Pangutana

◼ Unsa may isipong nahiangayng panapot sa dihang magapresentar sa kaugalingon alang sa bawtismo?

Samtang ang mga suntoan sa senina nagakalahi sa nagkalainlaing bahin sa kalibotan, ang tambag sa Bibliya sa pagbiste “uban ang pagkakasarangan ug pagkamalinawon sa hunahuna” nagapabiling managsama alang sa tanang Kristohanon, bisag asa sila nagapuyo. (1 Tim. 2:9) Kining prinsipyoha kinahanglang ipadapat sa dihang nagatagad kon unsa ang angayng panapot alang sa bawtismo.

Ang Disyembre 1, 1985, Bantayanang Torre, panid 30 (Hunyo 1, 1985 sa Ingles), mihatag niini nga tambag alang sa tawo nga magpabawtismo: “Ang pagkakasarangan angay gayong maglungtad sa matang sa humdonon nga gamiton. Kini hinungdanon karong adlawa dihang ang mga magdedesinyo sa urog morag buot magpasundayag sa pagkaseksi ug mokab-ot sa halos bug-os nga kahubo. Ang laing butang pagakonsiderahon mao nga ang pila ka biste nga mopatim-awng ligdong o kasarangan kon uga dili ingon kon basa. Walay mausa nga nagapabawtismo ang buot mahimong hinungdan sa pagkahisalaag sa hunahuna o kapandolan panahon sa usa ka okasyong seryoso sama sa bawtismo.​—Filipos 1:10.”

Nahiuyon niining tambaga, silang ginabawtismohan buot nga magsul-ob ug kasarangang pamiste, nga nagahupot sa hunahuna sa kahinungdanon sa okasyon. Busa, ang usa ka humdonon nga dili igo o usa nga di-kasarangang modikit sa lawas sa dihang basa maoy dili angayang panapot sa usa ka Kristohanon ug kinahanglang likayan. Sa susama, maoy dili tukma alang sa usa nga magkagidlay o magkamuritsing sa panagway. Dugang pa, maoy dili haom nga magsul-ob ug mga kamisen nga may kalibotanong panultihon o komersiyal nga mga pagya.

Sa dihang ang natudlong mga ansiyano magrepaso sa mga pangutana alang sa bawtismo uban sa kandidato sa bawtismo, kini maoy maayong panahon sa paghisgot sa kahinungdanon sa pagsul-ob ug nahiangayng panapot. Niining paagiha ang pagkadungganon sa okasyon mamintinar, ug padayon tang magabarog nga lahi gikan sa kalibotan.​—Itanding Juan 15:19.