“Tabang sa Hustong Panahon”
1 Pagkamakapahupay ang pagdawat ug tabang sa dihang kita nanginahanglan gayod niana! (Heb. 4:16) Sa “Mga Mensahero sa Diyosnong Pakigdait” Distritong Kombensiyon, kita nalipay sa dihang gihatagan kita sa duha ka linaing tagana sa tabang sa husto gayong panahon.
2 Ang bag-ong libro nga, Ang Sekreto sa Kalipay sa Pamilya, midangat sa hustong panahon. Nagapunting kini sa upat ka kinahanglanon sa pagpalambo sa malipayon pamilyahanong kinabuhi: (1) Pagpugong sa kaugalingon, (2) pag-ila sa pagkaulo, (3) maayong komunikasyon, ug (4) gugma. Ang pahimangno nga gitanyag sa Kalipay sa Pamilya nga libro makatabang sa tanang pamilya nga magpadapat niana sa pagkaplag ug diyosnong kalinaw. Gahinig panahon ang pagbasa sa bag-ong libro nga maampingon ug tun-i kana nga tingob ingong pamilya. Sinatia pag-ayo ang mga bahin niini aron maandam ka sa paggamit niana nga epektibo kon itanyag na kini sa publiko sa unang higayon, sa Marso.
3 Ang bag-ong brosyur nga, Unsay Gikinahanglan sa Diyos Kanato?, nahidangat sa hustong panahon aron motabang sa pagpadali sa atong buluhaton sa paghimog tinun-an. Bisan tuod kini ilabinang gamiton sa pagtabang sa mga tawong may limitadong katakos sa pagbasa, daghang makabasa nga mga hamtong ug kabataan makabenepisyo usab gikan sa yanong saysay niini sa pasukaranang mga pagtulon-an sa Bibliya. Hayan mao lamang kini ang gikinahanglan sa pagsugod ug usa ka pagtuon ingong tikanganan ngadto sa Kahibalo nga libro. Kini nga tagana tinong makatabang sa daghan pa sa pagpabili kon unsaon nga sila mapanalanginan sa madagayaon pinaagi sa pagbuhat kon unsay gikinahanglan sa Diyos.
4 Sa unsang paagi ang mahigugmaong “tabang sa hustong panahon” ni Jehova magpabati kanato? Gipahayag ni David ang atong mga pagbati sa bug-os sa dihang siya mipahayag nga ‘walay nakulang kaniya, ang iyang kalag nahupayan, ug ang iyang kopa nagaawas!’ (Sal. 23:1, 3, 5) Kita malipayong nagalantaw sa unahan sa pagpasa niining kahibulongang espirituwal nga tabang ngadto sa daghang uban pa kinsa sinserong nagatinguha nga makaila ug makaalagad sa matuod nga Diyos, si Jehova.