Pagsangyaw—Usa ka Dungganong Pribilehiyo
1 Ang ministeryo sa maayong balita maoy usa ka dungganong pribilehiyo nga gihatag ni Jehova kanato. (Roma 15:16; 1 Tim. 1:12) Ingon ba niana ang imong pag-isip? Ang pagdala sa ngalan sa Diyos maoy usa ka dungog nga gihatag lamang sa pipila. Sa unsang paagi man nato mapadako ang atong pagpabili niining maong pribilehiyo?
2 Ang pagsangyaw sa mensahe sa Gingharian dili makadalag pag-uyon sa kalibotan kanato. Daghan ang nagaisip sa atong buluhaton uban ang kawalay-pagtagad o pagpanumbaling. Ang uban nagatamay ug nagasupak niana. Sa ilang mga mata daw mopatim-aw nga kita nasalaag ug buangbuang. (Juan 15:19; 1 Cor. 1:18, 21; 2 Tim. 3:12) Ang ilang makapaluyang mga komento gidesinyo aron pagbugnaw sa atong kasibot ug magpahinabo kanato sa pagbiya sa atong dungganong pribilehiyo. Ang negatibong mga panghunahuna gipasiugdahan ni Satanas, kinsa “nagbuta sa mga hunahuna sa mga dili-magtutuo, aron nga ang banwag sa mahimayaong maayong balita ... dili makalapos paglamdag.” (2 Cor. 4:4) Sa unsang paagi ikaw mosanong?
3 Maoy hinungdanon nga huptan sa hunahuna nga ang atong pagwali mahitungod sa Gingharian mao ang labing hinungdanong buluhaton nga pagahimoon ni bisan kinsa kanato karon. (Roma 10:13-15) Ang pagbaton sa pag-uyon sa Diyos, dili sa tawo, mao ang hinungdanong butang. Ang negatibong panglantaw sa kalibotan dili makapugong kanato sa maisogong pagmantala sa maayong balita.—Buh. 4:29.
4 Si Jesus nagpabili gayod sa iyang pribilehiyo sa pagbuhat sa kabubut-on sa iyang Amahan. (Juan 4:34) Wala niya tugoti ang mga pagbalda o mga magsusupak sa pagpahinay kaniya. Ang pagwali sa mensahe sa Gingharian kanunayng anaa sa unang dapit sa iyang kinabuhi. (Luc. 4:43) Kita gisugo sa pagsundog sa iyang panig-ingnan. (1 Ped. 2:21) Sa pagbuhat niana kita nagaalagad ingong “mga isigkamagbubuhat sa Diyos.” (1 Cor. 3:9) Bug-os ba natong gipahimuslan kining pribilehiyoa? Ingong mga Saksi ni Jehova, kinahanglang kanunay kitang andam sa “pagpahayag diha sa dayag sa iyang ngalan.”—Heb. 13:15.
5 Ang atong pagpakig-ambit sa ministeryo nagadepende ug dako sa atong tinamdan. Kita ba lawom nga nagapabili sa tanang nahimo ni Jehova alang kanato? Ato bang giugmad diha sa atong mga kasingkasing ang usa ka gugma kang Jehova nga magatukmod kanato sa pagbuhat sa tanan natong maarangan diha sa iyang pag-alagad? Kanang maong gugma makapalihok kanato nga magmalahutayon ug makanunayon sa pagwali-Ginghariang buluhaton ngadto sa gilapdon nga itugot sa atong mga kahimtang. Ang atong kasibot magahatag ug ebidensiya sa atong gugma alang kang Jehova ug sa atong silingan.—Mar. 12:30, 31.
6 Atong ikapakita kon giunsa gayod nato pagpabili ang usa ka butang pinaagi sa atong ginabuhat uban niana ug gisulti bahin niana. Gipabilhan ba gayod nato ang atong pribilehiyo sa pagsangyaw mahitungod sa Gingharian? Gihimaya ba nato ang atong ministeryo? Determinado ba kita sa pagpabilin niining hinungdanong buluhaton bisan pa sa pagsupak? Kon atong gipabilhan pag-ayo kining maong kahibulongang pribilehiyo, kita masiboton gayod ug bug-os-kasingkasing.—2 Cor. 4:1, 7.