Si Jehova ang Atong Maglalalang
1 Minilyon sa katawhan nagatuo nga ang Diyos naglalang sa kinabuhi. Daghan pang uban ang nagatuo sa ebolusyon. Unya anaa kadtong kinsa wala makaseguro kon unsay tuohan. Ang librong Life—How Did It Get Here? By Evolution or by Creation? maoy alang nianang mga tawhana. Kining basahona nagapresentar ug bug-os nga pagkadukiduki nga saysay kon sa unsang paagi ang kinabuhi mitungha dinhi ug kon unsay kahulogan niini sa atong kaugmaon. Sa Hunyo, atong igapaila kining maong nindot nga basahon.
2 Bisan ang mga prominente diha sa siyentipikanhong komunidad miila sa talagsaong lohika sa libro. Ang usa ka siyentipikanhong tigpangdukiduki sa Netherlands misulat: “Kining libroha milabaw gayod sa tanang pagdahom. Ang lohikal nga pagkatagik sa mga kapitulo ug ang mga ilustrasyon maoy siyentipikanhon kaayo nga nunot-panahon nga kinahanglan kang mahimong buta aron makapatunghag bisan unsang mga pagsupak ngadto niana.” Ang usa ka abogado mipahayag: “Akong nabasa kini sa upat ka beses ug padayong nahaylo sa kalawom sa pagtuon, kinaadman ug dokumentasyon nga gihimo sa paggama niini.” Busa kita makasalig nga magapabili pa ang uban niining libroha.
3 Hayan pilion nimong maghimog usa ka mubong presentasyon nga sama niini:
◼ Paklia ngadto sa panid 6, ug moingon: “Daghang tawo nagahunahuna nga ang atong matahom nga yuta ug ang kinabuhi niana misangpot gikan sa usa ka aksidente. Unsay imong gihunahuna nga makataronganong saysay kon sa unsang paagi kining tanan mitungha? [Tugoting motubag.] Ang daghang ebidensiya nagapamatuod sa asoy sa Bibliya bahin sa usa ka Maglalalang nga dili lamang kay gamhanan kaayo apan nahigugma usab kaayo kanato. Siya maoy matuod nga Diyos, ug ang iyang ngalan mao si Jehova.” Basahang Salmo 83:18, ug sa mubo isaysay kon sa unsang paagi maoy iyang katuyoan nga balhinon ang tibuok yuta ngadto sa usa ka paraiso.
4 Kon buot nimong moderetso dayon sa punto, makaingon ka:
◼ “Nahibulong ka ba sukad bahin niining pangutanaha?” Ipunting ngadto sa titulo, paklia ngadto sa panid 7, basaha ang mga pangutana sa parapo 2, ug ipatin-aw nga ang libro nagataganag makatagbawng mga tubag gikan sa Bibliya.
5 O mahimong sulayan nimo kini:
◼ “Nahibulong ka ba kon sa unsang paagi mitungha ang yuta? Daghan ang moinsister nga kini maoy resulta sa pipila ka dagkong kosmikong pagbuto. Unsay imong hunahuna? [Tugoting motubag.] Ang Bibliya nagatudlo nga ang Diyos naglalang sa yuta ingon nga atong walay kataposang puy-anan. Kini lahi gikan sa ubang mga planeta sa atong solar nga sistema. Segon sa atong nasayran, mao lamang kini ang usa diha sa uniberso nga anaa ang tanang makuting tagana nga kinahanglanon sa pagsustento sa kinabuhi.” Paklia ngadto sa parapo 5 sa panid 130, ug isaysay kon nganong ang yuta mao gayoy buhat sa usa ka Batid nga Tigdesinyo.
6 Ang laing paagi mahimong sama niini:
◼ “Ang pipila ka tawo nagahunahunang kita nagagikan sa ‘aliwas-tawo.’ Matod nila ang atong mga kagikanan ingon niini tan-awon. [Ipakita ang hulagway sa panid 89.] Unsay imong hunahuna bahin niana?” Tugoting motubag. Ipunting ang giingon sa parapo 20, ug unya basaha ang Buhat 4:24, diin nagapaila kang Jehova ingong atong Maglalalang ug Taghatag-Kinabuhi. “Kining libroha nagasusi sa tibuok teoriya sa ebolusyon maylabot sa kon unsay giingon sa Bibliya.” Hisgoti ang mga kaundan sa panid 5, ug ipunting ang pipila ka ulohan, sama nianang sa mga kapitulo 1, 7, 15, ug 19.
7 Kining libroha mahimong usa ka panalangin ngadto sa sinserong mga tawo nga nalimbongan nilang walay pagtuo kang Jehova o sa iyang Pulong. Ang tinuod nga impormasyon nga nasulod sa librong Creation makatabang kanila sa pagtubo diha sa pagpabili sa atong Maglalalang, kinsa mahigugmaong nagatagad kanato.