“Mangadto Kita sa Balay ni Jehova”
1 Si David misanong uban ang kaikag sa pagdapit: “Mangadto kita sa balay ni Jehova.” (Sal. 122:1) Ang “balay” ni Jehova, nga gihawasan sa templo, mao ang tigomanang dapit alang kanilang may tinguha sa pagsimba sa matuod nga Diyos. Kadto maoy usa ka sangtuwaryo sa kasegurohan ug kalinaw. Karong adlawa, ang tibuok-kalibotang Kristohanong kongregasyon mao ang “balay” sa Diyos, “usa ka haligi ug pasukaranan sa kamatuoran.” (1 Tim. 3:15) Ang tanang tagana alang sa kaluwasan mabatonan pinaagi niining kanal-galamiton. Tungod nianang katarongana, “ngadto niana ang tanang nasod kinahanglang magaganayan” kon tinguha nilang magpahimulos sa mga panalanging gisaad ubos sa pagmando sa Gingharian sa Diyos.—Isa. 2:2.
2 Kining “balaya” nagalakip sa kapin sa 69,000 nga mga kongregasyon sa 229 ka kayutaan. Ang mga pultahan sa mga Kingdom Hall libot sa kalibotan maoy bukas, uban sa kapin sa upat ka milyong masibotong magbubuhat nga nagapakaylap sa pagdapit: “Umari! . . . Ang si bisan kinsa nga buot pakuhaa sa tubig sa kinabuhi nga walay bayad.” (Pin. 22:17) Daghan ang nakadungog niining mensahea ug misanong uban ang pagpabili. Ang uban natandog apan wala pa mangadto sa balay ni Jehova pinaagig pagpakig-uban sa Kristohanong kongregasyon. Sila may “espirituwal nga panginahanglan” nga pagatagbawon uban sa mga tagana nga makaplagan lamang sa kongregasyon. (Mat. 5:3) Kita nagakinabuhi sa makuyaw nga mga panahon, uban sa kataposan niining sistemaha nga tulin nga nagakaduol. Ang pagkawalay pagtagad o nagapanukong tinamdan mosangpot sa peligrosong paglangan. Maoy dinalian nga ang katawhan magapangab-ot sa “pagduol nga suod sa Diyos” pinaagig mas suod pang pagduol sa iyang organisasyon. (Sant. 4:8) Sa unsang paagi sila atong mabuligan?
3 Tultoli ang Interes Ngadto sa Organisasyon: Sukad sa atong unang kontak sa interesadong mga tawo, angay nga atong tultolan ang ilang atensiyon ngadto sa organisasyon. Samtang mahimo ta sa personal ang pagpangitag kasulatan ug pagsaysay sa pasukaranang mga doktrina, dili kita ang tinubdan nianang kahibaloa. Ang tanang nakat-onan nato nagagikan sa organisasyon, nga gipaagi pinaagig ulipong matang nga nagataganag “pagkaon sa tukmang panahon.” (Mat. 24:45-47) Gikan sa sinugdan, ang mga bag-ohan nanginahanglang makaamgo nga ang putling pagsimba nagalangkit ug labaw kay kanato ra o bisan sa lokal nga kongregasyon; adunay usa ka organisado, teokratiko, tibuok-kalibotang sosyedad nga nagalihok ubos sa pagtultol ni Jehova.
4 Ang pagtultol nga atong madawat nagagikan kang Jehova, kinsa nagsaad nga mogiya ug motudlo kanato. (Sal. 32:8; Isa. 54:13) Kining maong instruksiyon pangunang gipakaylap pinaagi sa atong mga basahon. Kon mabuligan ta ang mga interesado sa pag-ugmad ug labawng pagtagad sa atong mga basahon, nga nagaila niana ingong tinubdan sa nagaluwas-kinabuhing instruksiyon, mas labaw gayod ang purohan nga sila mobasa ug mopadapat sa mensahe niini kay sa pagsalindot dayon niini. Kinahanglang kanunay natong ipresentar ug gamiton kining maong basahon diha sa paagi nga magaugmad ug pagtahod niana. Kini nagatudlo sa mga bag-ohan sa pagpabili sa organisasyon ug pagsalig sa mga tagana niini.
5 Pahibaloa ang mga interesado nga adunay sentrong dapit tigomanan diha sa komunidad nga ang instruksiyon makanunayong gitagana. Ihatag kanila ang adres sa Kingdom Hall ug ang mga panahon sa tigom. Isaysay ang mga kalainan tali sa atong mga tigom ug sa relihiyosong mga panagkatigom nga ilang natambongan sa nangagi. Ang tanan giabiabi; walay mga pagkolekta o personal nga pagpanukot alang sa panalapi. Samtang ang tinudlong mga ministro nagadumala sa mga programa, ang tanan may kahigayonan sa pagpakigbahin pinaagig paghatag ug mga komento ug pakig-ambit sa mga bahin sa programa. Ang mga pamilya giabiabi; ang kabataan gilakip sa atong mga panaghisgot sa Bibliya. Ang atong mga ministro wala magsul-ob ug espesyal nga mga sutana o mga biste. Ang Kingdom Hall maayong pagkadayandayan ug walay mga kandila, estatuwa, o mga imahen. Kadtong manambong kadaghanan diha lang magpuyo sa lokal nga kasilinganan.
6 Tultoli ang Interes nga Mauswagon sa mga Pagtuon sa Bibliya: Ang pangunang katuyoan sa pagtuon sa Bibliya mao ang pagtudlo sa kamatuoran sa Pulong sa Diyos. Kini angay usab nga magtukod diha sa estudyante ug pagpabili sa organisasyon ni Jehova ug magpaalinggat kaniya sa pagkahinungdanon nga mahimong bahin niana. Ang dakong buluhaton nga gibuhat ni Jesus ug iyang mga tinun-an sa unang siglo nakadani sa sinserong mga tawo ug naghiusa kanila sa buluhaton ubos sa usa ka sentrong nagamandong lawas. Sa mga komunidad nga ang pagsanong maayo, ang mga kongregasyon giporma aron paghatag ug makanunayong pagbansay ug instruksiyon. Kadtong nakig-uban nalig-on sa espirituwal, nga nagabulig kanila sa pag-antos sa mga panahon sa kasakitan. (Heb. 10:24, 25; 1 Ped. 5:8-10) Sa atong adlaw maoy katuyoan ni Jehova “sa pagtigom sa tanang butang pag-usab diha kang Kristo.” (Efe. 1:9, 10) Ingong resulta, kita adunay tibuok-kalibotang “panag-ubanay sa mga igsoon.”—1 Ped. 2:17.
7 Ang senemanang pagtuon sa Bibliya kinahanglang maglakip sa instruksiyon nga makatabang sa mga estudyante sa pagpabili sa organisasyon ug magpahimulos sa mga tagana alang sa ilang kaluwasan. Gugola ang pipila ka minuto kada semana sa pag-asoy o paghubit ug usa ka butang bahin sa organisasyon ug kon sa unsang paagi kini nagalihok. Makaplagan mo ang mapuslanong mga puntong igsusulti diha sa Mayo 1, 1985, Bantayanang Torre (Nobyembre 1, 1984 sa Ingles). Ang mga brosyur nga Jehovah’s Witnesses in the Twentieth Century ug Mga Saksi ni Jehova—Nahiusang Nagabuhat sa Kabubut-on sa Diyos sa Tibuok Kalibotan nagahisgot sa dagkong mga bahin sa organisasyon ug sa unsang paagi kini makabenepisyo kanato. Ang paghikay sa mga estudyante sa Bibliya nga makatan-aw sa video nga Jehovah’s Witnesses—The Organization Behind the Name magatugot kanila sa pagtan-aw sa ilang kaugalingon kon unsa ang ginapalampos niini. Ang piniling mga taho ug mga kasinatian gikan sa Yearbook makapakita sa kalamposan sa buluhaton sa mga nasod ug mga kultura nga lahi sa atoa. Ang ubang mga basahon magamit usab. Sa igo-igong hugna sa panahon, progresibong isaysay kanang mga butanga sama sa kon nganong mamalaybalay ta, ang katuyoan sa atong mga tigom, giunsa nato pagtagana ang galastohan sa atong buluhaton, ug ang tibuok-kalibotang gilapdon sa atong kalihokan.
8 Ang pagkasinati sa ubang mga Saksi may makapadasig nga epekto sa mga bag-ohan, nagapalapad sa ilang panghunahuna sa kongregasyon. Tungod niana, dapita ang ubang magmamantala nga makatambong diha sa pagtuon ngadtongadto. Ang usa diha sa kongregasyon nga may susamang kagikan o susamang intereses makadugang ug bag-ong sukod sa pagpanglantaw sa imong estudyante. Tingali ang usa ka ansiyano makakuyog kanimo aron lamang pagpailaila. Ang paghikay nga makaduaw sa pagtuon ang magtatan-aw sa sirkito o iyang asawa mapamatud-ang usa ka tinuod nga panalangin. Kon adunay mga Saksi nga nagpuyo sa duol, ang pagpailaila kanila sa estudyante sa Bibliya hayan magtaganag dugang pagdasig sa estudyante nga motambong sa mga tigom sa kongregasyon.
9 Dasigang mga Bag-ohan sa Pagtambong sa mga Tigom: Ang mga bag-ohan may panginahanglang makaamgo kon unsa gayod ka hinungdanon ang mga tigom. Sulayi ang pagpukaw sa ilang interes. Ipunting ang mga artikulo nga pagakobrehan sa pagtuon sa Bantayanang Torre. Hisgoti ang mga ulohan sa umaabot nga mga pahayag publiko. Iasoy ang dagkong mga puntos sa materyal nga pagakobrehan sa Teokratikanhong Tunghaan sa Ministeryo ug Pagtuon sa Libro sa Kongregasyon. Ipahayag ang imong kaugalingong mga pagbati bahin sa kon unsa ang imong nakat-onan niining mga tigoma ug kon nganong gibati mo ang panginahanglan sa pagtambong. Kon maarangan mo, itagana ang sakyanan. Ang usa ka tawag sa telepono una pa sa tigom makahatag ug dugang pag-aghat sa pagtambong.
10 Sa dihang ang usa ka estudyante sa Bibliya motambong sa tigom, pabatia siya nga giabiabi. Ipailaila siya sa uban, lakip na sa mga ansiyano. Kon siya mitambong sa pahayag publiko, ipailaila siya sa mamumulong. Ipakita kaniya ang palibot sa Kingdom Hall. Isaysay ang katuyoan sa mga dapit-kuhaanan sa basahon ug magasin, kahon alamotan, librarya, ug ang tinuig nga teksto. Pahibaloa siya nga dili lamang ang tigomanan balay sa pagsimba apan kini usab maoy usa ka sentro nga niana ginaorganisar sa lokal ang pagsangyawng buluhaton.
11 Isaysay kon sa unsang paagi ang atong mga tigom gidumala. Ipakita sa estudyante ang mga basahong atong gigamit. Ipunting nga ang Bibliya mao ang panguna tang teksbok. Ang tanan makaambit, lakip na ang mga kabataan. Isaysay nga ang tanang musika ug mga pulong sa atong songbok gitagik sa mga Saksi ni Jehova para gamiton sa atong pagsimba. Dalhang pagtagad sa pagkalainlain sa mga kagikan niadtong nanambong. Himoang positibong mga komento bahin sa espiritu sa panaghigalaay ug pagkamaabiabihon. Kining maluloton, sinserong interes mahimong usa sa kinakusgang mga bahin sa pag-agda sa estudyante nga mobalik pag-usab.
12 Kon Nganong ang Pipila Nagaduhaduha: Sagad, bisan pa sa tanan mong mahimo, ang pipila magpanuko sa paglihok nga mas maduol ngadto sa organisasyon. Ayaw pag-undang dayon. Sulayi ang pagbutang sa imong kaugalingon sa ilang dapit. Hangtod niining panahona, malagmit wala pa gayod nila batia ang panginahanglan sa pagtambong sa relihiyosong mga serbisyo gawas sa espesyal nga mga okasyon. Ang mga membro sa pamilya o suod nga mga higala mahimong nagapit-os kanila. Basin gibati silag kahadlok sa mga silingan nga nagahimog mayubitong mga sulti. Ug, siyempre, tingali nailalom sila sa nagkadaiyang kabaldahan nga nalangkit sa sosyal ug lulinghayaw nga mga pangagpas. Mahimong isipon nila kining di-mabuntog nga mga babag; kinahanglang buligan mo sila sa pagsabot sa mga butang diha sa tukmang panglantaw ug “maneguro sa labaw nga mahinungdanong mga butang.”—Filip. 1:10.
13 Ihatag ang Kasulatanhong mga katarongan sa paglahutay. Ipasiugda nga kitang tanan dinaliang nanginahanglan sa pagdasig ug espirituwal nga paglig-on nga atong madawat gikan sa atong tingob nga panag-ubanay. (Roma 1:11, 12) Gipatin-aw ni Jesus nga ang pagsupak sa pamilya dili balidong katarongan sa pagduhaduha. (Mat. 10:34-39) Si Pablo miawhag kanato nga dili maulaw sa pagpaila sa atong kaugalingon sa dayag ingong mga tinun-an ni Jesus. (2 Tim. 1:8, 12-14) Ang personal nga mga pangagpas ug mga kabaldahan kinahanglang kontrolahon; kay kon dili, mahimo kining usa ka lit-ag. (Luc. 21:34-36) Kadtong takos sa panalangin ni Jehova kinahanglang tibuok-kalag, dili gayod taphaw. (Col. 3:23, 24) Ang pagpatisok sa pagpabili nianang mga prinsipyoha sa Bibliya makabukas sa dalan alang kanila nga mouswag sa espirituwal.
14 Ang mga Ganghaan Bukas: Ang balay ni Jehova sa matuod nga pagsimba gibayaw ibabaw sa tanang uban pa. Ang pagdapit ginapalanog sa 229 ka kayutaan libot sa kalibotan: “Umari, . . . mangadto kita sa balay ni Jehova, . . . ug siya magatudlo kanato mahitungod sa iyang mga dalan, ug kita magalakaw sa iyang mga alagianan.” (Isa. 2:3) Ang positibong pagsanong sa mga bag-ohan makaluwas sa ilang kinabuhi. Ang pagtultol sa ilang interes ngadto sa organisasyon ni Jehova maoy usa sa labing maayong paagi nga makabulig kita kanila.