Nganong Ilang Gibuhat Kana?
1 Gitagna na bahin kang Kristo nga ang ‘tumang kasibot alang sa balay sa Diyos magaut-ot kaniya.’ (Sal. 69:9) Ang kasibot ni Jesus alang sa matuod nga pagsimba ni Jehova nagtukmod kaniya sa pag-una sa ministeryo. (Luc. 4:43; Juan 18:37) Kining samang kasibot ginabanaag karong adlawa diha sa ministeryo sa mga Saksi ni Jehova. Sa miaging tuig sa pag-alagad, ang aberids nga 645,509 sa tibuok kalibotan ang nakig-ambit sa payunir nga pag-alagad sa matag bulan. Tungod sa atong pahinungod ngadto sa Diyos, ang matag usa kanato angayng magtagad nga mainampoon kon kita ba makaalagad ingong oksilyare o regular payunir.—Sal. 110:3; Eccl. 12:1; Roma 12:1.
2 Daghan niining materyalistikanhong kalibotan ang malisdan sa pagsabot kon nganong ang usa manikaysikay gayod diha sa ministeryo nga walay ginadawat nga mga benepisyong salapi o pagkainila. Nganong ilang gibuhat kana? Ang mga payunir nasayod nga sila misalga diha sa usa ka nagaluwas-kinabuhing buluhaton. Tinukmod sa ilang gugma kang Jehova ug sa ilang isigkatawo, gibati nila ang personal nga obligasyon aron motabang sa pagluwas ug mga kinabuhi. (Roma 1:14-16; 1 Tim. 2:4; 4:16) Usa ka magtiayong payunir miingon: “Nganong kami nagapayunir? Makapangatarongan ba gayod kami atubangan kang Jehova kon kami wala magpayunir?”
3 Laing sister misulat niini bahin sa iyang desisyon sa pagsugod sa pagpayunir: “Ang akong bana ug ako naghimog mga plano nga magkinabuhi sa bugtong kita, nga nagkahulogang isalikway ang tanang di-kinahanglanon. Apan, si Jehova madagayaong nagpanalangin kanamo, wala gayod magabiya kanamo. . . . Nakaplagan ko ang matuod nga rason sa pagkinabuhi—nga mao ang pagtabang sa mga nanginahanglan nga makadangat sa pag-ila nga si Jehova dili halayo gikan niadtong kinsa nagapangita kaniya.” Ang mga payunir kontento sa mga panginahanglan sa kinabuhi samtang sila matinuorong nagapangita sa paghupot ug espirituwal nga mga bahandi nga molungtad sa walay kataposan.—1 Tim. 6:8, 18, 19.
4 Kon motugot ang imong personal nga mga kahimtang, nganong dili moduyog sa ginatos ka libong payunir sa tibuok kalibotan ug tagamtamon ang ilang samang kalipay?