Pangutana

◼ Haom ba ang pagpakpak human sa matag bahin sa Teokratikanhong Tunghaan sa Ministeryo ug sa Tigom sa Pag-alagad?

Sa dihang gilalang ni Jehova ang yuta, “ang mga bituon sa kabuntagon nagdungan paghugyaw sa kalipay, ug ang tanang anak sa Diyos misinggit sa pagdayeg.” (Job 38:7) Ilang gidayeg si Jehova tungod sa iyang talagsaong mga kalalangan, nga maoy kapasundayagan sa iyang kaalam, pagkamaayo, ug gahom.

Maayo kon kita magpakitag kinasingkasing nga apresasyon sa mga paningkamot sa atong mga igsoon sa paghatag sa ilang bahin. Pananglitan, nabatasan na nato ang pagpakpak human sa mga pakigpulong ug mga pasundayag sa espesyal nga mga panagkatigom, sama sa mga asembliya ug kombensiyon. Gikinahanglan gayod ang dugang panahon ug paningkamot sa pag-andam ug pagpresentar sa maong mga bahin. Busa ang pagpakpak nagpakita sa atong apresasyon dili lamang sa mga paningkamot niadtong may bahin kondili maingon man usab sa instruksiyon nga gitagana ni Jehova pinaagi sa iyang Pulong ug sa iyang organisasyon.—Isa. 48:17; Mat. 24:45-47.

Komosta ang pagpakpak human sa matag bahin diha sa Teokratikanhong Tunghaan sa Ministeryo ug sa Tigom sa Pag-alagad? Walay mga lagda nga nagdili sa pagpakpak kon kini kinasingkasing, sama sa dihang mohatag ang usa ka estudyante sa iyang unang bahin. Hinunoa, basin ang pagpamakpak mahimo na lang nga rutina ug wala nay kahulogan. Busa, sagad dili kita mamakpak sa matag presentasyon.

Bisan pag dili kita mamakpak sa kadaghanang bahin panahon sa Teokratikanhong Tunghaan sa Ministeryo ug Tigom sa Pag-alagad, dunay laing mga paagi aron atong mapakita ang atong apresasyon sa instruksiyon ug sa mga paningkamot niadtong may mga bahin. Mahimo nato kini pinaagi sa pagpabiling alerto ug sa pagpatalinghog pag-ayo sa mga mamumulong. Ug human sa tigom, mahimong duolon nato ang mga may bahin ug pasalamatan sila sa ilang mga paningkamot.—Efe. 1:15, 16.