Mga Presentasyon nga Magpahaling sa Interes
1 Kita kinahanglang magpasundayag kanunay ug mainiton, personal nga interes sa katawhan nga atong ikahibalag diha sa ministeryo sa kanataran. Ang pagpangayo sa ilang opinyon nagapakita sa atong pagtahod sa ilang panglantaw. Ang mga pangutanang atong ipatungha makahaling sa ilang panghunahuna ug magtukmod nila sa pagtinguha nga mokat-og dugang.
2 Sa Hunyo magatanyag ta sa librong Life—How Did It Get Here? By Evolution or by Creation? Repasoha kining basahona sa personal ug piliang espisipikong mga puntos nga ikapasiugda. Sa dihang magahisgot sa mga puntos gikan sa librong Creation, buksi kana ug itunol kana sa tagbalay. Ipunting ngadto sa espisipikong mga ulohan ug mga ilustrasyon.
3 Human nga ikapailang kaugalingon, makaingon ka:
◼ “Niining modernong kalibotan, makataronganon ba ang pagtuo nga adunay usa ka Diyos nga naglalang kanato ug niining matahom nga yuta nga atong gipuy-an? [Tugoting motubag.] Sa dihang lantawon ta ang mga kahibulongan sa yuta ug ang uniberso, kita matingala sa kahapsay ug desinyo niini. Dili ba kini nagapamatuod sa paglungtad sa usa ka Maglalalang? Matikdi ang pangatarongan sa Bibliya niining butanga. [Basahang Hebreohanon 3:4.] Ang matag tinukod may tigdesinyo ug magtutukod. [Kuhaang librong Creation ug paklia ngadto sa ilustrasyon sa panid 114.]” Unya paklia ngadto sa panid 122 ug basaha ang ulohan sa ubos sa hulagway sa usa ka relo. Ang ilustrasyon ug kasulatan nga gikutlo sa panid 127 magamit usab. Ang dugang mga puntos makaplagan diha sa librong Nangatarongan, mga panid 309-13 (p. 84-8 sa Ingles).
4 O makaingon ka:
◼ “Unsay gihunahuna nimong kinahanglanon sa pagkaplag ug matuod nga kalinaw ug kalipay? [Tugoting motubag.] Ang Bibliya nag-ingong kinahanglang ilhon ta ang Diyos ingong Maglalalang sa langit ug yuta.” Basahang Pinadayag 14:7, ug unya buksi ang librong Creation sa mga panid 140 ug 141, mga parapo 24 ug 25. Kon ang tagbalay magpakitag interes, pakliang kapitulo 19 ug isaysay kon sa unsang paagi ang usa ka paraisong yuta sa dili madugay mahimong usa ka katinuoran.
5 Kon ang tagbalay mopahayag ug mga pagduhaduha bahin sa paglungtad sa usa ka Maglalalang, makaingon ka:
◼ “Daghang tawo ang mouyon kanimo, ilabina tungod sa tanang pag-antos sa kalibotan. Kon adunay usa ka Diyos, nganong gitugotan man niya ang pag-antos? Makahunahuna ka ba ug makataronganong pagpatin-aw?” Depende sa pagsanong, makapadayon ka pinaagig paggamit sa kapitulo 16 sa librong Creation. Ang dugang makabulig nga mga tubag makaplagan diha sa librong Nangatarongan, mga panid 120-1 (p. 399-400 sa Ingles). Usahay mahimong tukma ang pagbilin ug tract nga Kon Nganong Ikaw Makasalig sa Bibliya.
6 Ang atong tumong mao ang pagsulay nga makasugod ug mga pagtuon sa Bibliya. Pagkamalipayon nato nga nakabaton niining matahom nga pagkailustrar nga libro nga nagasaysay sa kamatuoran bahin sa paglalang ug nagapasidungog sa atong Dakong Maglalalang! Hinaot nga gamiton ta kini pag-ayo sa bulan sa Hunyo.