Tabangi Sila nga Walay Pagtuo
1 Niining panahona, nahimong popular ang pagaisipong edukado ug mauswagon diha sa panghunahuna. Ang tawhanong mga pilosopiya ug hinanduraw nga mga teoriya ginatuboy, samtang ang espirituwal nga mga hiyas ginasalikway. Ang sinserong mga tawo kinsa interesado sa yano ug masabtang mga kamatuoran magaabiabi sa kahigayonan sa pagsusi sa librong Life—How Did It Get Here? By Evolution or by Creation? Kining libroha makatabang kanilang walay pagtuo. (Roma 1:19, 20) Seguroang makahimog mga balikduaw sa tanang nagapakitag interes.
2 Mahimong sugdan nimo ang inyong panaghisgot niining paagiha:
◼ “Naseguro nako nga nahibalo ka nga daghang edukador nagasuportar sa pagtuo nga ang tawhanong pamilya mitungha dinhi pinaagig ebolusyon. Kini nagatudlo nga ang matag butang nagalungtad pinaagig aksidente. Unsay imong pagbati bahin niana? [Tugoting motubag.] Kining ideyaha gipunting gihapon ingong usa ka teoriya. Ang usa ka teoriya maoy ‘usa ka pagbanabana’ o ‘usa ka wala-mapamatud-ing panghunahuna.’ Sa kasiglohan ang mga tawo nagtuo nga ang yuta maoy lapad; karon kita nahibalo nga kadto maoy usa ka binuang nga pagbanabana nga wala mapasukad sa kamatuoran. Mahimo kahang ang ingon tinuod diha sa teoriya sa ebolusyon?” Basaha ang pasiunang mga komento sa panid 4, ug unya hisgoti ang Isaias 42:5.
3 O basin gamiton nimo kining paagiha sa dihang ikaw mobalik:
◼ “Maoy sagad ang paghibalag ug mga tawong wala magatuo sa Diyos. Mga katuigan kanhi, kana talagsa ra kaayo. Ngano kaha sa imong hunahuna nga daghan kaayong nawad-an sa pagtuo sa Diyos? [Tugoting motubag.] Daghan ang nagapasangil sa pagkawala sa ilang pagtuo ngadto sa makalilisang nga pag-uswag sa kapintasan ug kasamok sa atong kalibotan. Sila nangatarongan nga kon aduna pay labing-gamhanang Diyos, nganong wala man niya taposa kining tanang pag-antos? Silang wala makakaplag ug makatagbawng tubag nianang pangutanaha sagad nangahimong mga ateyista. Apan adunay nagasugwak nga ebidensiya sa pagpamatuod nga ang Diyos nagalungtad ug nga sa dili madugay iyang himoon ang yuta nga usa ka dapit sa kalipay ug kalinaw.” Ipadayon ang panaghisgot pinaagig paggamit sa Kasulatanhong mga panghunahuna nga makaplagan sa parapo 19 sa panid 196.
4 Nga nagagunit sa imong Bibliya, hayan buksan mo ang panaghisgot pinaagig pag-ingon:
◼ “Kami nagaduaw pag-usab aron ipasiugda kon nganong mapuslanon ang usa ka pagtuon sa Bibliya sa atong kapanahonan. Kadaghanang tawo may Bibliya, apan pipila ang nagagahin ug panahon sa pagbasa niini. Ang pipila prangkang mosulti namo nga wala na silay dakong pagsalig sa Bibliya. Unsay imong pagbati bahin niana? [Tugoting motubag.] Usa sa mga butang nga magadani kanato nga ang Bibliya mao ang inspiradong Pulong sa Diyos mao ang katumanan sa mga tagna niini.” Ipunting ngadto sa Kasulatanhong mga teksto sa parapo 6 sa panid 234.
5 Kining panghunahunaa hayan makakuhag mauyonong pagsanong:
◼ “Atong makita ang katahom ug kahibulongang ebidensiya sa kaalam sa mga butang nga nagalibot kanato niining yutaa. Kining matahom nga hulagway sa usa ka pagsalop sa adlaw maoy haom nga panig-ingnan.” [Ipakita ang ilustrasyon sa mga panid 12 ug 13.] Hisgoti ang mga puntos gikan sa “Some Things to Think About” ug isaysay kon sa unsang paagi kining libroha nagataganag makatagbawng mga tubag sa hinungdanong mga pangutana mahitungod sa atong kalibotan.
6 Kita mahimong usa ka panalangin ngadto sa uban pinaagig paggamit niining libroha sa pagtabang kanila sa pagkaplag ug solidong pasukaranan alang sa pagtuo sa ilang Maglalalang.