Espesyal nga Gula sa Pagmata! nga Itanyag sa Nobyembre!

¹ Daghang tawo ang adunay sinserong mga pangutana bahin sa kahinungdanon sa Bibliya. Kon mga tawo ang nagsulat niini, nganong gitawag man kining Pulong sa Diyos? Nganong mosalig man ako sa Bibliya sa paggiya sa akong kinabuhi? Unsang mga kaayohan ang akong makuha kon akong basahon ug tun-an ang Bibliya? Unsa nga hubad sa Bibliya ang angay kong gamiton? Mao kini ang pipila sa mga pangutana nga tubagon sa espesyal nga gula sa Nobyembre nga Pagmata! nga nag-ulohang “Makasalig Ka ba sa Bibliya?”

² Buot natong mapanagtag pag-ayo kining gulaa diha sa atong teritoryo. Kon mahimo, mosangyaw kita matag Sabado sa tibuok bulan sa Nobyembre. Itanyag kini sa imong mga paryente, silingan, kauban sa trabaho, magtutudlo, eskolmet, ug mga balikduaw. Pagdalag mga kopya sa dihang ikaw mamalit ug mobiyahe. Giawhag na ang mga ansiyano sa pag-order ug dugang nga mga kopya aron daghag ikatanyag ang mga igsoon.

³ Sugdi ang Usa ka Pagtuon sa Bibliya: Kon may mokuhag magasin, mapahiluna mo ang sukaranan alang sa pagtuon sa Bibliya sa dili pa ka molakaw. Pananglitan, mahimo kang moingon, “Sa sunod higayon, akong ipakita kanimo ang tubag sa Bibliya niini nga pangutana, ‘Unsay katuyoan sa Diyos alang sa yuta?’” Sa imong pagbalik, pagdala ug librong Gitudlo sa Bibliya ug ipakita sa tagbalay ang panid 4-5, o hisgoti ang parapo 1-3 sa kapitulo 3. Mahimo sab kang moingon, “Sa sunod higayon, atong hisgotan ang usa ka tagna sa Bibliya nga nagakatuman karon.” Sa imong pagbalik, ipakita sa tagbalay ang kapitulo 9 sa libro ug hisgoti ang parapo 1-3. O mahimong sultian lang nimo ang tagbalay: “Daghan ang nalisdan pagsabot sa ilang nabasahan sa Bibliya. Sa sunod higayon, akong ipakita kanimo kon sa unsang paagi mas daling masabtan ang Bibliya.” Sa imong pagbalik, ipakita ang librong Gitudlo sa Bibliya, ug ipasundayag ang pagtuon.

⁴ Bibliya lamang ang naundan sa “balaang mga sinulat,” nga makahimo kanatong “maalamon alang sa kaluwasan.” (2 Tim. 3:15) Busa, buot natong magmasiboton sa pagpakigbahin sa pagpanagtag niining espesyal nga gula sa Pagmata! aron matabangan ang mga tawo nga mosalig sa Bibliya!