Tabangi ang mga Estudyante sa Bibliya nga Mahimong Magmamantala sa Maayong Balita
1 Ang sugo nga gihatag ni Jesus sa iyang mga disipulo nga gihisgotan sa Mateo 28:19, 20 maoy usa gayod ka dakong buluhaton. Ang mga disipulo ni Jesus gisugo sa paghimog mga tinun-an, ug sa baylo andam usab sila sa paghimo sa ingon. Gipahiluna na ang pundasyon alang sa kataposang pagpahayag sa mensahe sa Gingharian sa Diyos sa tibuok kalibotan niining kinatayuktokang bahin sa panahon, diin kita nagkinabuhi.—Mat. 24:14.
2 Ang atong mga estudyante sa Bibliya mahimong maglakip sa atong mga anak ug sa uban pang buot motuon sa Bibliya. Buot gayod nato silang tabangan aron masayod sila sa ilang responsibilidad nga tabangan ang uban nga mahimong mga tinun-an ni Jesu-Kristo.—Luc. 6:40.
3 Andama Sila nga Mosangyaw: Dasiga ang imong mga estudyante sa pagpaambit sa ilang nakat-onan ngadto sa uban. Pag-asoy ug makapadasig nga mga kasinatian sa pagsangyaw ngadto kanila. Samtang sila bata pa, bansaya ang imong mga anak nga makig-ambit sa ministeryo nga mabungahon sumala sa ilang katakos. (Sal. 148:12, 13) Ipakita sa pulong ug sa buhat ang imong pagpabili sa ministeryo.—1 Tim. 1:12.
4 Kadto lamang matinumanong nagtuman sa iyang mga sukdanan ang pagagamiton ni Jehova. Siyempre, limitado ang kahibalo sa bag-ong mga magmamantala kon itandi sa mga eksperyensiyado ug bawtismadong magmamantala, apan kinahanglan silang motuo ug makahimo sa pagsaysay sa pangunang mga pagtulon-an sa Bibliya. (Tan-awa ang librong Organisado, p. 79-82.) Ang bag-ong mga magmamantala angay nga bug-os nahimulag sa “Dakong Babilonya,” wala na nakigbahin sa politika ug tigtambongan na sa mga tigom.—Pin. 18:2, 4; Juan 17:16; Heb. 10:24, 25.
5 Kon nakita nimo nga ang imong mga estudyante kuwalipikado na nga mahimong dili-bawtismadong magmamantala, angay nimong pahibaloon ang nagadumalang magtatan-aw bahin niini. Siya magtudlog duha ka ansiyano nga makig-estorya kanimo uban kaniya aron matino kon kuwalipikado na ba siya nga mahimong dili-bawtismadong magmamantala uban sa kongregasyon. Usa kini ka kahigayonan aron imo siyang mabansay nga mas bug-os pa samtang siya makig-uban kanimo diha sa ministeryo.