Espesyal nga Gula sa Pagmata! Itanyag sa Septiyembre
1 Halos tanan malingaw sa honi sa mga langgam ug sa maanindot nga pagsalop sa adlaw. Ugaling lang, daghan ang wala moila nga dunay usa ka mahigugmaong langitnong Amahan nga naglalang niining tanan. Kita adunay talagsaong kahigayonan sa pagpamatuod sa pagkamaglalalang ni Jehova pinaagi sa pagpanagtag sa espesyal nga gula sa Pagmata! (Isa. 40:28; 43:10) Ang Septiyembre nga gula bug-os nga naghisgot sa ulohang “Aduna bay Usa ka Maglalalang?”
2 Sa Teritoryo: Kon posible, hikaya nga makasangyaw ka uban sa kongregasyon matag Sabado. Siyempre, makatanyag ka sa espesyal nga gula sa ubang mga adlaw sa semana. Ang mga magtutudlo ug uban pa nga nagtrabaho sa natad sa edukasyon lagmit interesado gayod niining gulaa. Busa, paghimog linaing mga kahikayan sa pagduaw kanila diha sa inyong teritoryo.
3 Kon magpakitag interes, binli ug pangutana ang maong tawo nga imong tubagon sa sunod duaw. Pananglitan, makapangutana ka kon nganong gitugotan sa usa ka mahigugmaong Maglalalang ang daghang pag-antos. Dayon, sa imong pagbalikduaw, mahisgotan mo ang kapitulo 1 o ang kapitulo 11 sa librong Gitudlo sa Bibliya. O makapangutana ka bahin sa katuyoan sa Maglalalang alang sa yuta ug dayon hisgotan ang kapitulo 3 sa imong pagbalik.
4 Sa Eskuylahan: Kon nag-eskuyla ka, nganong dili mo hatagag espesyal nga Pagmata! ang imong mga magtutudlo ug mga isigkaestudyante? Kon magbutang kag kopya diha sa imong lingkoranan, lagmit may mangutana kanimo bahin sa imong tinuohan. Hayan makahigayon ka sa paggamit sa impormasyon gikan niana sa dihang labanan mo ang imong pagtuo diha sa panaghisgot sa klasrom ug sa dihang mangandam ug mga report. Sa pag-abag kanimo, kining gulaa adunay artikulo sa “Mga Batan-on Nangutana” nga nag-ulohang “Sa Unsang Paagi Akong Malabanan ang Akong Pagtuo Bahin sa Paglalang?”
5 Si Jehova takos pasidunggan ug himayaon tungod sa iyang nalalang. (Pin. 4:11) Kita makapasidungog sa atong Maglalalang ug makatabang sa uban sa pagpasidungog kaniya pinaagi sa madasigong pagtanyag sa Septiyembre nga gula sa Pagmata!