Pagtultol sa mga Estudyante Ngadto sa Organisasyon nga Nagpaluyo sa Atong Ngalan
1 “Mensahe kini nga gilitok sa kapin sa 200 ka pinulongan. Mensahe kini nga nadungog sa kapin sa 210 ka kayutaan. Mensahe kini nga personal nga gidala bisan diin nga makaplagan ang katawhan. Bahin gayod kini sa labing dakong kampanya sa pagsangyaw nga sukad nasayran sa kalibotan, usa ka mensahe nga nagapahiusa sa mga minilyon sa tibuok yuta. Ang mga Saksi ni Jehova naorganisar sa pagpalampos niining buluhatona sa kapin na sa usa ka gatos ka tuig!”
2 Nianang paagiha gisugdan ang asoy sa video nga Jehovah’s Witnesses—The Organization Behind the Name. Padayong gitubag niini ang mga pangutana: Kinsa ba gayod ang mga Saksi ni Jehova? Giunsa pag-organisar ang ilang buluhaton? Pagtultol? Pagtagana sa panalapi? Kini nakapadayeg sa mga tumatan-aw sa kamatuoran nga ang mga “Saksi ni Jehova sa tibuok kalibotan gibansay ingong usa ka organisasyon aron tabangan ang ilang mga silingan nga tukoron ang pagtuo diha sa Bibliya,” ug kini nakapadasig kanila nga makita mismo sa ilang kaugalingon ang organisasyon nga nagpaluyo sa atong ngalan. Human makita kini nga video, usa ka babaye nga nagtuon mihilak sa kalipay ug apresasyon ug miingon: “Sa unsang paagi dili makita sa matag usa nga mao kini ang organisasyon sa matuod nga Diyos, si Jehova?”—Itandi ang 1 Corinto 14:24, 25.
3 Laing babaye ang nagtuon sa Bibliya sa taas nga panahon, apan dili niya madawat ang kamatuoran nga ang Trinidad bakak nga doktrina. Dayon siya ug ang iyang bana gipatan-aw sa atong video. Nakadayeg sila pag-ayo sa presentasyon ug mitan-aw niana ug kaduha sa samang gabii. Sa ilang sunod nga pagtuon, ang asawa mipahayag sa iyang tinguha nga mahimong Saksi. Siya miingon nga siya nagpunting sa iyang pagtuo diha sa Trinidad ug napakyas sa pagtino sa atong organisasyon ug sa katawhan nga anaa niana. Gumikan sa video iyang naamgohan nga nakaplagan niya ang matuod nga organisasyon sa Diyos. Buot niyang mosugod sa pagsangyaw sa balaybalay gilayon. Human ikasaysay kaniya kon unsay kinahanglanong mga tikang aron mahimong di-bawtismadong magmamantala, siya miingon: “Dalion nato kana.” Mibulag siya sa iyang simbahan, misugod diha sa buluhaton sa pag-alagad sa kanataran, ug nahimong batid sa pagpanghimakak sa Trinidad.
4 Naestablisar na pag-ayo nga ang mga estudyante sa Bibliya mouswag ug mas maayo sa espirituwal ug mas kusog nga motubo sa pagkahamtong sa dihang ilang mailhan ang organisasyon ni Jehova ug makig-uban niana. Sa kahinungdanon, human ang 3,000 nabawtismohan sa Pentekostes, “sila padayong nagdeboto sa ilang kaugalingon sa ginatudlo sa mga apostol ug sa pagpaambit sa usag usa.” (Buh. 2:42, potnot) Hinungdanon nga atong tabangan ang mga estudyante sa pagbuhat sa ingon karong adlawa. Unsaon man nato?
5 Abagaha ang Responsabilibab: Kinahanglang masabtan sa matag tighimog tinun-an nga maoy iyang responsabilidad ang pagtultol sa estudyante sa Bibliya ngadto sa organisasyon sa Diyos. (1 Tim. 4:16) Ang matag sesyon sa pagtuon angayng lantawon ingong tikanganan ngadto sa malipayong adlaw sa dihang ang bag-ohan magpasimbolo sa iyang dedikasyon ngadto kang Jehova pinaagig bawtismo sa tubig. Ang usa sa mga pangutana nga isukna kaniya sa panahon sa seremonya sa bawtismo mao: “Nasabtan ba nimo nga ang imong dedikasyon ug bawtismo magpaila kanimo ingong usa sa mga Saksi ni Jehova duyog sa tinultolan-sa-espiritung organisasyon sa Diyos?” Busa, bililhon nga iyang masabtan nga dili siya makaalagad sa Diyos kon walay aktibong pagpakig-uban sa matuod Kristohanong kongregasyon.—Mat. 24:45-47; Juan 6:68; 2 Cor. 5:20.
6 Ipadayon ang pag-edukar sa estudyante bahin sa lokal nga kongregasyon ug sa internasyonal nga organisasyon nga nagpaluyo sa mga Saksi ni Jehova. Buhata kini sa matag sesyon sa pagtuon sa Bibliya, sugod sa unang pagtuon. Sa sinugdanan pa gayod, dapita ang estudyante ngadto sa mga tigom, ug padayon sa pagdapit kaniya.—Pin. 22:17.
7 Gamita ang mga Kahimanan nga Gitagana: Ang atong labing maayong mga publikasyon nga magamit sa pagdumalag mga pagtuon sa Bibliya sa balay mao ang brosyur nga Unsay Gikinahanglan sa Diyos Kanato? ug ang libro nga Kahibalo nga Motultol sa Kinabuhing Walay Kataposan. Kanang duha nagapasiugda sa panginahanglan sa pagpakig-uban sa kongregasyon. Ang kataposan sa leksiyon 5 sa Gikinahanglan nga brosyur nagaingon: “Kinahanglan nga magpadayon ka sa pagkakat-on bahin kang Jehova ug sa pagsugot sa iyang mga kinahanglanon. Ang pagtambong sa mga tigom sa lokal nga Kingdom Hall sa mga Saksi ni Jehova mobulig kanimo sa paghimo niana.” Ang Kahibalo nga libro subsob nga nagadasig sa estudyante sa pagpakig-uban diha sa mga tigom. Ang kapitulo 5, parapo 22, nagapaabot niining pagdapit: “Ang mga Saksi ni Jehova . . . mainitong nagadasig kanimo nga makig-ambit kanila sa pagsimba sa Diyos ‘pinaagi sa espiritu ug kamatuoran.’ (Juan 4:24)” Ang kapitulo 12, parapo 16, nagaingon: “Samtang ipadayon nimo kini nga pagtuon ug batasanon ang pagtambong sa mga tigom sa mga Saksi ni Jehova, ang imong pagtuo dugang pang molig-on.” Ang kapitulo 16, parapo 20, nagaingon: “Batasana ang pagtambong sa mga tigom sa mga Saksi ni Jehova.” Kini midugang: “Kini makatabang kanimo sa pagsabot ug dayon pagpadapat sa kahibalo sa Diyos diha sa imong kinabuhi ug magdala kanimog kalipay. Ang pagkahimong bahin sa tibuok-kalibotang Kristohanong panag-igsoonay makatabang kanimong magpabiling suod kang Jehova.” Ang kapitulo 17 bug-os nga nagahisgot kon unsaon sa usa pagkaplag ang tinuod nga kasegurohan taliwala sa katawhan sa Diyos. Samtang kita magtuon sa uban, maoy atong responsabilidad ang pagpasiugda niining mga bahina sa materyal.
8 Ang brosyur nga Mga Saksi ni Jehova—Nahiusang Nagabuhat sa Kabubut-on sa Diyos sa Tibuok Kalibotan maoy maayong himan nga napatungha sa pagpasinati sa mga indibiduwal sa bugtong makitang organisasyon nga gigamit ni Jehova karong adlawa sa pagpalampos sa iyang kabubut-on. Ang detalyadong impormasyon nga anaa niini bahin sa atong ministeryo, mga tigom, ug organisasyon magdasig sa magbabasa sa pagpakig-uban kanato sa pagsimba sa Diyos. Sa dihang maestablisar na ang pagtuon sa Bibliya, girekomendar nga atong hatagan ang estudyante ug usa ka kopya niini nga brosyur aron mabasa niya sa iyang kaugalingon. Dili kinahanglang tun-an kana uban kaniya sama sa gihimo sa miagi.
9 Ang pipila ka video nga napatungha sa Sosyedad maoy ekselenteng mga himan aron tultolan ang mga estudyante ngadto sa organisasyon nga nagpaluyo sa atong ngalan. Kini mao ang: (1) The New World Society in Action, ang pagsubli sa 1954 nga pelikula nga nagkuha sa hapsay, episyente, ug mahigugmaong espiritu nga niana ang organisasyon ni Jehova nagalihok; (2) United by Divine Teaching, nga nagasusi sa malinawong panaghiusa nga gipasundayag sa atong internasyonal nga mga kombensiyon sa Sidlakang Uropa, Habagatang Amerika, Aprika, ug Asia; (3) To the Ends of the Earth, nga nagtimaan sa ika-50ng anibersaryo sa Watchtower Bible School of Gilead ug nagapasundayag sa nahimong epekto sa mga misyonaryo diha sa tibuok-kalibotang buluhaton sa pagsangyaw; (4) Jehovah’s Witnesses Stand Firm Against Nazi Assault, nga nagasaysay sa kulbahinam nga kasaysayan sa kaisog ug kadaogan sa mga Saksi atubangan sa mabangis nga paglutos kanila ni Hitler; ug, siyempre, (5) Jehovah’s Witnesses—The Organization Behind the Name.
10 Ipahiluna ang Mauswagong mga Tumong Alang sa mga Tigom: Angayng ipatin-aw ngadto sa mga estudyante nga parehong gikinahanglan nato ang pribadong pagtudlo sa usa ka pagtuon sa Bibliya sa balay ug ang mga panaghisgot sa klasehanan nga gitagana sa mga tigom sa kongregasyon. (Juan 6:45) Kinahanglang dungan nga mouswag ang pagsabot sa usa ka bag-ohan sa Kasulatan ug sa organisasyon. Aron makab-ot kana, walay kahulip ang pagtambong sa mga tigom. (Heb. 10:23-25) Sugdi ang pagdapit sa tawo ngadto sa mga tigom sa kongregasyon gilayon. Ang pipila ka bag-ong mga interesado nagasugod sa pagtambong sa mga tigom una pa gani makabatog regular nga pagtuon sa Bibliya sa balay. Siyempre, buot kitang magpahilunag tukmang panig-ingnan sa atong kaugalingon pinaagig regular nga pagtambong.—Luc. 6:40; Filip. 3:17.
11 Ipaambit ang igong impormasyon bahin sa mga tigom ug kon giunsa kini pagdumala aron ang estudyante mobating komportable sa dihang motambong sa iyang unang tigom. Sanglit ang pipila ka tawo di-mahimutang sa dihang moadto sa bag-ong mga dapit sa unang higayon, mahimong makaayo nga kuyogan ang estudyante ngadto sa Kingdom Hall sa dihang motambong siya sa iyang unang tigom. Mobati siyag dugang kahayahay kon kuyog ka kaniya samtang siya makighimamat sa mga membro sa kongregasyon. Labaw sa tanan, himoa nga maayong tagbalay sa imong bisita, nga nagapabati kaniyang giabiabi ug komportable.—Mat. 7:12; Filip. 2:1-4.
12 Dasiga ang estudyante sa pagtambong sa espesyal nga adlaw nga asembliya, sirkitong asembliya, o distritong kombensiyon sa unang kahigayonan. Tingali malakip nimo siya sa imong mga kahikayan sa transportasyon.
13 Itisok ang Kinasingkasing nga Apresasyon: Ang Organisado sa Pagtuman sa Atong Ministeryo, panid 92, nagasaysay: “Kon ang imo mismong dulot nga apresasyon sa organisasyon ni Jehova ginabanaag sa imong mga panaghisgot uban sa interesadong katawhan, mas sayon lang alang kanila nga molambo sa pagpabili ug magpalihok kanila ngadto sa mas dakong kauswagan sa pagkaila kang Jehova.” Magmapositibo kanunay sa pagsulti, dili gayod magmanegatibo, bahin sa imong lokal nga kongregasyon. (Sal. 84:10; 133:1, 3b) Sa mga pag-ampo nga imong itanyag diha sa pagtuon sa Bibliya, hisgoti ang kongregasyon ug ang panginahanglan sa estudyante nga makig-uban niana nga regular.—Efe. 1:15-17.
14 Buot gayod natong maugmad sa mga bag-ohan ang kinasingkasing nga apresasyon sa makapahimuot nga panag-ubanay ug espirituwal nga kasegurohan nga makaplagan taliwala sa katawhan sa Diyos. (1 Tim. 3:15; 1 Ped. 2:17; 5:9) Ingong mga Saksi ni Jehova, buhaton nato ang ato gayong maarangan nga tultolan ang mga estudyante sa Pulong sa Diyos ngadto sa organisasyon nga nagpaluyo sa atong ngalan.
[Blurb sa panid 3]
Ang mga estudyante mas kusog nga mouswag sa espirituwal sa dihang ila mismong makita ang organisasyon
[Blurb sa panid 4]
Ayaw paglangan sa pagdapit sa mga estudyante sa pagtambong sa mga tigom