Mga Tigdala sa Kahayag sa Kasilinganan

¹ Human sa pagtambong sa distritong kombensiyon niining tuiga, kita labawng nakaamgo sa panginahanglan nga mahimong mga tigdala sa kahayag sa atong kasilinganan. (Mat. 5:14) Samtang pamalandongon ta ang tanang impormasyon nga gipresentar sa programa ug manlimbasog nga magapadapat niana sa atong inadlaw nga mga kinabuhi, kita mabuligan nga mas masuod kang Jehova sa matuod nga pagsimba ug sa pagtabang sa uban nga makakat-on bahin sa mga saad ni Jehova.

² Ang atong mga kahigayonan sa pagdalag kahayag miusbaw sa dihang, sa kataposan sa sesyon sa Biyernes sa buntag, ang bag-ong tract nga nag-ulohag Molungtad ba Kining Kalibotana? giluwatan. Ang mga pasundayag sa Sabado sa buntag maoy mabuligon sa pagpakita kon sa unsang paagi magamit kining maong tract. Uban niini, dihay pahibalo nga tulo ka lain pang tracts ang mabatonan usab. Kini nagaulohag Kahupayan Alang sa Naluya, Magkalipay sa Kinabuhing Pamilyahanon, ug Kinsa ba Gayod ang Magamando sa Kalibotan? Gihatag ang pagdasig nga magdala ta niini aron magamit sa dihang motungha ang mga kahigayonan.

³ Diha sa konklusyon sa pakigpulong nga “Kaluwasan sa Pagpadayag ni Jesu-Kristo” sa Sabado sa hapon, ang usa ka bag-ong brosyur nga nag-ulohag Tinuod Bang May Pagtagad ang Diyos Kanato? giluwatan. Kining matahom nga pagka-ilustrar nga brosyur motubag sa mga pangutanang gisukna sa katawhan, sama sa: Nganong gitugotan sa Diyos ang pag-antos? Matapos ba gayod ang pag-antos? Unsaon nato pagkasayod nga ania na ta sa kataposang mga adlaw? Sa unsang paagi mabatonan nato ang kinabuhing walay kataposan sa bag-ong kalibotan sa Diyos? Kining brosyura maoy usa ka ekselenteng galamiton sa pagsugod ug bag-ong mga pagtuon.

⁴ Pagkamapasalamaton nato sa dagayang espirituwal nga pagkaon nga nadawat sa “Mga Tigdala sa Kahayag” Distritong Kombensiyon! Hinaot nga kita, ingong mga tigdala sa espirituwal nga kahayag sa Diyos, hugot nga mohukom nga magapadapat sa atong nakat-onan ug maghimog makugihong paggamit niining maayong bag-ong mga giluwatan sa pagtabang sa katawhan nga makaila ug mag-alagad kang Jehova.