Dapita Sila sa Pagtambong

¹ Ang pagdapit nga gihimo kasiglohan kanhi ginapalanog karon diha sa 233 ka kayutaan sa tibuok kalibotan: “Umari kamo, ug manungas kita sa bukid ni Jehova, . . . ug kita pagatudloan niya sa iyang mga dalan, ug manglakat kita sa iyang mga alagianan.” (Isa. 2:3) Ang pagtultol sa mga tawo ngadto sa organisasyon ni Jehova mao ang usa sa labing maayong mga paagi nga kita makatabang kanila sa paghimog espirituwal nga pag-uswag nga motultol sa kinabuhing walay kataposan.

² Ang pipila ka magmamantala tingali magpanuko sa pagdapit sa mga tawo ngadto sa Kingdom Hall hangtod human nga sila magpakitag dakong pag-uswag diha sa pagtuon sa Bibliya sa balay. Bisan pa niana, usahay ang mga tawo mosugod sa pagtambong sa mga tigom sa kongregasyon bisan wala pa masugdi ang pagtuon sa Bibliya uban nila. Kinahanglang dili kita maglangan sa pagpaabot sa mainitong pagdapit ug pagdasig sa mga tawo sa pagtambong sa mga tigom.

³ Kon Unsay Buhaton: Gamitag maayo ang mga handbill sa pagpahibalo sa mga tawo mahitungod sa atong lokal nga mga tigom. Hisgoti nga ang mga tigom maoy libre ug nga wala gayoy pagpangolekta ang pagahimoon. Isaysay kon sa unsang paagi ang mga tigom dumalahon. Ipasiugda nga kini maoy aktuwal nga mga kurso sa pagtuon sa Bibliya ug ang tun-anang materyal itagana alang sa tanan aron sa pagsunod. Ipatagad ang pagkadaiya sa mga kagikan ug mga kahimtang sa kinabuhi niadtong nagatambong. Hisgoti nga sila maoy mga tawong gikan sa palibot nga dapit ug ang mga bata sa tanang pangedaron giabiabi sa pagtambong. Kinahanglang atong dapiton kadtong atong ginatun-an, nga motanyag nga moabag kanila sa unsa mang paagi aron makatambong.

⁴ Usa sa kataposang mga butang nga narekord sa Bibliya mao ang mainitong pagdapit aron moambit sa mga tagana ni Jehova sa kinabuhi: “Ug ang espiritu ug ang pangasaw-onon padayong nagaingon: ‘Umari ka!’ . . . Ug si bisan kinsa nga giuhaw paaria; ang si bisan kinsa nga buot pakuhaa sa tubig sa kinabuhi nga libre.” (Pin. 22:17) Wala ing kapuli alang sa pagdapit sa uban sa pagtambong sa atong mga tigom.

⁵ Ang Isaias 60:8 matagnaong naghulagway sa ginatos ka libo sa bag-ong mga magdadayeg nga karon nagasulod sa mga kongregasyon sa katawhan sa Diyos ingong mga salampati nga “nanglupad ingon sa panganod, ug ingon sa mga salampati ngadto sa ilang mga tamboanan.” Mahimo natong dapiton ang tanang bag-ohan ngadto sa atong mga tigom ug ipabati kanila nga giabiabi sila. Niining paagiha, kita nagapakigtambayayong kang Jehova samtang siya nagapadali sa buluhatong pagpanigom.​—Isa. 60:22.