Tabangi ang Uban sa Pagtambong sa mga Tigom
1 “Si bisan kinsa nga mga higala sa kasilinganan . . . nga nagtinguha sa pagtambong sa mga tigom mainitong gidapit sa pagbuhat sa ingon.” Sukad nga kining pahibaloa nakita diha sa Nobyembre 1880 nga isyu sa Zion’s Watch Tower, ang mga Saksi ni Jehova maikagong nagdapit sa mga tawo sa pagtigom alang sa instruksiyon sa Bibliya. (Pin. 22:17) Kini maoy usa ka hinungdanong bahin sa matuod nga pagsimba.
2 Hinungdanon nga Motambong: Moresultag mga panalangin kon kita makig-uban sa kongregasyon. Kita mahimong mas masinati sa atong katingalahang Diyos, si Jehova. Diha sa kongregasyon, kita magtigom aron mahimong “tinudloan ni Jehova.” (Isa. 54:13) Ang iyang organisasyon naglaraw ug usa ka padayong programa sa instruksiyon sa Bibliya nga mas magpasuod kanato ngadto kaniya ug naghatag ug praktikal nga tabang sa pagpadapat sa “tanang gimbut-an sa Diyos.” (Buh. 20:27; Luc. 12:42) Ang mga tigom nagtaganag personal nga pagbansay diha sa arte sa pagpanudlo sa Pulong sa Diyos. Ang mga pahinumdom gikan sa Kasulatan motabang kanato sa pagtagamtam sa malamposong relasyon sa uban ug kang Jehova mismo. Ang pagpakig-uban niadtong kinsa nahigugma sa Diyos magpalig-on sa atong pagtuo.—Roma 1:11, 12.
3 Dapita nga Deretso: Sa unang pagtuon pa lamang, dapita ang matag estudyante sa Bibliya ngadto sa mga tigom. Hatagi siya ug handbill. Pukawa ang iyang interes pinaagi sa pagpaambit ug usa ka punto nga nakapadasig kanimo gikan sa miaging tigom ug pinaagi sa pagkonsiderar ug usa ka butang nga pagahisgotan sa sunod nga tigom. Hubita kon sama sa unsa ang Kingdom Hall, ug paneguroa nga nahibalo siya kon unsaon pagkaplag niana.
4 Kon ang estudyante dili dayon motambong, ipadayon ang pagdapit kaniya. Paggahin ug pipila ka minuto matag semana aron ipakita kaniya kon sa unsang paagi ang atong organisasyon nagalihok. Gamita ang brosyur nga Nagabuhat sa Kabubut-on sa Diyos ug ang video nga Jehovah’s Witnesses—The Organization Behind the Name aron masinati siya kanato ug sa atong mga tigom. Iuban ang laing mga magmamantala aron masinati ang estudyante kanila. Diha sa pag-ampo, pasalamati si Jehova tungod sa organisasyon ug isulti ang panginahanglan sa estudyante nga makig-uban niana.
5 Ayaw pagpanuko sa pagtabang sa bag-ong mga interesado nga makigtigom uban kanato. Samtang ang ilang pagpabili alang kang Jehova motubo, sila mapalihok sa pagpadapat sa ilang makat-onan ug sa pagkahimong bahin sa hiniusang organisasyon sa Diyos.—1 Cor. 14:25.