Pangutana

◼ Ngadto sa unsa man nga gilapdon nga ang batan-ong mga anak sa Kristohanong mga ginikanan makig-ambit diha sa ministeryo sa kanataran una pa sila ilhon ingong dibawtismadong mga magmamantala?

Ang Kristohanong mga ginikanan gusto nga maugmad ang ilang mga anak ngadto sa pagkahamtong, debotadong mga alagad ni Jehova. (1 Sam. 2:18, 26; Luc. 2:40) Bisan diha sa linghod pa kaayong panuigon, ang mga anak sa Kristohanong mga panimalay kinahanglang makaarang sa paghimog tin-aw nga kapahayagan sa pagpanalipod sa ilang pagtuo. Ang espirituwal nga pagtubo sa mga anak mapauswag samtang sila mokuyog sa ilang mga ginikanan diha sa ministeryo sa kanataran gikan pa sa sayong pagkabata. Apan mahinungdanon alang sa kabatan-onan nga mapalihok gayod gikan sa kasingkasing kon buot man ugaling nilang mopahimulos sa pag-alagad sa kanataran, magtinguhang mahimong dibawtismadong mga magmamantala, ug padayong makig-ambit sa pagsangyawng buluhaton. Ang mainampingong pagbansay gikan sa mga ginikanan gikinahanglan. (1 Tim. 4:6; 2 Tim. 2:15) Ang ubang takos nga mga magmamantala makaabag man usahay kon mouyon ang mga ginikanan.​—Tan-awang Atong Ministeryo, mga panid 99-100.

Samtang ang mga anak mokuyog sa ilang mga ginikanan diha sa balaybalay nga buluhaton, sila makakat-on kon unsaon pagpakig-ambit diha sa ministeryo. Apan dili pa sila ilhon ingong dibawtismadong magmamantala hangtod nga maugmad na nila ang igo-igong katakos ug kahanas sa ilang kaugalingon. Ang Kristohanong mga ginikanan makadesider kon sa unsang gilapdon ang usa ka anak makaambit sa paghatag og pamatuod samtang sila duyog nga nagabuhat. Ang mga anak nga wala pa ilha ingong dibawtismadong mga magmamantala kinahanglang dili mohimog kinaugalingong mga pagduaw o mokuyog sa ubang kabataan sa pag-alagad sa kanataran. Ang mga ginikanan makaandam sa ilang mga anak alang sa pag-alagad sa kanataran ug tugotan sila nga makaambit sa nagakadaiyang mga paagi, sama sa pagbasag usa ka teksto, pagtanyag og usa ka tract o magasin, o pagpakita sa tagbalay sa usa ka ilustrasyon diha sa usa sa mga basahon. Samtang ang usa ka bata magakahamtong, hayan siya makaarang sa pag-ambit sa panaghisgot sa mas dakodako.

Uban sa tukmang pagbansay, ang mga batan-on makakat-on sa pag-ila sa pagkaseryoso sa ministeryo samtang sila mosanong sa pagtultol sa ilang mga ginikanan ug magagawi sa ilang kaugalingon diha sa hapsay nga paagi. Ang mga ginikanan kinahanglang dili mopasagad sa ilang mga kabataan nga wala pa ilha ingong dibawtismadong mga magmamantala diha sa tigom sa dayon na nga pagsangyaw, nga nagadahom sa uban nga maoy moatiman kanila. Ang natungdang mga ginikanan nagaila sa ilang personal nga kaakohan sa pagdumala sa kalihokan sa ilang mga anak. Siyempre, ang ubang responsableng mga magmamantala mahimong mahinangop nga moabag sa pagbansay sa batan-ong mga kabataan diha sa kongregasyon kinsa nagapakitag tiunay nga interes sa pag-alagad kang Jehova diha sa ministeryo.