Tabangi ang mga Anak sa Pag-alagad Kang Jehova Gikan sa Kasingkasing
1 Si Salomon mipahayag nga ang “mga anak maoy usa ka panulondon gikan kang Jehova.” (Sal. 127:3-5) Ang mga ginikanan adunay usa ka hatag-Diyos nga kaakohan sa pagtudlo ug pagdisiplina sa ilang mga anak. Kini nagalakip sa pagbansay diha sa ministeryo, nga nagadasig kanila sa pagsulti gikan sa kasingkasing bahin kang Jehova.—Efe. 6:4.
2 Diha sa unsang panuigon man kinahanglang mosugod ang mga ginikanan niining pagbansaya? Ang tubag sa Bibliya maoy tin-aw: Kinahanglang kana maoy gikan sa pagkamasuso. (2 Tim. 3:14, 15) Kon diin mas sayong gisugdan ang pagbansay, mas dako ang purohan nga ang mga anak makaugmad og solidong pundasyon sa kamatuoran ug magahimo sa ministeryo nga ilang bokasyon. Kining sayo nga pagbansay magasilbe usab sa pagpanalipod kanila gikan sa kalibotanong panghunahuna ug mga tinamdan.
3 Daghang wala pa magtungha ang nagpakita nag kinaiyanhong hilig sa pagkahanas sa komplikadong mga buhat. Kining maong purohan sa pagkakat-on sa sayong panuigon kinahanglang itumong ngadto sa pagbansay kanila sa mga kahanas nga makabatog pag-uyon ni Jehova. (bt88 8/1 p. 15; bt89 12/1 p. 31) Daghan sa mga linghod pag panuigon miuswag ngadto sa pagkahimong dibawtismadong mga magmamantala. Ang pipila ka anak nagahimog pagpahinungod ug nabawtismohan una pa sa ilang pagka-ten-edyer. Kini nagabukas sa dalan alang kanila nga makaalagad ingong oksilyare nga mga payunir ug bisan gani regular nga mga payunir una pa sila makatapos sa ilang pag-eskuwela.
4 Ang pipila ka hamtong nga hayan nagalantaw sa kabatan-onan karon ingong haras ug dimatinahoron mahimong dili buot magpatalinghog sa usa ka batan-on nga moanha sa iyang pultahan. Unsa may isulti sa usa ka batan-ong magmamantala aron pagbuntog niini? Ang usa ka batan-ong magmamantala migamit og ingon niini nga paagi: “Maayong buntag, ang akong ngalan mao si ․․․․․․․․. Ako nagaduaw sa akong mga silingan karon tungod kay daghan ang nabalaka bahin sa umaabot. Ingong usa ka hamtong, segurado gayod nga ikaw mas eksperiyensiyado bahin sa mga butang sa kinabuhi kay kanako. Hinuon, aniay usa ka kasulatan nga makapalipay kanatong tanan.” Human nga mabasa ang Pinadayag 21:3, 4, ang panaghisgot mahimong ikapunting diha sa tract nga Kinabuhi sa Malinawong Bag-ong Kalibotan.
5 Ang laing sugyot mao: “Haló, ang akong ngalan mao si ․․․․․․․․. Ako nagahimog mubong mga pagduaw sa kasilinganan tungod kay ako nasayod nga daghang hamtong ang nabalaka bahin sa paagi nga nagalihok ang mga batan-on karon. Usahay ang mga batan-on magpakitag dimatinahorong tinamdan. Apan aniay usa ka kasulatan nga nagapakita kon sa unsang paagi nga sa umaabot ang tanan makakat-on sa duyog nga pagkinabuhi diha sa kalinaw.” Dayon basaha ang Salmo 37:11 ug sa tukma komentohi. Sa dihang ang mga tagbalay makadungog sa maong sinserong mga pahayag sa atong batan-ong mga magmamantala, segurado nga daghan unya kanila ang madani nga mauyonon.
6 Linibo sa batan-ong mga magmamantala ang masibotong nagapakig-ambit sa pagwali-Ginghariang buluhaton. Sila angay nga pagadayegon. Ang mga batan-on nga nabansay sukad sa pagkamasuso pinaagig diyosnong mga ginikanan daling mosanong sa pagdasig nga magbaton ug mas bug-os nga pakig-ambit sa ministeryo. Kadtong anaa sa eskuwelahan may talagsaong kahigayonan sa pagpamatuod ngadto sa isigkaestudyante ug maingon man sa mga magtutudlo.
7 Busa tabangi ang batan-ong mga magmamantala sa inyong kongregasyon sa pag-alagad kang Jehova uban ang batan-ong kalagsik, nga nagadayeg kaniya gikan sa kasingkasing.—Eccl. 12:1.