Ang Padayong Pagpadako Nagapauswag sa Panginahanglan Alang sa mga Kingdom Hall
1 Dugay na kanhi ang manalagna ni Jehova mitagna nga “ang tilinguhaong mga butang sa tanang kanasoran kinahanglang moabot.” (Hag. 2:7) Sa pagkatinuod atong makita ang katumanan niini karon. Pagkamakapahinam nga dihay 7,559 nga nabawtismohan sulod sa 1993 nga tuig sa pag-alagad sa Pilipinas lamang! Aron nga padayong mabuligan kining maong mga bag-ohan, gikinahanglan natong ‘ipahimutang ang atong mga kasingkasing sa atong mga dalan’ aron sa pagseguro nga bug-os tang nagasuportar sa buluhaton sa Diyos. (Itandi ang Haggeo 1:5.) Oo, usa ka mahinungdanong bahin sa atong pagsuportar sa buluhaton sa Diyos mao ang atong pagtabang sa pagtaganag angayang mga balay sa pagsimba alang sa panon sa katawhan sa bag-ong mga magdadayeg ni Jehova.
2 Ang Kingdom Hall Fund sa Sosyedad nagalihok sa Pilipinas sa ubay-ubay nang katuigan karon nga nagpaposible alang sa 1,013 ka kongregasyon nga makabaton ug bag-ong mga Kingdom Hall. Sulod lamang sa 1993 nga tuig sa pag-alagad, 101 ka kongregasyon sa 34 ka probinsiya ang nakadawat ug mga hulam nga salapi alang sa ilang mga proyekto sa Kingdom Hall. Makapadasig ang paglantaw sa pagsanong sa mga magmamantala sa pagsuportar niining nagabiyo nga pundong salapi. Ang mga salaping gipahulam sa mga kongregasyon ibalik ngadto sa pundo aron nga ang tanang pundong salapi nga giamot magapadayon nga magamit sa pagtukod ug bag-ong mga Kingdom Hall.
3 Ang Maampingong Pagplano ug Konsultasyon Magpaseguro sa Kalamposan: Sa Lucas 14:28, 29, si Jesus naglaraw ug usa ka prinsipyo nga kinahanglang makat-onan sa tanang magsugod ug mga proyekto sa Kingdom Hall. Una gikinahanglan nga ‘molingkod ug kalkulahon ang gasto, sa pagtino kon sila may igo ba nga ikapahuman’ sa proyekto. Oo, ang mainampingong pagplano gikinahanglan. Ang kaikag dili igo, apan ang tibuok kongregasyon kinahanglang mosuportar sa proyekto sa panalapi pinaagig mga amot. Sa dihang ang mga igsoon suknaon kon pila ang ilang ikaamot kada bulan, kinahanglang sila matinud-anon, nga dili magasaad ug labaw kay sa ilang maabot aron lamang makahulam. Maoy maayo usab kon ang mga igsoon mahangyo sa pagsugod dayon sa pag-amotay bisan sa dili pa moaplay alang sa salaping hulamon. Niining paagiha ang mga pundo matigom ug ang mga ansiyano makahimo sa pagtino kon ang kongregasyon makaarang ba sa pagsuportar sa proyekto.
4 Ang laing tukmang kasulatanhong prinsipyo maoy sa Proverbio 15:22 nga nagaingon: “Adunay pagkapakyas sa mga plano diin walay konpidensiyal nga pakigsulti, apan diha sa panon sa mga magtatambag adunay kalamposan.” Kini nagapasabot nga ang mga ansiyano kinahanglang magkonsultahanay sa usag usa ug hisgotan ang maong butang nga maampingon una pa ipresentar kana sa kongregasyon. Wala gayoy usa ka ansiyano nga magadesider sa mga butang sa iyang kaugalingon. Diin ang mga ansiyano nagbuhat niini, daghang kalibog ug di-pagsinabtanay ang miresulta. Dugang pa, ingon sa gisugyot diha sa suplemento sa Disyembre 1991 nga Atong Ministeryo sa Gingharian, ang magtatan-aw sa sirkito angay nga konsultahon alang sa iyang tambag. Sa unsang paagi siya makatabang?
5 Ang pagpilig luna alang sa balay-tigomanan nagalangkit sa daghang butang ingon nga dugang pa sa prisyo sa propiyedad. Kini ba sentro sa kaigsoonan? Kana ba duol sa dalan, o sa interyor? Aduna bay seguradong titulo ang yuta? Aduna bay mga tawo nga nagapuyo sa yuta nga mahimong magdumili sa pagpahawa human kini mapalit? Ang magtatan-aw sa sirkito makahatag sa iyang tambag niining mga butanga una pa ang lote paliton. Makarekomendar usab siya ug usa ka igsoong lalaki nga magseguro nga walay legal nga mga kabilinggan sa titulo. Dugang pa, sa ulahi ang magtatan-aw sa sirkito makasusi sa mga plano nga gilaraw sa mga ansiyano, ug magahatag ug mga sugyot sa gidak-on sa Kingdom Hall ug sa layout niini. Masusi usab niya ang ilang aplikasyon sa salaping hulamon aron pagseguro nga ang tanang kinahanglanon nakab-ot.
6 Sa dihang ang mga plano maaprobahan sa Sosyedad, walay dagkong kausaban sa desinyo o gidak-on sa Kingdom Hall o sa lokasyon niini ang himoon nga walay pagkonsulta una sa Sosyedad. Ang pipila ka kongregasyon nag-usab sa lokasyon sa yuta o desinyo sa balay-tigomanan nga walay pagpahibalo sa Sosyedad. Kini nakamugna ug wala kinahanglanang mga suliran.
7 Gisugyot nga, diin posible, ang kongregasyon mosulay sa pagpalit sa yuta ug magpatitulo niana sa ngalan sa usa ka korporasyon sa sirkito una pa nila ipadala ang ilang aplikasyon sa salaping hulamon ngadto sa Sosyedad. Kini magpadali sa paghikay sa salaping hulamon sanglit kay ang yuta gipanag-iya na man sa mga igsoon.
8 Ang tukma ug detalyadong mga rekord sa panalapi kinahanglang huptang husto gikan sa sinugdan sa pagtukod. Maoy maayo alang sa duha o tulo ka igsoong lalaki nga duyog nga magtrabaho sa kuwenta aron paglikay sa bisan unsang pagduda o di-pagsinabtanay. Sa kataposan sa proyekto, ang kongregasyon kinahanglang may kompletong rekord sa mga kuwenta sa proyekto.
9 Ang Boluntaryong mga Trabahante Magapatulin sa Buluhaton ug Magapamenos sa mga Galastohan: Mas maayo gayod nga mogamit sa mga kahanas nga mabatonan sulod sa mga kongregasyon nga magatambongan diha sa bag-ong mga Kingdom Hall. Walay duhaduha nga, ingon sa gipakita ni Jesus sa Juan 10:12-15, ang usa nga nagabuhat nga kinabubut-on tungod sa gugma mas labaw nga kugihan kay sa “sinuholang tawo,” kinsa interesado lamang sa suhol ug “dili magtagad sa mga karnero.” Bisan ug may usa lamang ka hanas nga igsoong lalaki sa usa ka tinong trabaho, siya mahangyo man sa pagbansay sa uban samtang siya nagatrabaho. Niining paagiha dugang pa ang mahimong kuwalipikado sa pagtabang sa ubang mga proyekto sa umaabot. Ang boluntaryong pagbuhat makatabang sa pagpamenos sa galastohan, sa ingon nagagamit nga maalamon sa bililhong mga salapi nga gitagana sa mga igsoon. Niining paagiha, ang tibuok kongregasyon malangkit ug, sama sa adlaw ni Nehemias, ang mga igsoon padayong “magabaton ug usa ka kasingkasing alang sa pagtrabaho.” (Neh. 4:6b) Human sa pagkompleto sa ilang kaugalingong proyekto, ang mga igsoon angayng palihokon pinaagi sa gugma sa pagtabang sa pagtukod sa mga Kingdom Hall sa ubang mga kongregasyon.—Neh. 5:19; Filip. 2:3, 4.
10 Maoy maayo alang sa mga magtatan-aw sa sirkito nga maghupot ug usa ka listahan sa mga igsoon sa ilang sirkito kinsa hanas sa nagakadaiyang panarbaho ug kinsa andam sa pagboluntaryo sa mga proyekto sa Kingdom Hall sa ubang mga kongregasyon. Samtang dugang ang ginabansay, kining listahana magakadaghan. Unya, sa dihang adunay usa ka proyekto sulod sa sirkito, ang usa ka grupo sa hanas nga mga trabahante makadugang sa lokal nga mga igsoon sa pagboluntaryo sa ilang mga serbisyo, sa ingon makahupay sa lokal nga kongregasyon sa dakong kabalaka. Ang pagsanong niining paagiha maoy usa ka ebidensiya sa atong gugma sa atong labing suod nga mga silingan—ang atong Kristohanong mga igsoon.—Mat. 7:12; 22:39; Juan 13:35.
11 Pagpakitag Gugma ug Pagpabili sa Kahikayan: Hinumdomi nga ang bisan unsang gipahulam nga salapi nga gitugot sa atong kongregasyon naggikan sa boluntaryong mga amot sa mga igsoon sa tibuok kalibotan. Segurado nga dili nato buot nga mapakyas sa pagpakitag pagkamapasalamaton alang niining maong mahigugmaong kalulot sa mga igsoon, sama sa siyam ka sanlahon sa adlaw ni Jesus, dili ba? (Luc. 11:12-18) Nagapakita ba kitag pagkamapasalamaton kon gipasagdan ta ang pagbayad sa atong gihulam nga salapi ingon sa gisaad? Pagpakita ba kinig gugma sa atong mga igsoon sa ubang mga kongregasyon? Kon kita modawat lamang ug tabang sa pagtukod sa atong Kingdom Hall ug unya dili magtagad sa ubang mga kongregasyon nga nanginahanglag tabang, kini ba pagpasundayag sa espiritu sa Filipos 2:4?
12 Tungod sa pagbaton ug kabalaka, dili lamang sa ilang kaugalingong kongregasyon, apan alang sa “tibuok kapunongan sa mga igsoon sa kalibotan,” (1 Ped. 5:9) daghang kongregasyon ang boluntaryong nagapasakag mga resolusyon aron pagpadala ngadto sa Sosyedad ug mga amot alang sa Kingdom Hall Fund kada bulan. Bisan ang pipila nga may mga balayranan nga loan sa Kingdom Hall nagapadalag mga amot ngadto niining maong pundo sa salapi. Pagkamaayong espiritu ang gipakita niini! Hinumdomi, “may labawng kalipay sa paghatag kay sa pagdawat,” busa manikaysikay kitang tanan nga mahimong mga maghahatag ug dili kay mga magdadawat lamang pinaagig pagtabang sa ubang mga kongregasyon kutob sa atong maarangan.—Buh. 20:35.
13 Ang Mahinangpong Espiritu Gipabilhan: Ang mahinangpong espiritu ug kasibot sa mga igsoon sa pagtukod ug mga balay tigomanan maoy dayag, ingon sa gisulat sa usa ka grupo: “Pagkadakong kalipay ang pagsud-ong sa Koreano, Espanyol, ug nagasultig Ingles nga mga kongregasyon nga ang tanan nagabuhat ug maayo kaayo nga tingob diha sa nahiusang pagsimba kang Jehova!” Tinuod, gayod, ang mga pulong sa Salmo 133:1, 3: “Tan-awa! Pagkamaayo ug pagkaanindot gayod alang sa mga igsoon nga magpuyo sa tingob diha sa panaghiusa!”
14 Tungod sa pagpabili sa buluhaton nga nahimo sa Kingdom Hall sa usa ka kongregasyon, ang nagadumalang magtatan-aw misulat: “Tungod kay daghan kaayong tigulang nga mga igsoon niining kongregasyona, kining proyektoha dili gayod unta matapos sa among kaugalingong paningkamot lamang. Busa ang dakong pasalamat gipaabot kaninyo ug sa mga igsoon nga sama kaninyo nga mibati sa gugma ni Jehova ug kinsa dili lamang buot nga mobati niana, apan sa pagpakita niana. Kami moingon kaninyo among mga igsoon: ‘Padayona ang maayong buluhaton.’”
15 Ang mga Tigpaniid Nakadayeg: Ang dayag nga paglihok sa balaang espiritu ni Jehova diha sa mga igsoon nga nagatrabaho sa mga proyekto sa pagtukod sa Kingdom Hall nagsilbing usa ka pamatuod ngadto sa uban. Ang mga materyal alang sa usa ka balay-tigomanan gipalit gikan sa usa ka kompaniya nga tigpatigayon ug kahoy, ug sa ulahi ang manedyer misulat: “Dili ko makahinumdom nga labawng nakadayeg sa usa ka grupo sa mga tawo kay sa mga Saksi ni Jehova sa panahon sa proyekto. Kadto nakalipay ug nakapahinam alang kanako sa pagsaksi sa maong hitabo, ug nalipay ko nga nakahimo sa pagpakigbahin diha sa gamayng paagi. Kamo ug ang inyong mga tawo angayang dayegon, ug akong gipanghinaot ang dakong kalamposan sa inyong umaabot nga mga proyekto.”
16 Sa laing higayon, ang usa ka hawas sa usa ka tigsuplay gitudlo sa paggugol ug tulo ka adlaw uban sa proyekto sa Kingdom Hall. Siya miingon: “Ang akong kinabuhi nabuhong tungod sa akong pagpakig-uban kaninyo niining hinapos sa semana. Ang akong impresiyon sa mga Saksi ni Jehova nausab! Gibuhat ninyo ang labaw pa kay sa pagtuktok sa mga pultahan. Maoy usa ka pribilehiyo ang pagkabaton ug usa ka bahin. Ayawg katingala nga makita ko ninyo sa inyong pahayag publiko.”
17 Sa dihang ang usa ka proyekto nahuman, ang mayor misulat alang sa ngalan sa siyudad, nga nagkanayon: “Makapadasig ang pagsud-ong sa gatosan nga mga boluntaryo nga dungang nagabuhat sa pagtukod sa balay-tigomanan nga dali ra kaayo. Kini maoy usa gayod ka matahom nga tinukod. Ang mga pomuluyo sa palibot nagahisgothisgot bahin sa dali kaayong pagkatukod sa maong tinukod. Ang bag-ong Kingdom Hall maoy usa ka matuod nga dungog sa atong komunidad, ug kami mapasigarbohong modawat niini ug sa inyong kongregasyon.”
18 Ang mga Amot sa Panalapi Padayong Nagatabang: Ang mahinatagong mga amot ngadto sa Kingdom Hall Fund sa Sosyedad nagtabang sa mga kongregasyon sa nangagi ug seguradong magapadayon sa pagbuhat niana sa umaabot. Dili ba si Jehova mismo ang nagapanguna sa dili-mahakogong paghatag? (Sant. 1:17) Samtang tinuod man nga ang atong mga katakos sa paghatag magkalainlain, atong makaplagan nga pinaagig pagpasibo sa atong personal nga pagpanggasto, makahimo ta sa pagbaton ug bug-os nga pakigbahin sa pagsuportar sa pagtukod nga buluhaton. Kanang maong pagkamahinatagon magpalipay gayod sa kasingkasing ni Jehova, maingon man nga usa ka dakong pagdasig sa atong mga igsoon.
19 Sa pagkamauswagon, “ang tilinguhaong mga butang” nagaganayan ngadto sa espirituwal nga templo ni Jehova, ug siya ‘nagapuno sa iyang balay uban sa himaya.’ (Hag. 2:7) Sama sa matinunamong mga Judiyo sa panahon ni Haggeo, hinaot nga itumong ta ang atong mga kasingkasing sa buluhaton sa Diyos, nga bug-os nagasuportar sa panginahanglan alang sa dugang mga Kingdom Hall. Ang tingusbawan nagapadayon diha sa matulin nga kahimtang. Ang atong mapinadayonong pagpaluyo sa Kingdom Hall Fund sa Sosyedad maoy usa ekselenteng paagi sa pagpakig-ambit sa buluhaton sa Diyos.