingon nga resulta sa maayong panig-ingnan niining maong sister, ang bana napalihok nga mahimong dibawtismadong magmamantala sa sunod nga bulan.

⁴ Sa usa ka kongregasyon ang tanang ansiyano ug ministeryal nga alagad nag-oksilyare payunir sulod sa usa ka bulan. Kasagaran kanila may sekular nga trabaho, apan ilang gigugol ang ilang tibuok hinapos nga mga semana sa espirituwal nga mga kalihokan. Kining maayong pagpanguna nakaayo sa tibuok kongregasyon. Sa 77 ka magmamantala, 73 nakig-ambit sa payunir nga pag-alagad sa maong bulan.

⁵ Usa ka 15-anyos-edad estudyanteng babaye naggamit sa iyang duha-semana tingpamulak nga bakasyon aron maka-oksilyare payunir ug miingon: “Nakita gayod nako ang pag-uswag sa akong pakighisgot. Naarangan nako ang paghimog daghan pang panaghisgot uban sa katawhan diha sa pultahan.”

⁶ Kadtong miretiro na sa sekular nga pagpanarbaho kasagaran adunay ekselenteng kahigayonan sa pagpangagpas sa intereses sa Gingharian. Human sa kamatayon sa iyang bana, usa ka 84-anyos-edad nga sister misulat: “Ang tanan nakong mga anak maoy mga hingkod na ug nangaminyo ug may mga pamilya na. Wala ko nila pasagdi, apan ang ilang mga duaw dili makabuntog sa pagbati sa pagkanawad-an ug sa kamingaw. Unya usa sa mga ansiyano sa among kongregasyon misugyot nga akong sulayan ang oksilyare payuniring. Ako nagpanuko apan sa kataposan medesider nga mosulay niana. Pagkadakong kalipay! Ako mipadayon ingon nga oksilyare payunir kada bulan sukad niadto.”

⁷ Himoa ang Imong mga Plano Karon: Nganong dili maghimog positibong mga plano karon nga makaoksilyare payunir sa Abril ug Mayo? Aron magmalamposon, ang mainampingong pagplano gikinahanglan. Kini dayag gikan sa mga kasinatian niadtong nakaarang sa pag-oksilyare payunir bisan tuod aduna silay mga responsabilidad sa pamilya o bug-os panahong sekular nga mga trabaho. Pakigsulti sa uban kinsa malamposong nakapayunir aron makabatog kaayohan sa ilang kasinatian. Usab, duol kang Jehova diha sa pag-ampo, nga nagapangayo sa iyang tabang.​—Isa. 40:29-31; Sant. 1:5.

⁸ Walay duhaduha bahin niini, daghan ang mga kangaya niadtong nagahikay sa ilang mga kalihokan aron sa pag-alagad ingong mga katabang nga payunir. Ikaw ba ganahan niining pribilehiyoa? Kon manlimbasog ka sa pagpalapad sa imong ministeryo, si Jehova magabubo gayod nganha kanimo sa iyang dagayang panalangin.​—Mal. 3:10.