Pagtabang sa mga Pamilya sa Paghupot ug Malungtarong Kaugmaon
1 “Ang kadalo maayo,” matod pa sa usa ka tigpamuhonan sa mograduwaray nga klase sa kolehiyo, nga midugang: “Puwede kang magdinalo ug sa gihapon mahimong mobati ka ug maayo sa imong kaugalingon.” Mao kini ang kinaiyanhong paagi kon giunsa pagpalambo sa kalibotan ang interes-sa-kaugalingon ingong paagi sa pagseguro sa kaugmaon sa usa. Sa kasukwahi gayod, si Jesus nagtudlo nga ang usa ka Kristohanon kinahanglang ‘magadumili sa iyang kaugalingon . . . kay unsa ba unyay kaayohan ngadto sa usa ka tawo kon iyang maangkon ang tibuok kalibotan apan mawad-an sa iyang kalag?’ (Mat. 16:24-26) Aron maseguro ang dumalayong umaabot, kinahanglang isentro sa usa ka tawo ang iyang tibuok kinabuhi sa pagbuhat sa kabubut-on sa Diyos—ang labing bililhong tumong sa mga pamilya karong adlawa. (Sal. 143:10; 1 Tim. 4:8) Kanang mensahea gipatugbaw sa paniklop nga kapitulo sa librong Ang Sekreto sa Kalipay sa Pamilya. Kining bag-ong publikasyon makatabang sa mga pamilya aron masabtan kon unsa gayod ang importante sa kinabuhi. Sa Marso, unsa may atong ikasulti sa pagdasig niadtong atong ikasugat aron mobasa sa Kalipay sa Pamilya nga libro? Aniay pipila ka sugyot:
2 Sa pultahan man ug diha sa dalan, hayan masulayan nimo ang paggamit sa tract nga “Magkalipay sa Kinabuhing Pamilyahanon” sa pagsugod ug mga panaghisgot. Ikaw makaingon:
◼ “Tungod sa tanang kabalaka sa modernong kinabuhi, gibati ba nimong posible ang pagbaton ug tinuod nga malipayong kinabuhing pamilyahanon? [Tugoting motubag.] Kini nga tract nagapasalig kanatong kini posible. Buot ba nimong basahon kini?” Kon kini dawaton, makapadayon ka sa pag-ingon: “Sanglit interesado ka niining ulohana, malipay ka usab niining libroha nga nagahatag ug detalyadong tambag kon unsaon sa pagkaplag sa kalipay diha sa pamilya.” Ipakita ang kaundan sa Kalipay sa Pamilya nga libro. Ipunting ang pipila ka ulohan sa kapitulo. Paklia sa panid 10, ug basaha ang gikan sa kataposang tudlingpulong sa parapo 17 ngadto sa kataposan sa parapo 18. Itanyag ang libro. Hikaya ang usa ka balikduaw aron hisgotan kini sa dugang.
3 Imong mapaloap ang imong unang panaghisgot bahin sa malipayong kinabuhing pamilyahanon sa pag-ingon:
◼ “Aduna akoy gustong ipasiugda diha sa libro nga imong nakuha nga sa akong hunahuna imong maangayan. Ang kataposang kapitulo nagasaysay sa tinuod nga sekreto sa kalipay sa pamilya. [Basaha ang parapo 2 sa panid 183.] Matikdi nga ang duyog nga pagbuhat sa kabubut-on sa Diyos mao ang yawi. Among girekomendar nga ang mga pamilya magtuon sa Bibliya nga tingob aron makakat-on kon unsa ang kabubut-on sa Diyos ug kon unsaon sa pagpadapat niana diha sa panimalay. Nagatanyag kami ug libreng kurso sa pagtuon sa Bibliya nga makompleto kana sa pipila ka bulan lamang. Kon tugotan mo ako, akong ipasundayag nimo kon giunsa kini pagdumala.” Balik nga dala ang brosyur nga Unsay Gikinahanglan sa Diyos Kanato? o ang Kahibalo nga libro, bisan unsa nga mas haom.
4 Sa dihang nagapakigsulti ngadto sa mga klasmet sa tunghaan o sa mga batan-on sa teritoryo, hayan madawat mo ang sanong niining pangutanaha:
◼ “Unsa ka bililhon alang sa mga ginikanan ug kabataan ang padayong paghupot nga bukas ang linya sa komunikasyon sa usag usa? [Tugoting motubag.] Matikdi kon unsay giingon niining basahona maylabot sa kinabuhi sa pamilya bahin sa ulohang ‘Matinud-anon ug Prangkang Komunikasyon.’ [Basaha ang tanan sa parapo 4 ug ang unang tudlingpulong sa parapo 5 sa panid 65 sa Kalipay sa Pamilya nga libro.] Ang mga parapo nga mosunod nagahatag ug praktikal nga mga sugyot kon unsaon pagpauswag sa komunikasyon sulod sa pamilya. Kon buot kang mobasa niining libroha, mahimong makabaton ka ug kopya sa gamayng amot.” Saysayi nga mobalik ka sa sunod aron paminawon ang iyang mga komento kon unsay iyang nabasa.
5 Imong maugmad ang imong pasiunang panaghisgot uban sa usa ka batan-on bahin sa ginikanan-anak nga komunikasyon sa pag-ingon niini:
◼ “Gidayeg ko ang imong gipakitang interes sa kabililhon sa pagbaton ug maayong komunikasyon sulod sa imong pamilya. Unsay imong ikasulti nga mao ang labing importanteng ulohan nga angayng mahisgotan sa mga ginikanan ug kabataan?” Tugoting motubag. Dayon paklia sa panid 68 sa Kalipay sa Pamilya nga libro, ug basaha ang tubag sa unang katunga sa parapo 11. “Ang paghimog senemanang pagtuon sa Bibliya mao ang ekselenteng paagi sa pagbaton ug kahibalo sa Diyos.” Ipresentar ang brosyur nga Unsay Gikinahanglan sa Diyos Kanato? Isaysay nga ang 16 ka leksiyon niini nagatagana ug paninugdang laraw sa mensahe sa Bibliya. Basaha ang introduksiyon sa panid 2, ug dayon itanyag nga sugdan ang pagtuon sa unang leksiyon.
6 Kon makasugat ka ug usa ka ginikanan diha sa buluhatong pamalaybalay, o tingali sa usa ka parke, hayan maugmad nimo ang interes sa pag-ingon:
◼ “Nakaseguro ko nga mouyon ka nga ang pagmatuto sa mga bata karong adlawa usa ka tinuod nga hagit. Sa imong hunahuna unsa may makapanalipod sa imong pamilya gikan sa daotang mga impluwensiya? [Tugoting motubag.] Aniay pipila ka ekselenteng tambag nga akong giapresyar.” Isaysay ang ilustrasyon sa parapo 1 ug basaha ang parapo 2 sa panid 90 sa Kalipay sa Pamilya nga libro. Isaysay kon sa unsang paagi kini nagahatag ug timbang nga direksiyon nga epektibo gayod aron mapanalipdan ang mga pamilya gikan sa makadaot nga mga impluwensiya. Itanyag ang libro ug hikaya ang pagbalik aron hisgotan ang bisan unsang mga pangutana nga hayan motungha.
7 Sa imong ikaduhang pagbalik sa usa ka ginikanan nga midawat sa “Kalipay sa Pamilya” nga libro, makapadayon ka sa panaghisgot niining paagiha:
◼ “Sa atong unang paghibalag, nasabot nakong ikaw tiunay nga nagaamoma sa imong mga anak ug buot nga panalipdan sila gikan sa sayop nga mga impluwensiya. Mahimong wala pa nimo mabasa kana, apan adunay bililhon kaayong punto diha sa libro nga akong nabilin nimo nga kinahanglang imong makita. [Basaha ang parapo 19 sa panid 59.] Ang pag-ugmad ug usa ka relasyon uban sa Diyos nagapasabot sa pagkaila kaniya pinaagi sa mga panid sa Bibliya. Buot ba nimong akong ipasundayag kon unsaon namo pagtuon ang Bibliya ingong usa ka pamilya?”
8 Ang kalibotanong mga magtatambag dili makapakita sa mga pamilya sa dalan ngadto sa kalipay apan tinong magpahiubos kanila. Atong iapod-apod pag-ayo ang Kalipay sa Pamilya aron ang mga tawo bisan diin matabangan pinaagi sa Pulong sa Diyos nga makabaton sa usa ka malipayon ug malungtarong kaugmaon.—1 Tim. 6:19.