Pagtultol sa mga Estudyante sa Bibliya Ngadto sa Kapunongan ni Jehova
1 Kinahanglang pabilhan sa mga estudyante sa Bibliya nga ang pagpaila sa ilang kaugalingon duyog sa organisasyon ni Jehova hinungdanon sa ilang kaluwasan. (Pin. 7:9, 10, 15) Busa, sugdan ta gayod sa pagtultol sila ngadto sa kapunongan sa dihang matukod ang usa ka pagtuon sa Bibliya.
2 Tabangi ang imong mga estudyante sa Bibliya nga masinati sa yutan-ong organisasyon. Sama sa unang siglo, ang tanan sa katawhan ni Jehova nagpasakop ngadto sa mga kongregasyon nga gilangkoban sa mga ansiyano, ministeryal nga mga alagad, ug mga magmamantala. Ang mga membro nagakalipay sa pagtambong sa lima ka miting sa kada semana. Ang pupanahong mga asembliya ug mga kombensiyon ginaeskedyol sa tuig. Usab adunay mga payunir, mga misyonaryo, ug nagabiyaheng mga magtatan-aw, maingon man usa ka Nagamandong Lawas nga nagadireher sa tibuok-kalibotang buluhaton. Sa unsang paagi ang imong mga estudyante sa Bibliya mabuligan sa pagkasabot sa gambalay sa organisasyon nga kini gipasukad sa Bibliya?
PAGGAMIT SA PAGBUHAT SA KABUBUT-ON SA DIYOS NGA BROSYUR
3 Kini nga brosyur makatabang kanimo sa mauswagong pagpasinati sa mga estudyante sa Bibliya sa organisasyon ni Jehova. Ang usa ka paagi sa maayong pagsugod mao ang paghisgot kon unsa ang nagakahitabo diha sa Kingdom Hall. Sa di pa dapiton ang estudyante ngadto sa pakigpulong publiko sa unang higayon, sublia ang impormasyon sa mga panid 14 ug 15 sa maong brosyur. Ipakita kaniya ang mga hulagway ug hubita ang lugar ug panagway sa inyong lokal nga Kingdom Hall.
4 Sa dihang ipahibalo ang duaw sa magtatan-aw sa sirkito, tagda uban sa imong estudyante ang mga panid 20 ug 21. Gamita ang mga pangutana sa kataposan sa panid 21. Tagda ang Kasulatanhong kasaysayan sa atong presenteng kahikayan pinaagig paggamit sa unang parapo sa panid 20.
5 Sa susama, sa di pa ang inyong distritong kombensiyon, sirkitong asembliya, o adlawng espesyal nga asembliya, kobrehe ang gipatik sa panid 19. Ipunting ang internasyonal nga gilapdon ingon sa gipakita sa mga litrato sa panid 18. Sa dihang komentohan mo ang mga litrato nga nagpakita sa pagluwat sa usa ka bag-ong publikasyon, mahimong imong maandam siya alang sa dugang panaghisgot sa mga panid 24 ug 25. Sa pagpatin-aw sa payuniring, kobrehe ang mga puntos sa mga panid 22 ug 23.
IPAHIUYON SA PANGINAHANGLAN
6 Ingon sa imong makita, dili kinahanglan nga magsugod sa sinugdanan sa Pagbuhat sa Kabubut-on sa Diyos nga brosyur. Hinunoa, segon sa pagtungha sa higayon ug panginahanglan, tagda ang tinong mga puntos gikan sa maong brosyur nga moabag sa estudyante sa pagpabili sa kapunongan ni Jehova ug dasiga siya sa pagpakig-uban sa lokal nga kongregasyon.
7 Ang pagsulti uban ang hugot nga pagtuo sa dihang mohisgot niining mga butanga magpasilsil nga dumalayon diha sa imong gitun-an. Magmainiton sa espiritu. (Buh. 18:25) Usab, paneguroa nga ikaw, “nga maoy nagatudlo sa laing tawo,” maghimog maayong panig-ingnan sa pagpakitag apresasyon dapig sa kapunongan ni Jehova. (Roma 2:21) Sa pagbuhat niana, ikaw makatabang sa uban sa pagduyog sa usa ka panon nga si Jesus mao ang nagapanguna ngadto sa kinabuhing dayon.