Pangitaa ang mga Mahinangpon
1 “Walay tawo nga makaari kanako gawas kon ang Amahan, kinsa nagpadala kanako, magkabig kaniya. (Juan 6:44) Si Jehova magaganti niadtong mga mahinangpon. (Jer. 17:10; Juan 6:45) Anaa kanato ang pribilehiyo ingong iyang isigka-magbubuhat sa pagpangita niining maong mga maaghop.—Sal. 37:11; 1 Cor. 3:9.
2 Si Jesus naghubit sa iyang mga tinun-an ingong “mga mangingisda ug mga tawo.” (Mat. 4:19) Ang usa ka malamposong mangingisda angayng mahibalo kon unsay buhaton aron pagpaduol sa isda. Sa susama, kinahanglan natong iatubang ang mensahe sa makapadaning paagi diha sa mga balikduaw nga makapukaw sa interes sa atong mga tigpaminaw. Unsay atong isulti?
3 Kon gipakita ang interes diha sa mga, artikulo sa “Bantayanang Torre” nga nagahisgot sa relihiyon, makaingon ka:
◼ “Sa miagi atong nahisgotan kon nganong daghang tawo dili buot makighisgot ug relihiyon. Nahibulong ka ba kon nganong ang relihiyon maoy ingon niana ka lantugianan nga ulohan?” Tugoting motubag. Pakliang panid 362 sa librong Nangatarongan (p. 322 sa Ingles), ug hisgoti ang “Nganong Adunay Daghan Kaayong Relihiyon?”
4 Mahimong gamiton nimo ang samang paagi sa pagsugod ug usa ka panaghisgot diha sa ulohan sa relihiyon:
◼ “Aduna bay pipila ka paagi nga atong maseguro nga kita anaa sa matuod nga relihiyon? [Tugoting motubag.] Tungod kay daghan kaayong nagkalainlaing relihiyon, daghang tawo ang mibatig kalibog.” Paklia ang librong Nangatarongan, mga panid 368-9 (p. 328-9 sa Ingles), sa pangutanang “Sa Unsang Paagi Maila sa Usa ka Tawo kon Hain ang Hustong Relihiyon?” Sa mubo komentohi ang pangutana numero 5: “Ang mga membro ba niana nagahigugma gayod sa usag usa?” Ipatin-aw ang atong programa sa pagtuon sa Bibliya.
5 Kon ang tagbalay maorag nabalaka bahin sa mga kahimtang sa kalibotan, hayan buot nimong sulayan kini:
◼ “Dayag nga ikaw mibatig kabalaka bahin sa daotang mga kahimtang nga kinahanglan natong sagubangon sa pagkinabuhi ug pag-atiman sa atong mga pamilya. Ang Bibliya nagabutyag sa usa ka kahibulongang saad nga tumanon sa Diyos sa duol nga umaabot.” Basaha ang Proverbio 2:21, 22, ug isaysay ang saad sa malungtarong kalinaw sa kalibotan.
6 Kon nagahimog mga balikduaw human sa Abril 23, palihog seguroang makabilin ug usa ka kopya sa Kingdom News uban sa mga tagbalay nga wala pa niana. Kon unsa ang imong isulti sa pagpaloap sa mga napahimutang nga Kingdom News pagahisgotan sa Mayo nga gula sa Atong Ministeryo sa Gingharian.
7 Sanglit kay ang Pulong sa Diyos “gamhanang nagalihok,” angay natong sulayan nga gamiton kana sa atong mga presentasyon. (Heb. 4:12) Dasiga ang tagbalay sa pagbasa sa Bibliya mismo. (Itandi ang Buhat 17:11.) Kon kita makugihong nagabuhat sa atong bahin, si Jehova magapanalangin sa atong mga panikaysikay.