Itanyag ang Librong Kalipay sa Pamilya Ngadto sa mga Tawo sa Tanang Pangedaron
1 Usa ka 11-anyos-edad nga batang lalaki gikan sa California mipahayag sa iyang pagpabili sa librong Ang Sekreto sa Kalipay sa Pamilya. Siya misulat: “Ako mapasalamaton niana, ug akong dasigon ang ubang mga pamilya sa pagbasa niining libroha tungod kay kini maayo kaayo. Nakatabang . . . kini sa akong pamilya sa pagkaplag ug kalinaw ug kalipay diha sa among panimalay.” Kining kasinatian sa batan-on angayng magdasig kanato sa pagtanyag sa Kalipay sa Pamilya nga libro ngadto sa mga tawo sa tanang pangedaron. Aniay pipila ka sugyot nga hayan buot mong sulayan sa imong ministeryo sulod sa Pebrero.
2 Sa dihang makahimamat ug batan-on, ikaw hayan makaingon:
◼ “Daghan sa sama nimog edad ang nagahunahuna bahin sa kaminyoon. Apan asa ka makakaplag ug kasaligang impormasyon bahin sa ulohan? [Tugoting motubag.] Ang mga batan-on sagad moingon nga di sila segurado kon andam na ba sila sa kaminyoon. Tugoti akong ipaambit kanimo kon unsay giingon niining libroha bahin sa ulohan.” Paklia sa panid 14 sa Kalipay sa Pamilya nga libro, ug basaha ang parapo 3. Dayon itudlo ang matag sub-ulohan diha sa kapitulo. Itanyag ang libro, ug hikaya ang pagbalik.
3 Sa dihang makigsultig ginikanan, ikaw makaingon:
◼ “Among ginapaambit sa mga ginikanan ang pipila ka praktikal nga mga giya nga mosaler gayod sa pagmatuto ug kabataan. Gitagik kini niining librong Ang Sekreto sa Kalipay sa Pamilya.” Paklia sa panid 55. Basaha ang parapo 10, sundan sa Deuteronomio 6:6, 7, sa parapo 11. Dayon itudlo ang giitaliko nga mga tudlingpulong diha sa mga parapo 12 ngadto sa 16. Padayon pinaagi sa pag-ingon: “Kining libroha nakatabang sa daghan sa pagkab-ot ug mas dakong kalamposan ingong mga ginikanan. Kon buot mong mobasa niini, malipay akong ibilin nimo kining kopyaha sa gamay nga amot.”
4 Sa dihang makigsulti sa usa ka tigulang, ikaw makaingon:
◼ “Human sa akong pagbasa niining mubong komento, palihog sultihi ako kon unsay imong hunahuna.” Buksi ang Kalipay sa Pamilya nga libro sa panid 169, basaha ang unang duha ka tudlingpulong sa parapo 17. Dayon pangayoa ang tubag. Depende sa tubag, mahimong basahon mo ang dugang mga pangutlo gikan sa libro sa dili pa itanyag kana.
5 Sa dihang sundalon ang mga napahiluna nga Kalipay sa Pamilya nga libro, hinumdomi ang pagsulay sa pagsugod ug pagtuon sa Bibliya. Ang Leksiyon 8 diha sa Gikinahanglan nga brosyur o kapitulo 15 diha sa Kahibalo nga libro hayan maoy haom nga dapit sa pagsugod. Sa kasamtangan, kita manlimbasog sa pagtabang sa mga tawo sa tanang pangedaron sa pagtukod ug usa ka malipayon Kristohanong kinabuhi sa pamilya.