Pangutana

◼ Unsay angayng buhaton sa dihang ang katalagman mohampak nga makaapektar sa mga igsoon?

Kon ang Katalagman Mohampak sa Imong Dapit: Ayawg kalisang. Pagpabiling kalmado, ug tagda kon unsa gayod ang bililhon​—kinabuhi, dili mga kabtangan. Atimana ang dinaliang pisikal nga mga panginahanglan sa imong pamilya. Dayon pahibaloa ang mga ansiyano bahin sa imong mga kahimtang ug presenteng nahimutangan.

Ang mga ansiyano ug ministeryal nga mga alagad nagadula ug hinungdanong papel sa pagtagana ug hinabang. Kon ang pasiunang pasidaan sa usa ka katalagman gihatag, sama sa mga bagyo, kining mga igsoona kinahanglang magtino nga ang matag usa maanaa sa luwas nga dapit, ug kon itugot sa panahon, kinahanglang magkuha ug mag-apod-apod sa mga abiyo nga hayan gikinahanglan.

Human niana, ang mga tigdumala sa pagtuon sa libro kinahanglang magsusi sa matag pamilya ug mangomosta sa ilang kahimtang. Ang nagadumalang magtatan-aw o laing ansiyano kinahanglang pahibaloon sa kahimtang sa matag panimalay, bisan kon maayo ra ang tanan. Kon may usang nasamdan, ang mga ansiyano maningkamot sa paghikay ug medikal nga pag-atiman. Itagana usab nila ang bisan unsang materyal nga mga butang sama sa pagkaon, besti, puy-anan, o mga abiyo sa panimalay nga gikinahanglan. (Juan 13:35; Gal. 6:10) Ang lokal nga mga ansiyano motaganag espirituwal ug emosyonal nga pagpaluyo sa kongregasyon ug maghikay sa labing daling maarangan nga mapadayon ang mga tigom sa kongregasyon. Tapos mahimo ang bug-os nga pagsusi, kinahanglang kontakon gayod sa ansiyano ang magtatan-aw sa sirkito aron pahibaloon siya sa bisan unsang mga kadaot, guba sa Kingdom Hall o sa kabalayan sa mga igsoon. Susihon dayon sa magtatan-aw sa sirkito ang ubang mga kongregasyon aron makita kon unsa ka kaylap ang suliran, human niana iyang teleponohan o telegramahan ang sangang opisina nga itaho ang kahimtang.

Kon ang Katalagman Mohampak sa Laing Dapit: Hinumdomi ang naapektohang mga igsoon diha sa imong mga pag-ampo. (2 Cor. 1:8-11) Kon buot kang mohatag ug tabang nga salapi, imong ikapadala ang imong mga donasyon ngadto sa Sosyedad, diin ang usa ka hinabang nga salapi gigahin alang niini nga katuyoan. Ang adres maoy: Watch Tower Society, P. O. Box 2044, 1060 Manila. (Buh. 2:44, 45; 1 Cor. 16:1-3; 2 Cor. 9:5-7; tan-awa ang Disyembre 1, 1985, Watchtower, mga panid 20-2.) Ayaw pagpadala ug materyales o mga abiyo ngadto sa dapit sa katalagman gawas kon espesipikong gihangyo sa tinugyanang mga igsoon. Malikayan niini ang kaguliyang ug magpaseguro sa hustong pag-apod-apod kon unsay gikinahanglan.​—1 Cor. 14:40.

Human mahimo ang hustong pagbanabana (pagtasal), tinoon sa Sosyedad kon ang komite sa hinabang kinahanglan bang pormahon. Ang responsableng mga igsoong lalaki pahibaloon. Ang tanan kinahanglang makigtambayayong sa mga ansiyano aron ang dihadihang mga panginahanglan sa tanang igsoon igong matagan-an.​—Tan-awang Mga Saksi ni Jehova​—Mga Magmamantala sa Gingharian sa Diyos, mga panid 310-15.