Paghupot ug Pagtuo sa Maglalalang sa Katawhan
1 Daghang tawo ang sayop nga naimpluwensiyahan sa pagtuo sa ebolusyon inay kay sa paglalang ingong sinugdan sa kinabuhi. Ang librong Creation nagaanalesar sa duha ka kiliran sa isyu ug nagahatag ug di-mabangbang nga pamatuod ingong suportar sa Bibliya. Unsaon man nato pagtabang ang sinserong mga tawo nga nagpakitag pagkaandam nga magpatalinghog? Pinaagig paghimog mga balikduaw. Sa dihang kita mobalik, maoy maayo kanunay nga maghupot ug tinong butang sa hunahuna nga isulti nga makapalig-on sa pagtuo diha kang Jehova ingong atong Maglalalang.
2 Kon ang tawo nagpasundayag ug pagtuo sa Bibliya, kining paagiha hayan epektibo sa pagsugod sa inyong panaghisgot:
◼ “Ang Isaias 45:18 nagahimog gamhanang pahayag bahin sa sinugdan sa uniberso; buot nakong masayran kon unsay imong hunahuna bahin niana. [Basaha ug tugoting motubag.] Si Jehova dinhi gitawag ang Maglalalang sa mga langit ug yuta. Unsa na man ang bahin sa kinabuhi ibabaw niining yutaa? Ang Isaias 42:5 nagahatag usab kaniya nianang tanang pasidungog. [Basaha.] Kon ang giingon sa Bibliya tinuod, kinahanglang bakak ang ebolusyon. Gibati ba nimong ikaw makasalig sa Bibliya?” Dad-a ngadto sa kapitulo 17 sa librong Creation, ug ipunting ang dugang mga katarongan sa pagtuo kang Jehova ingong Maglalalang.
3 Ikaw makasugod sa inyong panaghisgot nga sama niini:
◼ “Sa akong miaging duaw, ang pangutana gipatungha, Unsay kaugmaon sa tawo ug sa yuta? Matikdi kon sa unsang paagi ang libro nga akong nabilin kanimo nagatubag nianang pangutanaha.” Pakliang mga panid 234-5 sa librong Creation ug dasiga siya sa pagbasa sa mga parapo 6 ug 7. Kon ang dugang interes gipakita, ikaw makasukna: “Unsang mga kausaban, ang imong gihunahuna, nga mahitabo sa yuta?” Kon tukma, kining puntoha mahisgotan nianang higayona o sa imong sunod nga duaw pinaagig pagpadayon ngadto sa ubang mga parapo diha sa samang kapitulo sa librong Creation.
4 Ang laing paagi nga masugdan mo ang balikduaw maoy pinaagi sa pag-ingon:
◼ “Ang katawhan nag-antos ug daghang kasakit ug kaguol tungod sa tumang pagkadaotan. Si Jehova, ang Maglalalang niining yutaa, nagsaad nga kini pagataposon. [Pakliang panid 196, ug basaha ang Proverbio 2:21, 22.] Kadtong nagaila kaniya ingong ilang Magbubuhat ug nagatuman sa iyang kabubut-on makalaom sa kahibulongang mga panalangin.” Kon tukma nianang panahona, ipadayon ang panaghisgot sa Pinadayag 21:4, 5 diha sa mga panid 197-8.
5 Ang hanas nga mga magmamantala nakaamgo nga labing maayo ang pag-eskedyol ug tinong mga panahon alang sa mga balikduaw. Ang pagbaton ug tinong mga kahikayan niining buluhatona magatabang kanato sa pagsundal dayon sa interes. Tinoa ang panahon nga labing maayo alang kanimo ug sa teritoryo. Pinaagig makanunayon nimong pagpakig-ambit niining buluhatona, ikaw makakaplag ug kangaya sa pagtuman sa sugo sa “paghimog mga tinun-an.”—Mat. 28:19, 20.