Pangitaa ang mga Takos
1. Sa unsang paagi atong ikapakita nga atong gipabilhan ang pribilehiyo nga makaalagad diha sa ministeryo?
1 Panahon sa iyang ministeryo, si Jesus mipanaw ug lagyong mga dapit aron isulti sa mga maaghop ang makapahupay nga maayong balita. (Isa. 61:1, 2) Isip mga embahador ug hawas ni Kristo, atong nabatonan karon ang hamiling pribilehiyo sa pagsundog kaniya pinaagi sa atong way-puas ug makugihong pagpangita sa mga tawong takos diha sa atong teritoryo.—Mat. 10:11; 2 Cor. 5:20.
2. Sa unsang paagi gipakita ni Pablo ang pagkamapailin-ilinon, ug uban sa unsang resulta?
2 Magmapailin-ilinon: Nabatasan na ni apostol Pablo ang pag-adto sa sinagoga aron sa pagsangyaw sa mga Hudiyo ug sa mga kinabig. (Buh. 14:1) Sa Filipos, si Pablo ug Silas nangitag mga tawo ngadto sa usa ka dapit nga gituohan nilang may ampoanan. Ilang gisangyawan ang usa ka grupo sa mga babaye, ug ang usa kanila, si Lydia, midawat dayon sa kamatuoran.—Buh. 16:12-15.
3. Gawas pa sa pagpamalaybalay, unsang mga kahigayonan sa pagsangyaw ang mahimo natong pahimuslan?
3 Gawas pa sa pagpamalaybalay, makahimo ka ba usab sa pagsangyaw sa mga terminal, parke, opisina, eskina nga daghag tawo, dapit sa negosyo, ug mga shopping center sa inyong teritoryo? Basin makasangyaw ka sa mga dapit nga kinoralan ug sa mga apartment nga binantayan pinaagig sulat o telepono. Ang pagkamapaniiron ug pagkamapailin-ilinon sa lainlaing kahimtang sa inyong teritoryo maghimo kanimong “puliki diha sa buluhaton sa Ginoo.”—1 Cor. 15:58.
4. Unsay lain natong kapilian kon limitado ang teritoryo sa atong kongregasyon?
4 Daghang magmamantala ang nagpasangkad sa ilang ministeryo pinaagi sa pagbalhin ngadto sa laing kongregasyon diha sa ilang nasod o sa ubang nasod. Ang uban nagtuon ug laing pinulongan aron ilang masangyawan ang mga langyaw.
5. Unsay angay natong panglantaw sa panahon nga atong gikinabuhian, ug unsa ang determinado natong buhaton?
5 Angay natong hinumdoman nga “ang uma mao ang kalibotan.” (Mat. 9:37; 13:38) Tungod kay hapit nang matapos kining daotang sistema sa mga butang, ang matag usa angayng mamalandong pag-ayo sa iyang situwasyon, katakos, mga kahigayonan, ug mga posibilidad sa pagpasangkad sa iyang ministeryo. Si Jehova nagpasalig kanato nga kon atong unahon ang intereses sa Gingharian, siya magpanalangin sa atong kinasingkasing nga mga paningkamot sa pagpasangkad sa atong ministeryo.—Mat. 6:33.