Ipaambit sa Uban Ang Sekreto sa Kalipay sa Pamilya
1 Ang pamilya mao ang paninugdang yunit sa tawhanong katilingban, ug gikan sa pamilya motungha ang mga baranggay, mga siyudad, mga probinsiya, ug tibuok nga mga nasod. Karon ang yunit sa pamilya nailalom sa pagpig-ot kay sukad masukad. Ang gamhanang mga puwersa nagahulga sa mismong paglungtad sa pamilyahanong kinabuhi. Pagkamapasalamaton nato nga si Jehova, ang Tigdisenyo sa kahikayan sa pamilya, nagtagana kanatog mga instruksiyon aron atong makab-ot ang kalipay sa pamilya! Kadtong mosunod sa iyang mga lagda makakaplag nga ang mga suliran mamenosan ug ang malamposong yunit sa pamilya moresulta. Sa Septiyembre kita adunay pribilehiyo sa pagpaambit ngadto sa uban sa librong Ang Sekreto sa Kalipay sa Pamilya. Himoa ang unang tikang sa pagduol sa mga tawo maylabot sa tema sa kinabuhi sa pamilya. Magmahigalaon, positibo, ug masinaboton. Unsa kahay imong isulti?
2 Makasugod ka pinaagig pagsuknag usa ka pangutana, sama sa:
◼ “Namatikdan ba nimong daghang pamilya ang nalisdan sa pagsagubang sa mga kapit-os sa kinabuhi? [Tugoting motubag.] Ang mga taho nagpakita nga daghang tawo nakasinatig mga kalisdanan sa panimalay. Unsay imong gituohan nga makatabang sa mga pamilya sa pagkaplag ug mas dakong kalig-on ug kalipay? [Tugoting motubag.] Sanglit gitukod sa Diyos ang kahikayan sa pamilya, dili ba makataronganon ang pagsusi sa mga lagda nga iyang gihatag? [Basaha ang 2 Timoteo 3:16, 17.] Ang maong makaayong instruksiyon gitagik niining libroha, Ang Sekreto sa Kalipay sa Pamilya.” Dayon suknaa ang indibiduwal kon unsay iyang gibati nga maoy kasagarang suliran sa pamilya, ipakita ang kapitulo nga naghisgot nianang sulirana, ug itanyag ang libro.
3 Sa pagbalikduaw, hayan mapadayon mo ang tumong sa pagsugod ug pagtuon sa Bibliya sa pag-ingon:
◼ “Naghunahuna ko bahin sa imong giingon maylabot sa tema sa kinabuhi sa pamilya, ug aniay akong gidala kanimo nga sa akong hunahuna imong maangayan. [Ipakita ang Gikinahanglan nga brosyur, paklia sa panid 16, ug basaha ang unom ka pangutana sa ibabaw.] Tin-aw kaayo, ang matag usa diha sa pamilya kinahanglang mobuhat sa iyang bahin aron makatampo sa kalipay sa pamilya. Kon aduna ka ing pipila ka minutos lamang, akong ikapasundayag kon unsaon mo pagkuha sa labing maayo gikan niini nga impormasyon.” Dayon sugdi ang pagtuon sa leksiyon 8.
4 Ang laing paagi sa pagsugod ug panaghisgot mao ang paghisgot ug usa ka suliran, tingali sa pag-ingon nga:
◼ “Bisan tuod ang matag usa buot nga mopahimulos sa pagkakontento ug katagbawan, maorag daghang pamilya wala gayod molampos niini. Sa imong hunahuna unsay makatabang kanila sa pagkaplag sa tinuod nga kalipay? [Tugoting motubag.] Dugay na kanhi, gibutyag sa Bibliya kon unsang matanga sa mga suliran ang atong makita sa mga pamilya karon. [Basaha ang 2 Timoteo 3:1-3.] Bisan pa niana, ang Bibliya usab nagasulti sa mga pamilya kon unsay buhaton sa pagsulbad niining mga sulirana ug sa pagbaton sa dumalayong kalipay. Ang mga prinsipyo niini gipakita niining libroha, Ang Sekreto sa Kalipay sa Pamilya.” Dayon ipakita ang kahon sa pagsubli sa hinapos sa tukmang kapitulo, basaha kana, ug itanyag ang libro.
5 Sa imong pagbalik, gamita ang “Gikinahanglan” nga brosyur sa pagsugod ug pagtuon. Ikaw makaingon:
◼ “Nahimuot ako sa imong kahinangop sa pagsusi sa mga prinsipyo sa Bibliya nga mapadapat sa kinabuhi sa pamilya. Ang kasinatian nagpakita nga ang labing maayong mga resulta nakab-ot pinaagig pagsunod sa praktikal nga tambag nga nakaplagan diha sa Bibliya. Aniay yanong saysay kon nganong ingon niana.” Basaha ang unang parapo sa leksiyon 1 diha sa Gikinahanglan nga brosyur, lakip ang bisan hain sa Salmo 1:1-3 o Isaias 48:17, 18. Kon itugot sa higayon, tagda ang nahibilin sa leksiyon. Ingna nga mobalik aron duyog nga tun-an ang sunod nga leksiyon.
6 Bahin sa mga Amot: Sa dihang magpahilunag literatura, magduhaduha ka ba usahay sa paghisgot sa amot nga atong ginapangayo alang sa literatura? Maayong hinumdoman nga bililhon ang atong literatura, ug mahal ang pagpatik. Mao kanay hinungdan nga buot natong segurohon ang pagsaysay sa atong boluntaryong buluhaton ug ang rason sa atong pagpangayog amot. Makatabang kini kanila sa pagkaamgo nga wala kita mamaligyag literatura ug maghatag kanilag kahigayonan sa paghimog diyutayng amot alang sa atong tibuok kalibotang buluhaton.
7 Human makatanyag ug “Kalipay sa Pamilya” nga libro, pananglitan, ikaw makasulti niini:
◼ “Ang pagpatungha sa among literatura gihimo pinaagig boluntaryong mga trabahante ug gisuportahan sa boluntaryong mga amot. Mao kanay hinungdan nga kami mangayog diyutayng amot sa pagtabang sa paghulip sa mga gasto sa pagpatik ug maingon man sa materyales sa pagpadala niini nga literatura sa tibuok kalibotan. Ang imong amot makatabang sa among tibuok kalibotang buluhaton ug makaabag sa uban nga makadawat niining maayong impormasyon.” Pinaagig pagpresentar niining paagiha, kita makasalig nga apresyahon ang literatura ug kita dili lantawon nga mga tigpamaligya lamag libro.
8 Kita manikaysikay sa atong tanang maarangan sa pagpaambit sa uban sa sekreto nga motultol sa kalipay sa pamilya—nga nagatuman sa mga instruksiyon nga gipahiluna diha sa Pulong sa Diyos.—Sal. 19:7-10.