Imantala ang Kamatuoran sa Adlaw-adlaw sa Pagsundog Kang Jesus
1 Si Jesus adunay tinong buluhaton nga tumanon sa dihang siya mianhi sa yuta ‘aron mopamatuod sa kamatuoran.’ (Juan 18:37) Kining buluhatona nahisamag pagkaon alang kaniya. (Juan 4:34) Gitaho ni Lucas nga si Jesus padayong “nanudlo adlaw-adlaw sa templo.” Wala madugay una pa sa iyang kamatayon, nakahimo siya sa pagpahayag ngadto sa iyang Amahan: “Nahimaya ko ikaw dinhi sa yuta, nga nakatapos sa buluhaton nga imong gihatag kanako aron buhaton.”—Juan 17:4.
2 Sa dihang ang atong mga kasingkasing mapuno sa apresasyon alang sa tanang nahimo ni Jehova, kita usab mobating natukmod sa pagsulti bahin kaniya sa adlaw-adlaw. Kita mahimong sama gayod sa mga tinun-an ni Jesus nga maisogong mipahayag: “Dili kami makahunong sa pagsulti sa mga butang nga among nakita ug nadungog.” (Buh. 4:20) Ang ilang pagsulti bahin kang Jehova mapinadayonon, kay ang rekord nag-ingon nga “matag adlaw . . . sila nagpadayong walay hunong.” (Buh. 5:42) Angay natong suknaon ang atong kaugalingon, ‘Tigsundog ba ako sa akong Magtutudlo, si Jesus?’
3 Pagsangyaw Uban ang Pagkadinalian: Gitagna ni Jesus nga sa dihang ang mensahe sa Gingharian gikamantala na sa tibuok kalibotan, “unya moabot ang kataposan.” (Mat. 24:14) Kini angayng magdasig kanato sa kabililhon ug kadinalian sa atong buluhaton. Sanglit ang kataposan haduol na, ang panahong nahibilin sa pagtuman niining buluhatona gipakubsan!
4 Ang mga taho nagpakita nga ginapadali ni Jehova ang pagpanigom nga buluhaton. (Isa. 60:22) Sa daghang kayutaan, ang mga tawo nagpanon ngadto sa kamatuoran, nga nagapahayag: “Kami mouban kaninyong katawhan, kay kami nakadungog nga ang Diyos nagauban kaninyo.” (Zac. 8:23) Ang mga pulong ni Jesus tinuod: “Dako ang anihon, apan diyutay ang mga mamumuo . . . Pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.”—Mat. 9:37, 38.
5 Ipahibalo ang Kamatuoran Adlaw-Adlaw: Matag adlaw kinahanglang mangita kitag mga paagi sa pagpaambit sa kamatuoran ngadto sa uban. Makatelepono ka bag usa ka higala? O makasulat? Komosta ang bahin sa pagtanyag ug usa ka tract ngadto sa tindera/tindero sa dihang ikaw nagapamalit? Lagmit adunay ubang mga kahigayonan diin kita makapaambit sa atong paglaom ngadto sa uban.
6 Matag adlaw kinahanglang atong sundogon ang tinamdan ni Jesus, nga misaysay kon nganong siya gipadala dinhi sa yuta: “Kinahanglan kong ipahayag ang maayong balita sa gingharian sa Diyos.” (Luc. 4:43) Kon buot natong mahisama sa atong Magtutudlo, buot natong buhaton ang sama.—Luc. 6:40.